លោក Elon Musk ម្ចាស់ក្រុមហ៊ុន Tesla បានវិនិយោគទឹកប្រាក់ចំនួន ១,៥ ពាន់លានដុល្លារ ដើម្បីទិញរូបិយប័ណ្ណ Bitcoin និងប្រកាសថា ក្រុមហ៊ុនលោកគ្រោងនឹងប្រើប្រាស់រូបិយប័ណ្ណអេឡិចត្រូនិក Bitcoin នេះក្នុងការទិញរថយន្តពីក្រុមហ៊ុនខ្លួន។ ភ្លាមៗនោះតម្លៃរូបិយប័ណ្ណ Bitcoin បានឡើងលឿនមិនធ្លាប់មានពីមុនមកដោយបង្កើតឱ្យមានការពិភាក្សាដេញដោល និងវិភាគថា តើអនាគតនៃរូបិយប័ណ្ណអេឡិចត្រូនិកនឹងក្លាយជាយ៉ាងណា?
ក្រោយការប្រកាស និងការអនុម័តវិនិយោគរួចមកទីផ្សារទូទាត់សាច់ប្រាក់ រួមមានដូចជា PayPal សេវាបង់ប្រាក់តាមទូរស័ព្ទ (Microstrategy MSTR) ធ្លាក់ចុះប្រមាណដក ២៣,៤%, Visa, Square-SQ ធ្លាក់ដល់ដក ០,២% និង Mastercard ក៏ធ្លាក់ចុះផងដែរ។ យ៉ាងណាមិញ ទីផ្សាររូបិយប័ណ្ណ Bitcoin និងរូបិយប័ណ្ណអេឡិចត្រូនិក (crypto) ផ្សេងៗទៀតហាក់ហក់ឡើងខ្ពស់វិញ។
លោក Thomas Carper សមាជិកព្រឹទ្ធសភាជាន់ខ្ពស់អាមេរិកនៅរដ្ឋដេឡាវ៉ា (Delaware) បានឱ្យដឹងទាក់ទិននឹង បាតុភូតនេះថា៖ «ក្នុងចំណោម រូបិយប័ណ្ណនិមិត្ត (អេឡិចត្រូនិក) រូបិយប័ណ្ណដែលគួរឱ្យកត់សម្គាល់បំផុតគឺ Bitcoin ដែលផ្ដល់ក្ដីសង្ឃឹមដល់អ្នកទិញខ្លះ និងធ្វើឱ្យមានអ្នកខ្លះភ័យខ្លាច ខ្លះច្របូកច្របល់ដូចតែពួកយើងដែរ ថាតើអនាគតអាចនឹងមានអ្វីកើតឡើង?»។
លោក Elon Musk កាលពីថ្ងៃទី ៨ កុម្ភៈ កន្លងទៅបានប្រកាសថា ក្រុមហ៊ុន Tesla បានទិញរូបិយប័ណ្ណ Bitcoin ចំនួន ១,៥ ពាន់លានដុល្លារ កាលពីខែមករា ដោយរំពឹងថា នឹងចាប់ផ្តើមទទួលយករូបិយប័ណ្ណប្រភេទនេះ ដើម្បីទូទាត់នាពេលអនាគត។ រ
បាយការណ៍ក្រុមហ៊ុន Tesla បានឱ្យដឹងថាក្រុមប្រឹក្សាភិបាលរបស់ខ្លួនបានអនុម័តគោលនយោបាយវិនិយោគដោយបានធ្វើបច្ចុប្បន្នភាពនៅក្នុងខែមករា ក្នុងការផ្តល់ភាពងាយស្រួលបន្ថែមទៀត ដើម្បីបង្កើតឱ្យមានប្រភេទទូទាត់សាច់ប្រាក់ច្រើន និងផ្តល់ផលចំណេញអតិបរមាបន្ថែមទៀតលើសាច់ប្រាក់របស់យើងដែលនៅសល់ក្រៅពីប្រតិបត្តិការ។ គិតត្រឹមដំណាច់ឆ្នាំ ២០២០ ក្រុមហ៊ុននេះ មានសាច់ប្រាក់សុទ្ធ ស្មើនឹង ១៩,៣៨ ពាន់លានដុល្លារ។
