.jpg)
ប្រធានាធិបតីជាប់ឆ្នោត លោក Joe Biden និងលោកប្រធានាធិបតី Donald Trump។ រូបថត AFP
កាលពីថ្ងៃចន្ទ ទី ២៨ ធ្នូ ប្រធានាធិបតីជាប់ឆ្នោតលោក Joe Biden បាននិយាយថា ក្រុមរៀបចំការផ្ទេរអំណាចរបស់លោករងការ «រារាំង» ពីមន្ត្រីរបស់ Trump នៅក្រសួងការពារជាតិធ្វើឱ្យមានការព្រួយបារម្ភលើកិច្ចសហប្រតិបត្តិការរបស់រដ្ឋបាល Trump ក្នុងដំណើរការផ្ទេរអំណាច ខណៈពេលដែលសល់តែ ៣ សប្ដាហ៍ទៀតដល់ថ្ងៃចូលកាន់តំណែង។
លោក Biden បាននិយាយថា៖ «សម្រាប់ទីភ្នាក់ងារខ្លះយើងទទួលបានកិច្ចសហប្រតិបត្តិការដ៏ល្អពីបុគ្គលិកអាជីពនៅក្នុងទីភ្នាក់ងារទាំងនោះ។ សម្រាប់ទីភ្នាក់ងារផ្សេងទៀត ជាពិសេសក្រសួងការពារជាតិ យើងបានរងការរារាំងពីថ្នាក់ដឹកនាំនយោបាយនៃក្រសួងនោះ»។
លោក Biden បាននិយាយបែបនេះ ក្នុងការថ្លែងសុន្ទរកថាមួយនៅរដ្ឋ Delaware ក្រោយពីលោក និងអនុប្រធានាធិបតីជាប់ឆ្នោតលោកស្រី Kamala Harris បានស្ដាប់ការរាយការណ៍សង្ខេបដោយក្រុមរៀបចំការផ្ទេរអំណាច ដែលបានត្រួតពិនិត្យលើទីភ្នាក់ងារដែលទាក់ទងនឹងសន្តិសុខជាតិ និងគោលនយោបាយការបរទេសដូចជាក្រសួងការពារជាតិ និងក្រសួងការបរទេស។
លោកបានបន្តទៀតថា៖ «ការពិតគឺភ្នាក់ងារជាច្រើន ដែលមានសារៈសំខាន់ចំពោះសន្តិសុខរបស់យើងបានទទួលរងការខូចខាតយ៉ាងធ្ងន់ធ្ងរ។ បុគ្គលិកសមត្ថភាព និងសីលធម៌របស់ពួកគេភាគច្រើនត្រូវបានធ្វើឱ្យប្រហោងក្នុង។ ដំណើរការគោលនយោបាយបានធ្លាក់ចុះ ឬត្រូវបានបញ្ឈប់»។
លោក Biden រិះគន់រដ្ឋបាលលោក Trump ពីការរារាំងនេះថា៖ «ឥឡូវនេះយើងមិនទទួលបានព័ត៌មានទាំងអស់ដែល យើងត្រូវការពីរដ្ឋបាលចេញពីតំណែងទាក់ទងនឹងសន្តិសុខជាតិ។ ក្នុងទស្សនៈខ្ញុំនេះ គឺជាអំពើមិនទទួលខុសត្រូវ»។
នៅថ្ងៃចន្ទដដែលរដ្ឋមន្ត្រីក្រសួងការពារជាតិស្ដីទី លោក Christopher Miller បានការពារក្រសួងការពារជាតិដោយលោកសរសេរក្នុងសេចក្ដីថ្លែងការណ៍មួយថា៖ «មន្ត្រីនយោបាយ និងមន្ត្រីអាជីពនៃក្រសួងការពារជាតិយើង គឺកំពុងធ្វើការប្រកបដោយវិជ្ជាជីវៈខ្ពស់បំផុត ដើម្បីគាំទ្រដល់គ្រប់សកម្មភាពផ្ទេរអំណាចក្នុងកាលវិភាគបង្រួមបំផុត ហើយពួកគេនឹងបន្តធ្វើដូច្នេះប្រកបដោយលក្ខណៈតម្លាភាព ដែលលើកស្ទួយប្រពៃណីល្អបំផុតរបស់ក្រសួង»។
