.jpg)
លោក អេម៉ានុយអែល ម៉ាក្រុង ថ្លែងអំពីស្ថានភាពជំងឺកូវីដ ១៩ នៅបារាំង។ AFP
ក្រុងប៉ារីស៖ លោកប្រធានាធិបតីបារាំង អេម៉ានុយអែល ម៉ាក្រុង បានចេញបញ្ជាឱ្យដាក់បម្រាមគោចរនៅពេលយប់ សម្រាប់ក្រុងប៉ារីស និងក្រុងចំនួន ៨ ផ្សេងទៀតនៅបារាំង ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ក្រោយពីអត្រាឆ្លងប្រចាំថ្ងៃថ្មី បានឈានដល់កម្រិតមួយគួរឱ្យព្រួយបារម្ភខ្លាំងបំផុត។
នៅក្នុងបទសម្ភាសមួយដែលត្រូវបានគេចាក់ផ្សាយតាមទូរទស្សន៍លោក ម៉ាក្រុង បានថ្លែងថា ប្រជាជននៃក្រុងទាំងនោះ ដែលជាកន្លែងមានប្រជាជនជិត ១ ភាគ ៣ នៃចំនួនប្រជាជនសរុបរបស់ប្រទេសបារាំង នឹងមិនត្រូវអនុញ្ញាតឱ្យនៅខាងក្រៅ ចាប់ពីម៉ោង ៩ យប់ ដល់ម៉ោង ៦ ព្រឹក ចាប់ពីថ្ងៃសៅរ៍ទៅ សម្រាប់រយៈពេលយ៉ាងតិច ៤ សប្តាហ៍។
មនុស្សយ៉ាងតិច ១ ០៨៧ ៥១៣ នាក់ បានស្លាប់ដោយសារវីរុសផ្លូវដង្ហើមកូរ៉ូណា ចាប់តាំងពីវីរុសផ្លូវដង្ហើមនេះ បានផ្ទុះឆ្លងរាលដាលកាលពីចុងឆ្នាំ ២០១៩។ នេះបើយោងតាមចំនួនសរុបរបស់ AFP ត្រឹមម៉ោង ១១:០០ ម៉ោងសកលកាលពីថ្ងៃពុធ។
ករណីឆ្លងយ៉ាងតិច ៣៨,២ លាននាក់ ត្រូវបានគេកត់ត្រានៅជុំវិញពិភពលោក។
អាមេរិកមានចំនួនអ្នកស្លាប់ខ្ពស់ជាងគេបំផុតនៅក្នុងពិភពលោកគឺ ២១៥ ៩១៤ នាក់ បន្ទាប់មកប្រទេសប្រេស៊ីល គឺ ១៥០ ៩៩៨ នាក់ ឥណ្ឌាមានអ្នកស្លាប់ ១១០ ៥៨៦ នាក់ ម៊ិកស៊ិកមានអ្នកស្លាប់ចំនួន ៨៤ ៤២០ នាក់ និងចក្រភពអង់គ្លេសមានអ្នកស្លាប់ចំនួន ៤៣ ០១៨ នាក់។
រដ្ឋាភិបាលតំបន់បានប្រកាសថា បារ៍ និងភោជនីយដ្ឋាន ត្រូវបានគេបិទនៅទូទាំងតំបន់កាតាឡូនីភាគឦសាន នៃប្រទេសអេស្ប៉ាញ រយៈពេល ១៥ ថ្ងៃបន្ថែមទៀត ដើម្បីទប់ស្កាត់ការឆ្លងវីរុស៕ AFP/PSA
