.jpg)
លោក Joe Biden ថ្លែងទៅកាន់ប្រព័ន្ធផ្សព្វផ្សាយ នៅថ្ងៃទី៩ ខែវិច្ឆិកា។ រូបថត AFP
ការបោះឆ្នោតប្រធានាធិបតីអាមេរិកបានប្រព្រឹត្តទៅនៅថ្ងៃអង្គារទី ៣ ខែវិច្ឆិកា។ បើទោះបីជាលទ្ធផលផ្លូវការមិនទាន់ប្រកាសយ៉ាងណាក៏ដោយ តែសារព័ត៌មានធំៗ នៅអាមេរិកបានសន្និដ្ឋានហើយថា បេក្ខជនមកពីបក្សប្រជាធិបតេយ្យលោក Joe Biden ជាអ្នកទទួលជ័យជម្នះ បន្ទាប់ពីទទួលបានអង្គបោះឆ្នោតច្រើនគ្រប់គ្រាន់ក្នុងការក្លាយជាប្រធានាធិបតី។
ទោះមានឈ្មោះថា ជាអ្នកឈ្នះយ៉ាងណាក្តី ក៏លោក Joe Biden ត្រូវការរយៈពេលជាង ២ ខែទៀត ទើបលោកអាចចូលកាន់តំណែងបាននៅខែមករា ឆ្នាំក្រោយ ដោយសារនៅសល់នីតិវិធីការបោះឆ្នោតជាច្រើនទៀត ដែលមិនទាន់ប្រព្រឹត្តរួច។
តាមធម្មតាពេលវេលាអំឡុងចុងខែវិច្ឆិកា និងដើមខែធ្នូ គឺជាពេលវេលាផុតកំណត់សម្រាប់រដ្ឋនីមួយៗ បញ្ចប់ការរាប់សន្លឹកឆ្នោត និងបញ្ចេញការបញ្ជាក់ (Certify) លទ្ធផលការបោះឆ្នោត។
ជាមួយគ្នានេះ ពេលវេលាមុនការបញ្ជាក់លទ្ធផលឆ្នោត ក៏ជារយៈពេលសម្រាប់បេក្ខជននីមួយៗដាក់ពាក្យបណ្ដឹងលើភាពមិនប្រក្រតី ឬស្នើសុំឱ្យរាប់សន្លឹកឆ្នោតឡើងវិញ ពេលដែលគម្លាតតូចពេករវាងអ្នកឈ្នះ និងអ្នកចាញ់។ ចង់មិនចង់ការប្ដឹងផ្តល់នៅតុលាការអាចអូសបន្លាយ រហូតអាចធ្វើឱ្យហួសពេលផុតកំណត់ តែមិនមានផលប៉ះពាល់ច្រើនដូចហួសពេលកំណត់ នៃការតែងតាំងអង្គបោះឆ្នោត និងការជួបប្រជុំ Electoral College។
រហូតដល់ថ្ងៃទី ៨ ខែធ្នូ ជាថ្ងៃផុតកំណត់ «Safe Harbor» នៃការតែងតាំងអង្គបោះឆ្នោត ដែលអង្គបោះឆ្នោតក្រោយថ្ងៃនេះ គឺអាចនឹងមិនទទួលស្គាល់ ដោយសភាតំណាងរាស្ត្រ និងព្រឹទ្ធសភាអាមេរិក និងអាចចាត់ទុក្ខជាមោឃៈផងដែរ។ ការប្តឹងផ្តល់នៅតុលាការអាចធ្វើឱ្យការតែងតាំងអង្គបោះឆ្នោតប្រព្រឹត្តទៅក្រោយពេលផុតកំណត់នេះ។
បន្តមកថ្ងៃទី ១៤ ខែធ្នូ ជាថ្ងៃជួបប្រជុំនៃ Electoral College នៅតាមរដ្ឋនីមួយៗ ដើម្បីឱ្យអង្គបោះឆ្នោតធ្វើការបោះឆ្នោតឱ្យបេក្ខជនប្រធានាធិបតី។ បើសិនរដ្ឋណាមួយមិនបានរៀបចំការជួបប្រជុំនេះទាន់ថ្ងៃផុតកំណត់ នោះសំឡេងអង្គបោះឆ្នោតរបស់ពួកគេអាចនឹងត្រូវចាត់ទុកជាមោឃៈ។
នៅថ្ងៃទី ៦ ខែ មករា ឆ្នាំ ២០២១ សម័យប្រជុំរួមនៃសភាតំណាងរាស្ត្រ និងព្រឹទ្ធសភាអាណត្តិថ្មីដឹកនាំដោយប្រធានព្រឹទ្ធសភា ដែលជាអនុប្រធានាធិបតីអាមេរិកលោក Mike Pence នឹងធ្វើការរាប់ និងបញ្ជាក់ចំនួនសន្លឹកឆ្នោតក្នុងការជួបប្រជុំ Electoral College ហើយប្រកាសបេក្ខជនទទួលជ័យជម្នះ។
