កាលពីថ្ងៃសុក្រ ទី ២៧ ប្រធានាធិបតីសហរដ្ឋអាមេរិកលោក Donald Trump បាននិយាយថា ប្រធានាធិបតីជាប់ឆ្នោតលោក Joe Biden ត្រូវតែបង្ហាញសំឡេងឆ្នោតទាំងអស់ ដែលលោកបានទទួលនៅក្នុងការបោះឆ្នោតថ្ងៃ ៣ វិច្ឆិកា មិនត្រូវ «ទទួលបានដោយខុសច្បាប់» ទើបអាចចូលសេតវិមានបាន។
លោក Trump បានបង្ហោះសារតាមបណ្ដាញសង្គម Twitter ថា៖ «Biden អាចចូលសេតវិមានក្នុងនាមជាប្រធានាធិបតីលុះត្រាតែគាត់អាចបង្ហាញថា ចំនួនសន្លឹកឆ្នោតមិនគួរឱ្យជឿ ៨០ លាន គឺមិនមានការក្លែងបន្លំ ឬទទួលបានដោយខុសច្បាប់។ នៅពេលដែលអ្នកមើលទៅអ្វីដែលបានកើតឡើងនៅទីក្រុង Detroit, Atlanta, Philadelphia, និង Milwaukee គឺមានការក្លែងបន្លំសន្លឹកឆ្នោតយ៉ាងច្រើន គាត់ (Biden) មានបញ្ហាមិនអាចដោះស្រាយបាន!»។
ក្នុងសារបន្ទាប់លោក Trump ក៏បានវាយប្រហារទីក្រុងទាំងនេះថាពុករលួយដោយលោកសរសេរថា៖ «Biden បានលទ្ធផលមិនសូវល្អនៅក្នុងទីក្រុងធំៗ (Politico) លើកលែងតែទីក្រុង Detroit (សំឡេងឆ្នោតច្រើនជាងចំនួនប្រជាជន!), Philadelphia, Atlanta, និង Milwaukee ដែលគាត់ត្រូវតែឈ្នះ។ គ្មានអ្វីគួរឱ្យភ្ញាក់ផ្អើលទេដែលទីក្រុងទាំងអស់នេះ ស្ថិតនៅក្នុងរដ្ឋដែលសំខាន់ៗបំផុត ហើយត្រូវបានគេស្គាល់ជាយូរមកហើយថាពុករលួយ!»។
សាររបស់លោក Trump គឺក្នុងចំណោមការអត្ថាធិប្បាយចុងក្រោយបំផុតរបស់លោកដើម្បីធ្វើឱ្យមានការមិនទុកចិត្តលើភាពត្រឹមត្រូវនៃការបោះឆ្នោតប្រធានាធិបតីឆ្នាំ ២០២០ ដែលលោកបានជំទាស់លទ្ធផលនៅរដ្ឋសំខាន់ៗមួយចំនួនដែលលោកបានចាញ់ជាពិសេសរដ្ឋPennsylvania ដោយបានចោទប្រកាន់ថា មានការលួចបន្លំអ្នកបោះឆ្នោត (ស្លាប់ ឬជនអន្តោប្រវេសន៍ខុសច្បាប់ ឬអ្នកបោះឆ្នោតម្នាក់បោះឆ្នោតច្រើនដង។ល។) និងការបន្លំសន្លឹកឆ្នោតផ្ញើតាមប្រអប់សំបុត្រ។
ការប្ដឹងរារាំងការបញ្ជាក់លទ្ធផលបោះឆ្នោតរបស់លោក Trump នៅរដ្ឋ Arizona, Georgia, Michigan, Nevada, និង Pennsylvania ភាគច្រើនបានទទួលបរាជ័យ។ កាលពីថ្ងៃសុក្រ តុលាការឧទ្ធរណ៍នៅរដ្ឋ Pennsylvania បានច្រានចោលពាក្យបណ្ដឹងលោក Trump ដោយតុលាការបានសរសេរក្នុងការសម្រេចរបស់ពួកគេថា៖ «អ្នកបោះឆ្នោតមិនមែនមេធាវីទេដែលជាអ្នកជ្រើសរើសប្រធានាធិបតី។ សន្លឹកឆ្នោតមិនមែនពាក្យបណ្ដឹងទេ ដែលសម្រេចការបោះឆ្នោត»។
នៅឯរដ្ឋ Wisconsin វិញការរាប់សន្លឹកឆ្នោតឡើងវិញ បានប្រព្រឹត្តរួចរាល់អស់ ដោយលទ្ធផលគឺនៅតែលោក Biden ទទួលជ័យជម្នះ។ ក្រុមលោក Trump បានទាមទារការរាប់សាឡើងវិញនេះ និងបានបង់ប្រាក់អស់ ៣ លានដុល្លារ ដោយសង្ឃឹមថា នឹងពិនិត្យរកសន្លឹកឆ្នោតណាដែលមានកំហុស និងធ្វើការតវ៉ាសន្លឹកឆ្នោតទាំងនោះ ក្នុងបំណងកាត់បន្ថយចំនួនសន្លឹកឆ្នោតលោក Biden។
កាលពីល្ងាចថ្ងៃព្រហស្បតិ៍ ទី ២៦ វិច្ឆិកា លោក Trump បានប្រាប់អ្នកសារព័ត៌មានថា លោកនឹងចាកចេញពីសេតវិមានបើសិនអង្គបោះឆ្នោតនៃ Electoral College ទទួលស្គាល់ជ័យជម្នះរបស់លោក Biden។ មកដល់ពេលនេះ លោក Biden ត្រូវបានគេសន្មតថា បានទទួលអង្គបោះឆ្នោតចំនួន ៣០៦ គ្រប់គ្រាន់ចំនួន ២៧០ ដែលត្រូវការក្នុងការទទួលជ័យជម្នះក្នុងកិច្ចប្រជុំ Electoral College ធៀបនឹង ២៣២ របស់លោក Trump។
បើទោះជាយ៉ាងនេះក៏ដោយ ក្រុមមេធាវីរបស់លោក Trump នៅតែបន្តតវ៉ាលទ្ធផលបោះឆ្នោត ដែលពួកគេបង្ហាញថា នឹងបន្តរហូតដល់តុលាការកំពូលអាមេរិក៕