ព័ត៌មាននេះបានធ្វើឱ្យតម្លៃ Bitcoin លោតឡើងដល់ ២៥ ភាគរយ ឬ ស្មើនឹងប្រមាណជាង ៤៥ ០០០ ដុល្លារ ក្នុង ១ ឯកតា ដែលជាកំណត់ត្រាខ្ពស់បំផុតមិនធ្លាប់មានពីមុនមក។ លោក Musk ហាក់ដូចជា ចាត់ទុកខ្លួនឯងថាជាអ្នកត្រួសត្រាយទីផ្សាររូបិយប័ណ្ណអេឡិចត្រូនិកកាលពីសប្តាហ៍មុន ដោយបានផូស្តធ្វីធើរជាបន្តបន្ទាប់ និងបន្ថែមហាសថេក ''#Bitcoin'' ទៅលើផូស្ត Twitter របស់លោក។
គាត់បានបន្តផូស្តទាក់ទិននឹងនិយាយជាមួយរូបិយប័ណ្ណអេឡិចត្រូនិកមួយប្រភេទទៀតគឺ Dogecoin ដែលធ្វើឱ្យទីផ្សារូបិយប័ណ្ណមួយនេះកើនឡើងដល់ ៥០ ភាគរយកាលពីសប្តាហ៍មុន បន្ទាប់ពីការប្រកាសវិនិយោគរបស់លោក។
លោក Nic Carter សហស្ថាបនិកក្រុមហ៊ុន Castle Island Ventures និងក្រុមហ៊ុនទិន្នន័យ Coin Metrics បានប្រាប់ស្ថានីយទូរទស្សន៍ CNBC កាលពីថ្ងៃពុធថា លោកមានជំហរសុទិដ្ឋិនិយមចំពោះ Bitcoin និងរីករាយចំពោះជំហានរបស់លោក Musk ដែលបានទិញ Bitcoin។ «ប៉ុន្តែជាអកុសលអ្នកលក់រាយជាច្រើន អាចនឹងខាតបង់ប្រាក់លើការវិនិយោគ dogecoin ក្នុងរយៈពេលវែង ពីព្រោះវាមិនមានទំនាក់ទំនងច្រើនជាមួយនឹងបច្ចេកវិទ្យា ដែលគួរធ្វើឱ្យគេចាប់អារម្មណ៍»។ លោកបានបន្តយ៉ាងដូច្នេះ។
លោកបានបន្ថែមថា៖ «រឿងតែមួយគត់ដែលអាចនឹងកើតឡើងចំពោះរូបិយប័ណ្ណប្រភេទនេះ (Dogecoin) គឺបន្ថយល្បឿននៃការឡើងថ្លៃប៉ុន្តែនៅបន្តនៅក្នុងទីផ្សារដដែល និងឈប់ផ្ដល់ការរំពឹងទុកដល់អ្នកវិនិយោគ»។
ទោះជាយ៉ាងណាក្ដី មួយជំហានរបស់ក្រុមហ៊ុន Tesla ក្នុងការទិញរូបិយប័ណ្ណ Bitcoin នេះមានប្រសិទ្ធភាពគួរឱ្យកត់សម្គាល់ ដោយមានគេរំពឹងថាក្រុមហ៊ុននេះ នឹងទទួលបានប្រាក់ចំណេញត្រឡប់មកពីការទិញវិញរាប់រយលានដុល្លារឯណោះ។
ការទិញរូបិយប័ណ្ណ Bitcoin របស់ក្រុមហ៊ុន Tesla គឺជាការវិនិយោគដ៏ធំបំផុតមួយដែលមិនធ្លាប់មានពីមុនមកបើយោងទៅតាមរតនាគារ Bitcoin ដែលជាគេហទំព័រដែលគ្រប់គ្រងការវិនិយោគសាជីវកម្មក្នុងទ្រព្យសកម្ម។
ប៉ុន្តែសំណួរសួរថា តើសេវាទូទាត់ដទៃៗទៀតអាចនឹងប្រើប្រាស់រូបិយប័ណ្ណអេឡិចត្រូនិក បន្ទាប់ពីលោក Musk ដែរឬយ៉ាងណា?
