.jpg)
លោកប្រធានាធិបតី ដូណាល់ ត្រាំ។ AFP
មន្ត្រីស៊ីវិលមួយចំនួន ដែលមានតំណែងជាថ្នាក់ដឹកនាំជាន់ខ្ពស់នៅក្រសួងការពារជាតិអាមេរិក ត្រូវបានបញ្ឈប់ការងារ ឬលាលែងដោយមិនដឹងពីមូលហេតុ ហើយត្រូវបានជំនួសដោយបុគ្គលជំនិតរបស់លោក Trump ធ្វើឱ្យកើនឡើងនូវការព្រួយបារម្ភ ខណៈពេលដែលប្រធានាធិបតីរូបនេះនៅតែមិនទទួលស្គាល់លទ្ធផលនៃការបោះឆ្នោត។
កាលពីថ្ងៃចន្ទទី ៩ ខែវិច្ឆិកា លោក Trump បានបញ្ឈប់ការងាររដ្ឋមន្ត្រីក្រសួងការពារជាតិលោក Mark Esper ដោយមិនបានបញ្ជាក់ពីមូល-ហេតុនៃការបណ្ដេញចេញនេះ។ នៅពាក់កណ្ដាលឆ្នាំ ២០២០ នេះ លោក Esper បានប៉ះទង្គិចជាមួយលោក Trump ដោយលោក Esperបានប្រឆាំងនឹងគោលបំណងរបស់លោក Trump ក្នុងការដាក់ពង្រាយកងយោធា ដើម្បីបង្ក្រាបការធ្វើបាតុកម្ម តវ៉ាប្រឆាំងការសម្លាប់ជនជាតិអាមេរិកស្បែកខ្មៅលោក George Floyd។
មួយថ្ងៃក្រោយការបណ្ដេញចេញលោក Esper នាយកខុទ្ទកាល័យរដ្ឋមន្ត្រីក្រសួងការពារជាតិ លោកស្រី Jen Steward រដ្ឋលេខាធិការក្រសួងការពារជាតិស្ដីទី ទទួលបន្ទុករៀបចំគោលនយោបាយរបស់លោក James Andersen និងរដ្ឋលេខាធិការក្រសួងការពារជាតិទទួលបន្ទុកចារកម្ម និងសន្តិសុខ លោក Joseph Kernan បានលាលែងពីតំណែង ដោយមិនដឹងថា ពួកគេលាលែងដោយស្ម័គ្រចិត្ត ឬត្រូវបានគេបង្ខំ។
នាយកមជ្ឈមណ្ឌលជាតិប្រឆាំងភេរវកម្មលោក Christopher Millerបានឡើងធ្វើរដ្ឋមន្ត្រីក្រសួងការពារជាតិស្ដីទី។ លោក Anthony Tata ដែលជាអតីតឧត្ដមសេនីយ៍ត្រី ១ រូប និងជាអតីតអ្នកវិភាគអភិរក្សនិយមប្រចាំប៉ុស្តិ៍ទូរទស្សន៍ Fox News នឹងឡើងជំនួសលោក Andersen។ លោក Ezra Cohen Watnick ដែលជាអតីតបុគ្គលិកនៃក្រុមប្រឹក្សាសន្តិសុខជាតិរបស់សេតវិមាន លោក Trump នឹងឡើងជំនួសលោក Kernan។
លោកKash Petal ក៏ជាអតីតបុគ្គលិកនៃក្រុមប្រឹក្សាសន្តិសុខជាតិរបស់សេតវិមាន Trump នឹងឡើងជំនួសលោកស្រី Steward។ បុរសទាំង ៣ ចុងក្រោយនេះ គឺត្រូវបានគេគិតថា មានភាពស្មោះស្ម័គ្រទៅកាន់លោក Trump យ៉ាងខ្លាំង ហើយជាពិសេសលោក Cohen Watnick និងលោក Petal ដែលបានចូលរួមសកម្មភាពការពារលោក Trump និងវាយប្រហារ FBI ក្នុងការស៊ើបអង្កេតការលូកដៃរបស់រុស្ស៊ីនៅក្នុងការបោះឆ្នោតឆ្នាំ ២០១៦។
