.jpg)
លោកប្រធានាធិបតី Donald Trump ចាប់ដៃជាមួយលោកស្រី Hillary Clinton នាពេលកន្លងមក។ AFP
ក្រុងវ៉ាស៊ីនតោន៖ រដ្ឋមន្ត្រីការបរទេសសហរដ្ឋអាមេរិកលោក Mike Pompeo បានប្រកាសកាលពីថ្ងៃសុក្រ ទី ៩ ថា លោកកំពុងត្រៀមបញ្ចេញអ៊ីមែលរបស់អ្នកកាន់តំណែងមុនគាត់ លោកស្រី Hillary Clinton ក្រោយពីលោកទទួលការរិះគន់ពីប្រធានាធិបតីសហរដ្ឋអាមេរិកលោក Donald Trump។ ការប្រកាសនេះ ធ្វើឡើង ២៦ ថ្ងៃមុនការបោះឆ្នោតប្រធានាធិបតី។
ក្នុងការសម្ភាសនៅប៉ុស្តិ៍ទូរទស្សន៍ Fox News លោក Pompeo បាននិយាយថា៖ «យើងមានអ៊ីមែលទាំងនោះ» ដោយលោកបន្ថែមទៀត ថា៖ «យើងនឹងបញ្ចេញព័ត៌មានទាំងអស់នេះ ដើម្បីឱ្យប្រជាជនអាមេរិកអាចមើលបាន។ អ្នកនឹងចាំថាព័ត៌មានសម្ងាត់ត្រូវបានដាក់ក្នុងប្រព័ន្ធអ៊ីមែលផ្ទាល់ខ្លួន វាមិនត្រូវនៅទីនោះទេ។ លោកស្រី Hilary Clinton មិនគួរធ្វើបែបនេះទេ វាគឺជាឥរិយាបថ ដែលមិនអាចទទួលយកបាន»។
1 ថ្ងៃមុនការប្រកាសរបស់លោក Pompeo លោក Trump ក៏បាននិយាយក្នុងការសម្ភាសនៅប៉ុស្តិ៍ Fox News ថា៖ «ពួកគេ (អ៊ីមែលរបស់ Clinton) គឺស្ថិតនៅក្នុងក្រសួងការបរទេស ប៉ុន្តែលោក Mike Pompeo មិនអាចបញ្ចេញពួកគេ (អ៊ីមែល) បានដែលជារឿងគួរឱ្យសោកស្ដាយណាស់។ តាមពិតខ្ញុំមិនសប្បាយចិត្តចំពោះគាត់ (Mike Pompeo) ដោយសារហេតុផលនេះ។ គាត់មិនអាចបញ្ចេញពួកគេ (អ៊ីមែល) បានទេ។ ខ្ញុំមិនដឹងមូលហេតុទេ។ អ្នក (Pompeo) កំពុងដឹកនាំក្រសួងការបរទេស អ្នកនឹងត្រូវបញ្ចេញពួកគេ (អ៊ីមែល) ឱ្យបាន។ កុំភ្លេចថា ព័ត៌មានទាំងនោះ ជាព័ត៌មានសម្ងាត់»។
ទាំងលោក Trump និងលោក Pompeo មិនបានពន្យល់ពីមូលហេតុដែលពួកគេនឹងបញ្ចេញអ៊ីមែលរបស់លោកស្រី Clinton នៅរយៈពេលប៉ុន្មានសប្ដាហ៍ចុងក្រោយនៃយុទ្ធនាការបោះឆ្នោតប្រធានាធិបតី ដែលមានការប្រកួតប្រជែងយ៉ាងក្ដៅគគុកនោះទេ។ ពួកគេអាចធ្វើការបញ្ចេញបាននូវចំណុចណាមួយក្នុងរយៈពេល ៤ ឆ្នាំកន្លងមកនេះ។
អ៊ីមែលរបស់លោកស្រី Clinton គឺជាចំណុចចម្រូងចម្រាសមួយក្នុងយុទ្ធនាការបោះឆ្នោតប្រធានាធិបតីឆ្នាំ ២០១៦។ លោកស្រី Clinton ដែលជាអតីតរដ្ឋមន្ត្រីការបរទេស និងជាបេក្ខជនប្រធានាធិបតីរបស់បក្សប្រជាធិបតេយ្យត្រូវបានគេរកឃើញថា បានប្រើប្រាស់ប្រព័ន្ធអ៊ីមែលផ្ទាល់ខ្លួនហើយបានផ្ញើព័ត៌មានសម្ងាត់តាមប្រព័ន្ធនេះ។ សមាជិកសភាបក្សសាធារណរដ្ឋបានទាមទារឱ្យ FBI បើកការស៊ើបអង្កេតថា សកម្មភាពរបស់លោកស្រី Clinton គឺខុសច្បាប់ដែរឬទេ? FBI បានបញ្ចប់ការស៊ើបអង្កេតរបស់ពួកគេ ហើយបានសន្និដ្ឋានថា សកម្មភាពលោកស្រី Clinton គឺជាសកម្មភាពធ្វេសប្រហែសខ្លាំងតែមិនបានដាក់ការចោទប្រកាន់ណាមួយទេ ពីព្រោះលោកស្រីមិនមានចេតនាប្រព្រឹត្តសកម្មភាពឧក្រិដ្ឋកម្ម។
