.jpg)
លោក Donald Trump ធ្វើកាយវិការខណៈថ្លែងទៅកាន់អ្នកគាំទ្រ។ AFP
កាលពីថ្ងៃអង្គារ ទី ២២ ធ្នូ ប្រធានាធិបតីសហរដ្ឋអាមេរិកលោក Donald Trump បានរិះគន់កញ្ចប់ថវិកាជំនួយវិបត្តិកូវីដ ១៩ ចំនួន ៩០០ ពាន់លានដុល្លារ ដែលបានអនុម័តដោយបក្សទាំង ២ ក្នុងសភាអាមេរិកកាលពីថ្ងៃចន្ទថា គឺជា «ភាពអាម៉ាស់» ហើយបានទាមទារកាត់បន្ថយការចាយវាយ «ខ្ជះខ្ជាយ និងមិនចាំបាច់» និងបង្កើនដល់ប្រជាជនអាមេរិក។
ក្នុងវីដេអូបង្ហោះទៅកាន់គណនីបណ្ដាញសង្គម Twitter និង Facebook លោក Trump បាននិយាយថា៖ «កាលពីប៉ុន្មានខែមុនសភាបានចាប់ផ្ដើមចរចាលើកញ្ចប់ថ្មី ដើម្បីផ្ដល់ជំនួយបន្ទាន់ដល់ប្រជាជនអាមេរិក។ គេបានចំណាយពេលយ៉ាងយូរ។ ប៉ុន្តែសេចក្ដីព្រាងច្បាប់ដែលពួកគេគ្រោងបញ្ជូនមកតុខ្ញុំ គឺខុសឆ្ងាយពីការរំពឹងទុក។ វា [សេចក្ដីព្រាងច្បាប់] គឺពិតជាភាពអាម៉ាស់មែន»។
លោក Trump បន្តថា៖ «គេហៅវាថា សេចក្ដីព្រាងច្បាប់ជំនួយវិបត្តិកូវីដ ១៩ តែមិនមានអ្វីទាក់ទងនឹងជំនួយកូវីដ ១៩ ទេ»។
លោក Trump បានរិះគន់បទប្បញ្ញត្តិមួយចំនួននៃសេចក្ដីព្រាងច្បាប់នេះ ដែលផ្ដល់ជំនួយដល់បរេទសដូចជា ជំនួយ ៨៥,៥ លានដុល្លារ ដល់កម្ពុជា ជំនួយ ១៣៤ លានដុល្លារ ដល់មីយ៉ាន់ម៉ាជំនួយ ១,៣ ពាន់លានដុល្លារ ដល់អេហ្ស៊ីប ជំនួយ ២៥ លានដុល្លារ ដល់ប៉ាគីស្ថាន និងជំនួយ ៥០៥ លានដុល្លារ ដល់ក្រុមប្រទេសនៅតំបន់អាមេរិកកណ្ដាលជាដើម។ លោក Trump គិតថា ការចាយវាយនេះ គឺ «ខ្ជះខ្ជាយ និងមិនចាំបាច់» ហើយគួរតែដកចេញពីសេចក្ដីព្រាងច្បាប់។
លោក Trump បាននិយាយថា៖ «សភាបានរកឃើញប្រាក់យ៉ាងច្រើនសម្រាប់ប្រទេសបរទេស អ្នកបញ្ចុះបញ្ចូល និងក្រុមមានផលប្រយោជន៍ពិសេស ខណៈពេលដែលបញ្ជូនចំនួនប្រាក់ទាបបំផុតទៅកាន់ប្រជាជនអាមេរិកដែលត្រូវការប្រាក់នេះ។ នេះគឺមិនមែនកំហុសរបស់ពួកគេ [ប្រជាជនអាមេរិក] ទេ គឺជាកំហុសរបស់ចិន។ ខ្ញុំស្នើសុំឱ្យសភាធ្វើវិសោធនកម្មលើសេចក្ដីព្រាងច្បាប់នេះ និងធ្វើការបង្កើនពី ៦០០ ដុល្លារ ដែលទាបមិនគួរឱ្យជឿ ទៅ ២ ០០០ ដុល្លារ ឬ ៤ ០០០ ដុល្លារ សម្រាប់ប្ដីប្រពន្ធ ១ គូ»។
ប្រធានសភាតំណាងរាស្ត្រលោកស្រី Nancy Pelosi ដែលមកពីបក្សប្រជាធិបតេយ្យបានស្វាគមន៍សម្តីរបស់លោក Trump ដោយសារការទាមទារឱ្យបង្កើនប្រាក់ជំនួយដល់ ២ ០០០ ដុល្លារ សម្រាប់មនុស្សម្នាក់របស់លោក Trump គឺដូចជាចំនួនដែលលោកស្រីបានទាមទារក្នុងការចរចាជាមួយបក្សសាធារណរដ្ឋ។