សមាជិកសភាតំណាងរាស្ត្រមកពីបក្សប្រជាធិបតេយ្យ លោក Adam Smith ដែលជាប្រធានគណៈកម្មការកងប្រដាប់អាវុធ នៃសភាតំណាងរាស្ត្រ បានថ្កោលទោសការផ្លាស់ប្ដូរនេះ ក្នុងសេចក្ដីថ្លែងការណ៍មួយថា៖ «វាពិបាកក្នុងការនិយាយហួសកម្រិត ថាតើមានគ្រោះថ្នាក់យ៉ាងណាក្នុងការផ្លាស់ប្ដូរថ្នាក់ដឹកនាំជាន់ខ្ពស់នៃក្រសួងការពារជាតិ ខណៈពេលដែលកំពុងមានការផ្ទេរអំណាចប្រធានាធិបតី»។
លោកបន្តទៀតថា៖ «ប្រសិនបើនេះជាការចាប់ផ្ដើមនៃទំនោរមួយថ្មី ដែលលោកប្រធានាធិបតីអាចនឹងបណ្ដេញចេញ ឬបង្ខំឱ្យអ្នកជំនាញសន្តិសុខជាតិលាលែង ដើម្បីជំនួសដោយបុគ្គលដែលយល់ថា មានភាពស្មោះស្ម័គ្រនឹងលោកនោះ រយៈពេល ៧០ ថ្ងៃខាងមុខ គឺមានគ្រោះថ្នាក់បំផុត»។
គេមិនបានដឹងថា ហេតុអ្វីបានជាលោក Trump ធ្វើឱ្យរង្គោះរង្គើថ្នាក់ដឹកនាំមន្ទីរបញ្ចកោណ ក្រោយពីការប្រកាសជ័យជម្នះលោក Biden រយៈពេលប៉ុន្មានថ្ងៃនោះទេ។ កង្វះហេតុផលបានធ្វើឲ្យកើនឡើងការសង្ស័យទៅលើសកម្មភាពលោក Trump។ អ្នកវិភាគមួយចំនួនបានគិតថា លោក Trump ធ្វើបែបនេះ គឺដើម្បីធ្វើឱ្យដំណើរការផ្ទេរអំណាចរបស់លោក Biden កាន់តែពិបាក។ អ្នកវិភាគផ្សេងទៀតបានគិតថា អ្នកជំនិតលោក Trump គឺកំពុង «ត្បុរ» ចូលតំណែងសំខាន់ៗ ដែលលោក Biden ពិបាកនឹងដកចេញ ពេលដែលលោកចូលកាន់តំណែងរហូតដល់អ្នកខ្លះគិតថា លោក Trump គឺកំពុងរៀបចំធ្វើរដ្ឋប្រហារ។
ទស្សនាវដ្ដី The Atlantic បានលើកឡើងកាលពីមុនការបោះឆ្នោតថា លោក Trump អាចធ្វើរដ្ឋប្រហារបានតាមរយៈការប្រើប្រាស់ច្បាប់ Insurrection Act ធ្វើការប្រកាសអាសន្ននៅរដ្ឋ Swing State មួយចំនួន ហើយបញ្ជូនទាហានចូលទៅរដ្ឋទាំងនោះ។
តែការប្រកាសអាសន្ន និងការដាក់ពង្រាយទាហានតាមរយៈការប្រើប្រាស់ច្បាប់ Insurrection Act គឺអាចធ្វើឡើងលុះត្រាតែមានភាពចលាចល និងអសន្តិសុខយ៉ាងខ្លាំងនៅរដ្ឋទាំងនេះ ដែលមិនអាចទប់ស្កាត់បានដោយអាជ្ញាធររបស់រដ្ឋ។ មកដល់ពេលនេះមិនមានភាពចលាចល ឬអសន្តិសុខខ្លាំងនោះទេ ដូច្នេះការដាក់ពង្រាយទាហាន គឺមិនអាចធ្វើបាន ហើយអ្នកវិភាគមួយចំនួនគិតថា ទាហានភាគច្រើននឹងមិនស្ដាប់បញ្ជារបស់លោក Trump ឱ្យធ្វើរដ្ឋប្រហារនោះទេ។
យ៉ាងណាមិញ ការបណ្ដេញចេញលោក Esper និងថ្នាក់ដឹកនាំជាន់ខ្ពស់ផ្សេងៗទៀត ក៏អាចគ្រាន់តែជាជម្លោះគោលនយោបាយប៉ុណ្ណោះ ដោយសារលោក Esper បានប្រឆាំងការដកទ័ពពីតំបន់មជ្ឈិមបូព៌ា តែលោក Trump បានសន្យាទៅអ្នកគាំទ្រថា លោកនឹងដកទាហានឱ្យអស់មុនថ្ងៃបុណ្យណូអែល។ ប៉ុន្តែអ្វីៗទាំងអស់នេះ គឺគ្រាន់តែជាការសន្និដ្ឋានរបស់អ្នកវិភាគប៉ុណ្ណោះ ដោយហេតុផល និងគោលបំណងពិតរបស់លោក Trump គឺមិនទាន់ដឹងនៅឡើយ៕