ការទិញរូបិយប័ណ្ណ Bitcoin បានកើនឡើងខ្ពស់បំផុត និងនៅតែបន្តកើនឡើងជាបន្តបន្ទាប់ ជាពិសេសពីសំណាក់ក្រុមហ៊ុនសាធារណៈ កាលពីឆ្នាំ ២០២០ នៅពេលដែលតម្លៃរូបិយប័ណ្ណមួយនេះឡើងខ្ពស់ជាង ៤ ដងនៃតម្លៃដើម។ ក្រុមហ៊ុន Tesla ក៏បានចូលរួមជាមួយក្រុមហ៊ុនដទៃទៀតដែរនៅពេលនោះ។ ក្រុមហ៊ុនអភិវឌ្ឍន៍សូហ្វវែរដូចជា MicroStrategy Inc បានទិញ Bitcoin តម្លៃប្រមាណ ៤២៥ លានដុល្លារ កាលពីឆ្នាំមុន ហើយនាយកប្រតិបត្តិរបស់ក្រុមហ៊ុននេះ គឺលោក Michael Saylor បានក្លាយបុគ្គលនាំមុខម្នាក់ ដែលវិនិយោគលើរូបិយប័ណ្ណ Bitcoin នេះ។
យ៉ាងណាមិញ ការទិញរូបិយប័ណ្ណ ការវិភាគ និងការឡើងថ្លៃរបស់ Bitcoin នេះ គឺជាការពង្រីកខ្លួនរបស់ Bitcoin ក្នុងទីផ្សាររូបិយប័ណ្ណអេឡិចត្រូនិក ដែលដំណើរការនេះធ្លាប់មានរួចហើយចាប់តាំងពីពេលដែលទីផ្សារ Bitcoin ឡើងខ្ពស់បំផុតនៅឆ្នាំ ២០១៧ ខណៈរូបិយប័ណ្ណនេះនៅតែបន្តការកើនឡើង និងការពង្រីកសក្ដានុពលខ្លួនក្នុងទីផ្សាររូបិយប័ណ្ណអេឡិចត្រូនិក។ ប៉ុន្តែក្នុងឆ្នាំ ២០២១ គេរំពឹងថា ការកើនឡើងនេះទំនងមិនអាចកើតមានឡើងដូចកាលឆ្នាំ ២០១៧ ឡើយ។
ថ្មីៗនេះ ក្រុមហ៊ុន PayPal ដែលជាក្រុមហ៊ុនសហស្ថាបនាដោយលោក Musk កាលពីឆ្នាំ ១៩៩៩ ក៏បានចាប់ផ្តើមអនុញ្ញាតឱ្យអ្នកប្រើប្រាស់ទិញ និងលក់ដោយប្រើប្រាស់រូបិយប័ណ្ណអេឡិចត្រូនិកផងដែរ។ ក្រុមហ៊ុនគ្រប់គ្រងប្រាក់ធំវិនិយោគធំជាងគេបំផុតនៅលើពិភពលោក ក្រុមហ៊ុន Blackrock ថ្មីៗនេះក៏បានផ្លាស់ប្តូរលក្ខខណ្ឌមួយចំនួនផងដែរ ដែលអនុញ្ញាតឱ្យការវិនិយោគមួយចំនួនប្រើប្រាស់រូបិយប័ណ្ណអេឡិចត្រូនិកក្នុងការទូទាត់ និងវិនិយោគផងដែរ។
បើយោងតាមកាសែត Wall Street Journal ក្រុមហ៊ុនដែលកាន់កាប់ Bitcoin នៅក្នុងរតនាគាររបស់ពួកគេ អាចនឹងប្រឈមនឹងហានិភ័យទ្រព្យសកម្ម ដោយសារតែ Bitcoin និងទ្រព្យសម្បត្តិឌីជីថលផ្សេងទៀតត្រូវបានគេចាត់ទុកថាជា «ទ្រព្យអរូបីមិនប្រាកដប្រជា» ដែលមានលក្ខណៈ ប្រថុយប្រថានជាងរូបិយប័ណ្ណទូទៅ។
ការធ្លាក់ថ្លៃជាងតម្លៃដែលក្រុមហ៊ុនទិញអាចនឹងធ្វើឱ្យក្រុមហ៊ុនចូលដើម។ ឧទាហរណ៍ដូចក្រុមហ៊ុន MicroStrategy ធ្លាប់បានប្រកាសពីការខាតបង់ពីការទិញលក់ Bitcoin នៅត្រីមាសទី៣ នៃឆ្នាំ ២០២០ ដោយសារតែតម្លៃ Bitcoin បានធ្លាក់ចុះជាបណ្តោះអាសន្នកាលពីខែកញ្ញា។
ករណីមួយទៀតគឺ ករណីរបស់ Tesla នេះតែម្តង ពោលគឺក្រោយការប្រកាសទិញរូបិយប័ណ្ណ Bitcoin រួច តម្លៃ Bitcoin បានឡើងថ្លៃរហូតដល់ ២៥% ក្នុង ១ ថ្ងៃក៏ពិតមែន ប៉ុន្តែក៏បានធ្វើឱ្យជះឥទ្ធិពលអវិជ្ជមានដល់ក្រុមហ៊ុន Tesla ខាតបង់ប្រហែល ៤% ចាប់តាំងពីទិញមក៕