សមាជិកសភាតំណាងរាស្ត្រ ១ រូប រួមជាមួយនឹងសមាជិកព្រឹទ្ធសភា ១ រូប អាចដាក់ពាក្យជំទាស់លើអង្គបោះឆ្នោតណាមួយបាន។ សភាតំណាងរាស្ត្រ និងព្រឹទ្ធសភា នឹងធ្វើការប្រជុំលើការជំទាស់នេះរៀងៗខ្លួន ក្នុងរយៈពេល ១ ម៉ោងហើយនឹងធ្វើការបោះឆ្នោតថា ត្រូវជំទាស់ដែរ ឬទេ? តែក្នុងប្រវត្តិសាស្ត្រអាមេរិកការជំទាស់ គឺមិនដែលបានសម្រេចនោះទេ។
បើសិនគ្មានបេក្ខជនណាមួយទទួលបានអង្គបោះឆ្នោតគ្រប់ ២៧០ ដោយសារហេតុផលណាមួយ នោះសភាតំណាងរាស្ត្រនឹងធ្វើជាអ្នកតែងតាំងប្រធានាធិបតី ហើយព្រឹទ្ធសភាជាអ្នកតែងតាំងអនុប្រធានាធិបតី។ តែការតែងតាំងប្រធានាធិបតីនៅសភាតំណាងរាស្ត្រ គឺប្រព្រឹត្តទៅដោយបែងចែកសមាជិកជាក្រុមទៅតាមរដ្ឋដែលពួកគេតំណាង ហើយក្រុមនីមួយៗមានសំឡេងបោះឆ្នោតតែ ១ គត់ ដែលសរុបមានតែ ៥០ សំឡេងប៉ុណ្ណោះ។
សម្រាប់អាណត្តិបច្ចុប្បន្នបក្សប្រជាធិបតេយ្យមានសំឡេងភាគច្រើន ២៣២ ធៀបនឹង សំឡេង ១៩៨ របស់បក្សសាធារណរដ្ឋក្នុងសភាតំណាងរាស្ត្រ តែបើសិនបែងចែកសមាជិកទៅតាមរដ្ឋដែលពួកគេតំណាងបក្សសាធារណរដ្ឋមានក្រុមចំនួន ២៦ ហើយ បក្សប្រជាធិបតេយ្យមាន ២៤ ក្រុម។
ដោយឡែកលោក Trump វិញបានដាក់ពាក្យបណ្ដឹងនៅរដ្ឋសំខាន់ៗ ចំនួន ៥ ដូចជា Arizona, Georgia, Michigan, Nevada, និង Pennsylvania។ លោក Trump បានចាញ់រឿងក្ដីនៅរដ្ឋ Georgia និង Michigan រីឯពាក្យបណ្ដឹងនៅរដ្ឋ Pennsylvania បានឈានទៅដល់តុលាការកំពូល។ គេសង្កេតឃើញថា ការប្ដឹងផ្ដល់ទាំងនេះមានយឺតយ៉ាវ។ អ្នកវិភាគមួយចំនួនបានគិតថា លោក Trump នឹងចាញ់ការប្ដឹងផ្ដល់ទាំងនេះ ដោយសារកង្វះភ័ស្តុតាង និងយុទ្ធសាស្ត្រច្បាស់លាស់ ហើយបើសិនលោកបានឈ្នះរឿងក្ដីទាំងនេះមែន ក៏នៅតែមានឥទ្ធិពលតិចតួចទៅលើលទ្ធផលបោះឆ្នោតដែរ។
សារព័ត៌មានAPនិង Fox News បានរាយការណ៍ថា លោក Biden ឥឡូវនេះលោកមានអង្គបោះឆ្នោតចំនួន ២៩០ ធៀបនឹងចំនួន ២១៤ របស់លោក Trump ហើយ បើសិនលោក Biden នៅតែនាំមុខសំឡេងនៅរដ្ឋ Georgia ក្រោយពីការរាប់សន្លឹកឆ្នោតឡើងវិញនោះ អង្គបោះឆ្នោតរបស់លោកអាចនឹងកើនរហូតដល់ ៣០៦។
យ៉ាងណាមិញ បើសិនសភាអាមេរិកបានសម្រេចថា លោក Biden បានឈ្នះការបោះឆ្នោត នោះលោកធ្វើពាក្យសម្បថចូលកាន់តំណែងនៅថ្ងៃពុធ ទី ២០ ខែ មករា ឆ្នាំ ២០២១។
រីឯនៅពេលបច្ចុប្បន្ននេះវិញ គឺជារយៈពេលអន្តរកាល លោក Biden បានរៀបក្រុមការងារប្រឆាំងនឹងជំងឺ COVID-19 រួចស្រេចដែលនឹងដំណើរការនៅថ្ងៃដែលលោកឡើងកាន់អំណាច៕