តែប៉ុន្មានថ្ងៃមុនការបោះឆ្នោតប្រធាន FBI លោក James Comey បានប្រកាសបើកការស៊ើបអង្កេតឡើងវិញ ដោយលើកឡើងថា FBI បានរកឃើញភ័ស្តុតាងថ្មី។ ការប្រកាសនេះ ធ្វើឱ្យមានការប៉ះពាល់ដល់ប្រជាប្រិយភាពរបស់លោកស្រី Clinton។ ក្រោយពីលោកស្រី Clinton បានចាញ់ឆ្នោត FBIបានបញ្ចប់ការស៊ើបអង្កេត ហើយបានធ្វើការសន្និដ្ឋានដូចមុន។
ក្រៅពីនេះ នៅក្នុងកិច្ចសម្ភាសន៍ Fox News ដដែលលោក Trump ក៏បានរិះគន់អគ្គរដ្ឋអាជ្ញាសហរដ្ឋអាមេរិកលោក William “Bill” Barr ដោយបាននិយាយថា លោក Barr អាចនឹងក្លាយជាអគ្គរដ្ឋអាជ្ញាអាក្រក់បំផុតក្នុងប្រវត្តិសាស្ត្រ បើសិនជាលោកមិនអាចដាក់ទោសលោកស្រី Clinton ទាក់ទងនឹងរឿងអ៊ីមែល ហើយដាក់ទោសសមាជិកផ្សេងទៀតនៃរដ្ឋបាល Barrack Obama ដោយបានចោទថា រដ្ឋការ Obama បានលួចឃ្លាំមើលក្រុមលោក Donald Trump កាលពីពេលបោះឆ្នោត ២០១៦ និងបើកការស៊ើបអង្កេត ដើម្បីធ្វើឱ្យប៉ះពាល់ដល់ប្រជាប្រិយភាពរបស់លោក។
នៅឆ្នាំ ២០១៦ FBI បានបើកការស៊ើបអង្កេតលើទំនាក់ទំនងរវាងរុស្ស៊ី និងសមាជិកយុទ្ធនាការរបស់លោក Donald Trump។ នៅឆ្នាំ ២០១៧ ការស៊ើបអង្កេតនេះ ត្រូវបានផ្ទេរទៅក្រោមការគ្រប់គ្រងរបស់រដ្ឋអាជ្ញាពិសេសលោក Robert S. Mueller III ដែលជាអតីតប្រធាន FBI។ លោក Mueller បានបញ្ចប់ការស៊ើបអង្កេតនៅឆ្នាំ ២០១៩ ដោយបានដាក់ទោសសមាជិកយុទ្ធនាការលោក Trump មួយចំនួនតែមិនបានដាក់ទោស លោក Trump ផ្ទាល់ទេ។
នៅឆ្នាំ ២០១៩ លោក Barr បានចាប់ផ្ដើមការស៊ើបអង្កេត ដើម្បីរុករកភាពមិនប្រក្រតីក្នុងការស៊ើបអង្កេតឆ្នាំ ២០១៦ មកដល់សព្វថ្ងៃនេះ ការស៊ើបអង្កេតនេះ មិនមានការដាក់ទោសនរណាម្នាក់ និងមិនមានការប្រកាសអ្វីថ្មីទេ។
អ្នកវិភាគមួយចំនួនបានគិតថា ការលើកឡើងរឿងអ៊ីមែលរបស់លោកស្រី Clinton គឺជាតាកទិករបស់លោក Trump ដើម្បីបង្វែរអារម្មណ៍សាធារណជនពីការរាលដាលជំងឺកូវីដ ១៩ ក្នុងសេតវិមាន និងការរាលដាលជាថ្មីជុំវិញប្រទេស។
យ៉ាងណាមិញការតស៊ូមតិលើកទី២ រវាងលោក Trump និងបេក្ខជនប្រធានាធិបតីបក្សប្រជាធិបតេយ្យលោក Joe Biden ត្រូវបានលុបចោល ដែលជាការប្រុងប្រយ័ត្ននៃការឆ្លងជំងឺ COVID-19៕
