រដ្ឋបាលប្រធានាធិបតី Joe Biden បាននិយាយថា ពួកគេបានព្យាយាមធ្វើការទាក់ទងជាមួយនឹងកូរ៉េខាងជើងតាមរយៈមធ្យោបាយទំនាក់ទំនងជាច្រើនតាំងពីខែកុម្ភៈមក តែមកដល់ពេលនេះក្រុងព្យុងយ៉ាងមិនបានធ្វើការឆ្លើយតបទេ។
«ដើម្បីកាត់បន្ថយហានិភ័យនៃភាពតានតឹងកើនឡើងយើងបានព្យាយាមធ្វើការទាក់ទងទៅកាន់រដ្ឋាភិបាលកូរ៉េខាងជើងតាមរយៈមធ្យោបាយជាច្រើនចាប់ផ្ដើមនៅពាក់កណ្ដាលខែកុម្ភៈ ដែលរួមមានទីក្រុងញូវយ៉ក [ឯកអគ្គរដ្ឋទូតកូរ៉េខាងជើងប្រចាំអង្គការសហប្រជាជាតិ]» មន្ត្រីរដ្ឋបាលជាន់ខ្ពស់ ១ រូបបានប្រាប់ បែបនេះទៅកាន់សារព័ត៌មាន Reuters និង CNN ហើយបន្តទៀតថា៖ «មកដល់ពេលនេះយើងមិនទាន់ទទួលបានការឆ្លើយតបណាមួយពីទីក្រុងព្យុងយ៉ាងនៅឡើយទេ។ រឿងនេះ កើតឡើងក្នុងរយៈពេល ១ ឆ្នាំដោយគ្មានការសន្ទនាសកម្មជាមួយប្រទេសកូរ៉េខាងជើង បើទោះបីមានការព្យាយាមជាច្រើនពីសំណាក់សហរដ្ឋអាមេរិក ដើម្បីធ្វើការទាក់ទង»។
ការបង្ហាញអំពីការបរាជ័យរបស់អាមេរិកក្នុងការធ្វើទំនាក់ទំនងជាមួយនឹងកូរ៉េខាងជើងបានចោទជាសំណួរអំពីរបៀបដែលលោក Biden នឹងដោះស្រាយភាពតានតឹងជាមួយនឹងក្រុងព្យុងយ៉ាងជុំវិញបញ្ហាកម្មវិធីបង្កើតអាវុធនុយក្លេអ៊ែរ និងមីស៊ីលបាលីស្ទិកចម្ងាយឆ្ងាយរបស់ប្រទេសនេះ។
កន្លងមករដ្ឋបាល Biden មានការប្រុងប្រយ័ត្នក្នុងការពណ៌នាជាសាធារណៈអំពីវិធីសាស្ត្ររបស់ពួកគេចំពោះកូរ៉េខាងជើង ដោយនិយាយថាខ្លួនកំពុងធ្វើការពិនិត្យឡើងវិញអន្តរក្រសួងលើគោលនយោបាយរបស់អាមេរិកចំពោះកូរ៉េខាងជើង បន្ទាប់ពីមានការប្រជុំដែលមិនធ្លាប់មានពីមុនមករវាងអ្នកកាន់តំណែងមុនរបស់លោក Biden គឺលោក Donald Trump ជាមួយមេដឹកនាំកូរ៉េខាងជើងលោក Kim Jong-Un។
កិច្ចប្រជុំចំនួន ៣ រវាងលោក Trump និងលោក Kim Jong-Un បានសម្រេចសមិទ្ធផលតិចតួច។ ការចរចាបានបរាជ័យក្នុងការបញ្ចុះបញ្ចូលឱ្យភាគីកូរ៉េខាងជើងបោះបង់កម្មវិធីអាវុធនុយក្លេអ៊ែរដែលជាចំណុចក្ដៅជាមួយនឹងអាមេរិក និងប្រទេសជិតខាង គឺជប៉ុន និងកូរ៉េខាងត្បូង ខណៈអាមេរិកមិនព្រមធ្វើការដកទណ្ឌកម្មលើក្រុងព្យុងយ៉ាង។
