.jpg)
ប្រធានាធិបតីរុស្ស៊ីលោក វ៉្លាឌីមៀរ ពូទីន កន្លងមក។ រូបថត AFP
ក្រុងម៉ូស្គូ៖ ប្រធានាធិបតីរុស្ស៊ីលោក វ៉្លាឌីមៀរ ពូទីន បានថ្លែងកាលពីថ្ងៃអង្គារថា ប្រទេសបេឡារុស ដែលនៅជិតខាង កំពុងស្ថិតនៅក្រោមសម្ពាធខាងក្រៅមិនធ្លាប់មានពីមុនមក ខណៈដែលសម្ព័ន្ធមិត្តរបស់អតីតសហភាពសូវៀតរបស់វិមានក្រឹមឡាំង បានប្រឈមមុខជាមួយវិបត្តិនយោបាយយ៉ាងជ្រៅ ជុំវិញការបោះឆ្នោតមួយពោរពេញដោយភាពចម្រូងចម្រាសនៅក្នុងប្រទេសនេះ។
លោក វ៉្លាឌីមៀរ ពូទីន បានថ្លែងនៅក្នុងសុន្ទរកថាដែលបានចាក់ផ្សាយតាមទូរទស្សន៍ថា ប្រទេសបេឡារុស កំពុងស្ថិតនៅក្នុង «ស្ថានភាពដ៏លំបាក» និងកំពុងប្រឈមមុខនឹង «ការដាក់សម្ពាធពីខាងក្រៅមិនធ្លាប់មានពីមុន» បន្ទាប់ពីការបោះឆ្នោតប្រធានាធិបតីកាលពីខែមុន បានបង្កឲ្យមានការបន្តតវ៉ាប្រឆាំងមេដឹកនាំផ្តាច់ការនិយម លោក អាឡិចសាន់ឌឺរ លូកាសិនកូ។
ក្រុមអ្នកតវ៉ាបានចេញទៅតាមដងផ្លូវនៃទីក្រុងបេឡារុសចាប់តាំងពីលោក លូកាសិនកូ បានអះអាងឡើងកាន់តំណែងអាណត្តិទី៦ ដែលមានសំឡេងឆ្នោតគាំទ្រ ៨០ ភាគរយ នៅក្នុងការបោះឆ្នោត កាលពីថ្ងៃទី ៩ ខែសីហា កន្លងទៅ។
លោក ពូទីន បានសន្យាថា នឹងផ្តល់ជូនដល់បុរសខ្លាំងរូបនេះនូវជំនួយកម្លាំងសន្តិសុខ ប្រសិនបើវិបត្តិនយោបាយកាន់តែអាក្រក់ខ្លាំងឡើង និងផ្តល់ប្រាក់កម្ចី ១,៥ ពាន់លានដុល្លារថែមទៀតដល់បេឡារុស។
លោក លូកាសិនកូ បានចោទប្រទេសលោកខាងលិច និងណាតូ ពីបទប៉ុនប៉ងធ្វើឲ្យប្រទេសលោកជ្រួលច្របល់៕AFP/SK