លោកស្រី Pelosi និយាយថា៖ «សមាជិកបក្សសាធារណរដ្ឋបដិសេធម្តងហើយម្តងទៀតមិនបញ្ជេញនូវចំនួនទឹកប្រាក់ដែលប្រធានាធិបតីចង់បានសម្រាប់សែកជំនួយផ្ទាល់។ ទីបំផុតលោកប្រធានាធិបតីបានយល់ព្រមចំនួន ២ ០០០ ដុល្លារ សមាជិកបក្សប្រជាធិបតេយ្យបានត្រៀមខ្លួនរួចជាស្រេច ដើម្បីនាំសំណើនេះមកសភាតំណាងរាស្ត្រក្នុងសប្ដាហ៍នេះ តាមរយៈការយល់ព្រមជាឯកច្ឆន្ទ។ តោះយើងធ្វើ!»។
យ៉ាងណាមិញ មេដឹកនាំបក្សទាំង ២ និងរដ្ឋបាលលោក Trump បានចំណាយពេលជាច្រើនខែដើម្បីចរចាកញ្ចប់ថវិកាជំនួយ ៩០០ ពាន់លាននេះ ដើម្បីផ្ដល់សែក ៣០០ ដុល្លារ ក្នុងមួយសប្តាហ៍ សម្រាប់រយៈពេល ១១ សប្ដាហ៍ដល់ជនគ្មានការងារ និងសែក ៦០០ ដុល្លារសម្រាប់មនុស្សពេញវ័យ និងកុមារនីមួយៗ។
រដ្ឋមន្ត្រីក្រសួងរតនាគារលោក Steve Mnuchin គឺជាអ្នកតំណាងលោក Trump ក្នុងការចរចានេះ ដោយសារសេតវិមានរវល់នឹងការតវ៉ាលទ្ធផលបោះឆ្នោត។ ដើមឡើយសេតវិមានបានគាំទ្រសេចក្ដីព្រាងច្បាប់នេះ តែលោក Trump បានធ្វើការប្រកាសនេះភ្លាមៗ ដែលធ្វើឱ្យមន្ត្រីសេតវិមានភ្ញាក់ផ្អើល។
សម្តីរបស់លោក Trump គឺហាក់ដូចជាលោកចង់វ៉េតូសេចក្ដីព្រាងច្បាប់នេះ បើទោះបីជាលោកមិនបាននិយាយដោយផ្ទាល់ក៏ដោយ។ តែច្បាប់នេះបានអនុម័តដោយសំឡេងភាគច្រើន ៣៥៩-៥៣ ក្នុងសភាតំណាងរាស្ត្រ និង ៩២-៦ ក្នុងព្រឹទ្ធសភា ដែលជាសំឡេងភាគច្រើនមិនអាចវ៉េតូបាន។ គេមិនទាន់ដឹងថា នឹងធ្វើអ្វីបន្តទៀត តែអ្នកវិភាគមួយចំនួនបានប៉ាន់ស្មានថា លោក Trump អាចនឹងមិនព្រមអនុម័តថវិកាជាតិឆ្នាំ ២០២១ ដែលអាចបណ្ដាលឱ្យមានការបិទរដ្ឋាភិបាលម្ដងទៀត។
យ៉ាងណាមិញលោក Trump បានបញ្ចប់ដោយនិយាយថា៖ «បញ្ជូនសេចក្ដីព្រាងច្បាប់សមរម្យឱ្យខ្ញុំ ឬមួយរដ្ឋបាលបន្ទាប់នឹងត្រូវផ្ដល់កញ្ចប់ជំនួយកូវីដ ហើយរដ្ឋបាលនោះ គឺអាចជារដ្ឋបាលខ្ញុំ យើងនឹងសម្រេចវាឱ្យបាន»។
សម្តីចុងក្រោយរបស់លោក Trump គឺបង្ហាញថា លោកនៅតែប្រកាន់យកជំហរថា លោកបានឈ្នះការបោះឆ្នោតឆ្នាំ ២០២០ ហើយបក្សប្រជាធិបតេយ្យបានលួចជ័យជម្នះរបស់លោកតាមរយៈការក្លែងបន្លំការបោះឆ្នោត។ ការតវ៉ារបស់លោកជាង ៤០ ពាក្យបណ្ដឹងត្រូវបានបរាជ័យដោយសារការអះអាងរបស់លោក Trump គឺមិនមានភ័ស្តុតាងច្បាស់លាស់ដែលអាចបញ្ជាក់បាន។
មកដល់ពេលនេះលទ្ធផលនៅរដ្ឋទាំង ៥០ ត្រូវបានបញ្ជាក់ថា ត្រឹមត្រូវទាំងអស់ហើយប្រធានាធិបតីជាប់ឆ្នោតលោក Joe Biden គឺត្រូវបានអង្គបោះឆ្នោតនៃ Electoral College បោះឆ្នោត ៣០៦-២៣២ ឱ្យធ្វើជាប្រធានាធិបតី។ សម័យប្រជុំរួមនៃសភាអាមេរិកនឹងធ្វើការរាប់សំឡេងឆ្នោត Electoral College នៅថ្ងៃទី ៦ ខែ មករា ឆ្នាំ ២០២១ ហើយប្រធានាធិបតីនឹងចូលកាន់តំណែងនៅថ្ងៃទី ២០ ខែមករា៕