លោក Biden បានប្រឈមមុខនឹងការលំបាកក្នុងការធ្វើការផ្ទេរតំណែងតាំងពីថ្ងៃ ដែលចេញលទ្ធផលបឋមការបោះឆ្នោតមកម្ល៉េះ។ លោក Trump បានរារាំងមិនឱ្យរដ្ឋបាលសេវាទូទៅ (GSA) បំពេញកាតព្វកិច្ចក្នុងការសម្រួលដំណើរការផ្ទេរអំណាចរហូតដល់ថ្ងៃទី ២៣ វិច្ឆិកា។
ប៉ុន្មានថ្ងៃក្រោយការបោះឆ្នោតលោក Trump បានដករដ្ឋមន្ត្រីការពារជាតិ Mark Esper ចេញពីតំណែងហើយតែងតាំងលោក Miller ជារដ្ឋមន្ត្រីស្ដីទី។ បន្ទាប់មកលោក Trump បានដកតំណែងថ្នាក់ដឹកនាំស៊ីវិលនៃក្រសួងការពារជាតិមួយចំនួនហើយជំនួសដោយបុគ្គលជំនិតរបស់លោកវិញដែលរួមមានលោក Kashyap Patel ដែលធ្លាប់ធ្វើជាសមាជិកក្រុមប្រឹក្សាសន្តិសុខជាតិនៃសេតវិមាន។
មកដល់ពេលនេះ លោក Trump នៅតែមិនទទួលយកការចាញ់ការបោះឆ្នោតប្រធានាធិបតី ២០២០ ដោយប្រកាន់យកជំហរថា លោកបានឈ្នះ តែបក្សប្រជាធិបតេយ្យបានលួចជ័យជម្នះរបស់លោកតាមរយៈការក្លែងបន្លំសន្លឹកឆ្នោត។ លោកបានធ្វើការប្ដឹងតវ៉ានៅរដ្ឋសំខាន់ចំនួន ៦ តែពាក្យបណ្ដឹងទាំងជាង ៤០ របស់លោកបានទទួលបរាជ័យសឹងទាំងអស់ហើយ។
លោក Trump បានប្រើប្រាស់អំណាចចុងក្រោយរបស់លោក ដើម្បីលើកលែងទោសឱ្យបុគ្គលចម្រូងចម្រាសជាច្រើនដែលរួមមានសម្ព័ន្ធមិត្តជិតស្និទ្ធដូចជា លោក Mike Flynn អតីតទីប្រឹក្សាសន្តិសុខជាតិ លោក Paul Manafort អតីតអ្នកគ្រប់គ្រងយុទ្ធនាការបោះឆ្នោត Charles Kushner ឪពុករបស់កូនប្រសារបស់លោក និងលោក Chris Collins អតីតសមាជិកសភា មកពីគណបក្សសាធារណរដ្ឋ។
លោក Trump ក៏បានវ៉េតូសេចក្ដីព្រាងច្បាប់កញ្ចប់ថវិកាការពារជាតិ និងគំរាមវ៉េតូសេចក្ដីព្រាងច្បាប់កញ្ជប់ថវិកាជាតិ ដែលរួមមានថវិកាជំនួយកូវីដ ១៩ ៩០០ ពាន់លានដុល្លារ ដោយលោកទាមទារឱ្យបង្កើនទំហំសែកជំនួយពី ៦០០ ដុល្លារ ទៅ ២ ០០០ ដុល្លារវិញ។ លោក Trump បានដកថយការគំរាមរបស់លោកវិញ ហើយបានចុះហត្ថលេខាអនុម័តកញ្ជប់ថវិកានេះវិញ។
សមាជិកសភាមកពីបក្សប្រជាធិបតេយ្យវិញបានអនុម័តការបង្កើនទំហំសែកជំនួយពី ៦០០ ដុល្លារ ទៅ ២ ០០០ ដុល្លារក្នុងសំឡេងភាគច្រើន ២៧៥ ១៣៤ ហើយបានបញ្ជូនទៅកាន់ព្រឹទ្ធសភា ដើម្បីធ្វើការអនុម័តបន្ត។
យ៉ាងណាមិញលោក Biden ត្រូវបានអង្គបោះឆ្នោត (Electoral College) បោះឆ្នោតឱ្យ ៣០៦ ២៣២ គ្រប់គ្រាន់សម្រាប់ទទួលជ័យជម្នះការបោះឆ្នោតប្រធានាធិបតី។ សម័យប្រជុំរួមនៃសភាអាមេរិកនឹងធ្វើការបញ្ជាក់លទ្ធផលរបស់អង្គបោះឆ្នោតនៅថ្ងៃទី ៦ មករា ២០២១។ បើសិនមិនមានការតវ៉ាក្នុងសម័យប្រជុំនេះទេ លោក Biden នឹងឡើងកាន់អំណាចនៅថ្ងៃទី ២០ មករា ២០២១៕