គេរំពឹងថា គោលនយោបាយថ្មីចំពោះកូរ៉េខាងជើងនឹងត្រូវបានបង្ហាញជាសាធារណៈនៅខែមេសា ខាងមុខនេះ។
រដ្ឋមន្ត្រីក្រសួងការបរទេសអាមេរិកលោក Anthony Blinken បាននិយាយថា អាមេរិកជាមួយនឹងសម្ព័ន្ធមិត្តអាចដាក់ទណ្ឌកម្មបន្ថែមលើកូរ៉េខាងជើង ដើម្បីសម្ពាធឱ្យបោះបង់កម្មវិធីអាវុធនុយក្លេអ៊ែរ។ តែរហូតមកដល់ពេលនេះទណ្ឌកម្មបានបរាជ័យក្នុងការជំរុញឱ្យលោក Kim Jong-Un បោះបង់អាវុធនុយក្លេអ៊ែរ។
ក្នុងអំឡុងពេលយុទ្ធនាការឃោសនាបោះឆ្នោត លោក Biden បាននិយាយថា លោក Kim Jong-Un ជា «ជនខិលខូច» ហើយបាននិយាយថានឹងជួបជាមួយលុះត្រាតែមាន «លក្ខខណ្ឌថា នឹងយល់ព្រមបន្ថយសមត្ថភាពនុយក្លេអ៊ែរ»។
មេដឹកនាំកូរ៉េខាងជើងបានបន្តសង្កត់ធ្ងន់លើសមត្ថភាពយោធារបស់ប្រទេសខ្លួនដោយអះអាងពីការអភិវឌ្ឍមីស៊ីលរយៈចម្ងាយឆ្ងាយ ក្បាលគ្រាប់នុយក្លេអ៊ែរទំហំធំ ផ្កាយរណបចារកម្ម និងនាវាមុជទឹកដើរដោយថាមពលនុយក្លេអ៊ែរ ខណៈទាមទារឱ្យអាមេរិកបោះបង់ចោល «គោលនយោបាយអរិភាព» របស់ពួកគេ។
យ៉ាងណាមិញ ការបង្ហាញនេះធ្វើឡើងខណៈលោក Blinken នឹងរដ្ឋមន្ត្រីក្រសួងការពារជាតិអាមេរិក លោក Lloyd Austin នឹងធ្វើទស្សនកិច្ចទៅកាន់ប្រទេសជប៉ុន និងកូរ៉េខាងត្បូងនៅសប្ដាហ៍នេះ ដោយគេរំពឹងថា កម្មវិធីនុយក្លេអ៊ែរកូរ៉េខាងជើង នឹងក្លាយជាប្រធានបទយ៉ាងសំខាន់មួយក្នុងទស្សនកិច្ចនេះ។
លោក Blinken នឹងជួបជាមួយនឹងមន្ត្រីការទូតជាន់ខ្ពស់របស់ចិននៅពេលដែលលោកត្រឡប់មកវិញ។ រដ្ឋបាល Trump បានចោទប្រកាន់ប្រទេសចិន ថា មិនបានអនុវត្តទណ្ឌកម្មប្រឆាំងនឹងកូរ៉េខាងជើងទេ។
របាយការណ៍សម្ងាត់របស់អង្គការសហប្រជាជាតិកូរ៉េខាងជើង បានរក្សា និងអភិវឌ្ឍកម្មវិធីនុយក្លេអ៊ែរ និងមីស៊ីលបាលីស្ទិករបស់ខ្លួនពេញ ១ ឆ្នាំ ២០២០ ក្នុងការរំលោភលើទណ្ឌកម្មអន្តរជាតិដោយជួយផ្តល់ថវិកាដល់កម្មវិធីទាំងនេះ ជាមួយនឹងទ្រព្យលួចតាមអ៊ីនធឺណិត ចំនួន ៣០០ លានដុល្លារ៕