.jpg)
មេដឹកនាំបក្សប្រឆាំងលោក Juan Guaido (កណ្តាល) ជួបជាមួយក្រុមអ្នកគាំទ្ររាប់ម៉ឺននាក់នៅក្រុងការ៉ាកាសភាគខាងកើត។ AFP
ក្រុងការ៉ាកាសៈ មេបក្សប្រឆាំងវ៉េណេស៊ុយអេឡា លោក Juan Guaido បានថ្លែងប្រាប់ក្រុមអ្នកគាំទ្ររាប់ម៉ឺននាក់កាលពីថ្ងៃអង្គារថាជំនួយមនុស្សធម៌ដែលត្រូវការចាំបាច់នោះនឹងត្រូវបាននាំចូលប្រទេសនៅថ្ងៃទី ២៣ ខែកុម្ភៈនេះ ទោះបីជាមានការប្រឆាំងពីប្រធានាធិបតី វ៉េណេស៊ុយអេឡា លោក នីកូឡាស ម៉ាឌូរ៉ូ ក្តី។
លោកប្រធានាធិបតីស្តីទីស្វ័យប្រកាស Guaido បានថ្លែងឲ្យដឹងថា៖ «វាពិតជាច្បាស់ណាស់ថា ជំនួយមនុស្សធម៌នឹងមកដល់វ៉េណេស៊ុយអេឡា ពីព្រោះអ្នកដណ្តើមអំណាចគេនឹងគ្មានជម្រើស ក្រៅពីចាកចេញពីប្រទេសនោះទេ»។
ជំនួយអាមេរិកកំពុងមកដល់ប្រទេស កូឡុំប៊ី នៅព្រំដែនជាប់ជាមួយប្រទេសវ៉េណេស៊ុយអេឡាដែលរងការប៉ះពាល់ដោយវិបត្តិវាយប្រហារ ប៉ុន្តែរហូតមកទល់ពេលនេះការឆ្លងកាត់ស្ពានព្រំដែនត្រូវបានរាំងខ្ទប់ដោយយោធាស្ថិតនៅក្រោមបញ្ជារបស់លោកប្រធានាធិបតី ម៉ាឌូរ៉ូ។
លោក Guaido ដែលត្រូវទទួលស្គាល់ដោយប្រទេសចំនួន ៥០ ក្រោយពីធ្វើការប្រកាសដោយខ្លួនឯងថា ជាមេដឹកនាំបណ្តោះអាសន្នរបស់ប្រទេសវ៉េណេស៊ុយអេឡា បានថ្លែងថា៖ «យើងមានប្រជាជនវ៉េណេស៊ុយអេឡាប្រហែល ៣ សែននាក់ដែលពួកគេនឹងត្រូវស្លាប់ ប្រសិនបើជំនួយនោះមិនបានចូលមកដល់នោះ។ សុខភាពរបស់មនុស្សប្រហែល ២ លាននាក់ប្រឈមនឹងគ្រោះថ្នាក់យ៉ាងធ្ងន់ធ្ងរ»។
ដោយទទួលបានអំណាចពីរដ្ឋធម្មនុញ្ញលោក Guaido ប្រធានសភាបានចាត់ទុកលោក ម៉ាឌូរ៉ូ ថា «ខុសច្បាប់» បន្ទាប់ពីមានការបោះឆ្នោតនៅឆ្នាំ ២០១៨ ដែលមេគណបក្សប្រឆាំងលោក Juan Guaido ចោទប្រកាន់ថាមានការលួចបន្លំសន្លឹកឆ្នោត៕ SK
លោកម៉ាឌូរ៉ូថ្លែងនៅក្នុងពិធីប្រារព្ធទិវាយុវជននៅវិមាន Bolivar។ AFP
