.jpg)
អ្នកធ្វើការងារផ្នែកសង្គ្រោះកំពុងបូមប្រេងដែលកំពប់នៅក្នុងទន្លេ Arctice។ រូបថតAFP
ក្រុងវ៉ាស៊ីនតោន៖ អាមេរិកកាលពីថ្ងៃសៅរ៍បានជួយប្រទេសរុស្ស៊ី ដើម្បីសម្អាតប្រេងកំពប់យ៉ាងច្រើន ដែលបានធ្វើឲ្យកខ្វក់នៅក្នុងទន្លេ Arctic នៅតំបន់ស៊ីប៊ឺរៀភាគខាងជើង។
រដ្ឋមន្ត្រីការបរទេសអាមេរិកលោក ម៉ៃក៍ ប៉ុមប៉េអូ បានសរសេរនៅលើគេហទំព័រធ្វីធើរថា៖ «មានក្តីទុក្ខសោកយ៉ាងក្រៀមក្រំនៅពេលបានឮដំណឹង អំពីប្រេងកំពប់នៅក្នុងទីក្រុងណូរីលស្គ៍ នៃប្រទេសរុស្ស៊ី»។
ទោះបីជាពួកយើងមានការខ្វែងគំនិតគ្នាក្តី ក៏អាមេរិកបានត្រៀមលក្ខណៈរួចជាស្រេច ដើម្បីជួយប្រទេសរុស្ស៊ី ក្នុងការបន្ធូរបន្ថយគ្រោះមហន្តរាយបរិស្ថាន និងផ្តល់ក្រុមអ្នកជំនាញបច្ចេកទេសរបស់យើង»។
កាលពីថ្ងៃទី ២៩ ខែឧសភា នាវាដឹកប្រេង ១ គ្រឿង នៅឯរោងចក្រថាមពល ១ កន្លែង ដែលជារបស់ក្រុមហ៊ុនផលិតប្រេង Norilsk Nickel បានក្រឡាប់នៅក្បែរក្រុងណូរីលស្គ គឺតំបន់ឧស្សាហកម្មស៊ីប៊ឺរៀ ដែលបានដឹកប្រេងប្រហែលចំនួន ១៥ ០០០ តោន ធ្វើដំណើរនៅតាមផ្លូវទឹកមួយកន្លែង ហើយវាបានកំពប់ប្រេងចំនួន ៦ ០០០ តោនបន្ថែមទៀត នៅជុំវិញតំបន់នោះ។
ការកំពប់ប្រេងនោះ បានចាត់ទុកថាជាមហន្តរាយបរិស្ថានយ៉ាងអាក្រក់បំផុត ដែលបានធ្វើឲ្យប៉ះពាល់ក្នុងតំបន់នោះ បានធ្វើឲ្យទឹកប្រែពណ៌នៅក្នុងតំបន់ផ្លូវទឹកដាច់ស្រយាល ដោយបានធ្វើឲ្យទឹកឡើងពណ៌ក្រហមឆ្អៅ ដែលអាចមើលឃើញពីកន្លែងកំពប់នោះ។
ប្រធានាធិបតីរុស្ស៊ីលោក វ៉្លាឌីមៀរ ពូទីន បានប្រកាសដាក់តំបន់នោះក្នុងភាពគ្រាអាសន្នមួយ ហើយលោកបានថ្លែងថា លោករំពឹងថា ក្រុមហ៊ុនផលិតប្រេង Norilsk Nickel នឹងបង់ថ្លៃសម្អាតនោះដែលអាចនឹងចំណាយពេលច្រើនឆ្នាំនៅទីនោះ។
ការងារសម្អាតប្រេងនេះ ពិតជាស្មុគស្មាញណាស់៕ AFP/SK
