The Phnom Penh Post Search

Search form




Logo of Phnom Penh Post newspaper Phnom Penh Post - វិបត្តិកូវីដ​នៅ​ឥណ្ឌា​៖ ការ​ពន្យារការ​​ផ្គត់​ផ្គង់​វ៉ាក់សាំង ​នឹង​​ធ្វើ​ឱ្យ​ប៉ះពាល់​ដ​ល់​​គម្រោង​វ៉ាក់សាំង​​សាកល​ COVAX

វិបត្តិកូវីដ​នៅ​ឥណ្ឌា​៖ ការ​ពន្យារការ​​ផ្គត់​ផ្គង់​វ៉ាក់សាំង ​នឹង​​ធ្វើ​ឱ្យ​ប៉ះពាល់​ដ​ល់​​គម្រោង​វ៉ាក់សាំង​​សាកល​ COVAX

Content image - Phnom Penh Post
ប្រធានអង្គការ UNICEF លោក Henrietta H. Fore។ AFP

វិបត្តិកូវីដ​នៅ​ឥណ្ឌា​៖ ការ​ពន្យារការ​​ផ្គត់​ផ្គង់​វ៉ាក់សាំង ​នឹង​​ធ្វើ​ឱ្យ​ប៉ះពាល់​ដ​ល់​​គម្រោង​វ៉ាក់សាំង​​សាកល​ COVAX

ប្រភពពី​រដ្ឋាភិបាលចំនួន ៣ ​បាន​ឱ្យ​ដឹងថា​ ប្រទេស​ឥណ្ឌា​ ទំនង​ជា​មិនអាច​ផលិត​ ដើម្បី​នាំចេញ​វ៉ាក់សាំង​កូវីដ ១៩ រហូតដល់​ខែតុលា ព្រោះត្រូវ​បំពេញ​តម្រូវ​ការ​ក្នុង​ស្រុក​ ដែល​ការពន្យារ​នេះ​ អាច​នឹង​ធ្វើឱ្យ​មាន​ក​ង្វះខាត​ការផ្គត់​ផ្គង់កាន់តែ​ធ្ងន់ធ្ង​រដល់​គម្រោង​វ៉ាក់​សាំង​ជំងឺ​កូវី​ដ ១៩​ សកល COVAX។

វិទ្យាស្ថានសេរ៉ូមប្រទេសឥណ្ឌា (SII) ដែល​ជាអ្នកផ្គត់ផ្គង់ធំជាងគេ​បំផុត​ដល់គម្រោងវ៉ាក់​សាំង COVAX​ បាន​បញ្ឍប់​ការ​នាំ​ចេញ​របស់​ខ្លួន​តាំង​ពី​ខែ​មីនា​មក​ម្ល៉េះ​ បណ្ដាល​ឱ្យ​​​ប៉ះពាល់​ដល់​ការ​ផ្គត់​ផ្គង់​ប្រទេស​​បង់ក្លាដែស នេប៉ាល់ ស្រីលង្កា និងប្រទេសជាច្រើននៅទ្វីបអាហ្វ្រិក​ផងដែរ​។

កាលពីថ្ងៃចន្ទ កន្លងទៅ ​អង្គការសុខភាពពិភពលោក (WHO) ដែល​​ជាសហ​​ដឹកនាំ​គម្រោង​វ៉ាក់សាំង​នេះ ក៏​បាន​អំពាវ​នាវ​ដល់​អ្នកផលិតវ៉ាក់សាំងនៅខាងក្រៅប្រទេសឥណ្ឌា​ ពន្លឿន​ការ​ផលិត​ ដើម្បី​ផ្គត់ផ្គង់​ដល់​កម្មវិធី​នេះ​ឱ្យ​បាន ដោយសា​រ​កង្វះ​ការ​ផ្គត់​ផ្គង់​វ៉ាក់​សាំង​នៅ​​ប្រទេសអាស៊ីខាងត្បូង​។

ដោយ​ឡែក​សម្រាប់​ មេដឹក​នាំ​នៃ​ក្រុម​ប្រទេស​មហា​អំណាច​ឧស្សាហកម្ម​ទាំង ៧ (G7) និងរដ្ឋសហភាព​អ៊ឺរ៉ុប​ក៏ត្រូវ​តែ​ចូល​រួម​បរិច្ចាគ​ដូស​របស់​ពួកគេ​ឱ្យ​គម្រោង​នេះ​ផងដែរ ដោយ​សេ​ចក្ដី​សម្រេច​នេះ​ នឹង​ធ្វើ​ឡើង​នៅ​ចក្រ​ភពអង់​គ្លេសនា​ខែ​ក្រោយ​។

ប្រភពអនាមិក​ប្រាប់​សារព័ត៌មាន Reuters ក្នុង​កិច្ច​សម្ភាសន៍​ផ្ដាច់​មុខ​មួយ​ថា ឥឡូវ​នេះ​ប្រទេស​ឥណ្ឌា ​កំពុង​ផ្ដល់អាទិភាព​ដល់​ការ​ចាក់វ៉ាក់សាំង​នៅ​ប្រទេសខ្លួន​សិន​ ខណៈ​ករណី​ឆ្លង​កើន​ដល់​ប្រមាណ​ ២៥ លាន​នាក់​ហើយ ដោយ​ចំនួន​មនុស្ស​​ស្លាប់ប្រចាំថ្ងៃ ក៏​​កើនឡើងក្នុង​កម្រិតខ្ពស់​ ១ ​ដែរ​។

ប្រភព​មួយ​ក្នុងចំណោមប្រភព​អនាមិក​ដទៃ​ទៀត​បាន​ឱ្យ​ដឹង​ថា៖ «​យើង​មិនចង់​ចែក​វ៉ាក់​សាំង​ទៅ​ប្រទេស​ណា​ ដែល​យើង​​មិន​មានកាត​ព្វ​កិច្ច​ចែក​ឡើយ​។ ពួក​យើងបានធ្វើ​កិច្ច​ពិភាក្សាផ្ទៃក្នុង​មួយ​ ដោយ​មើល​ឃើញ​​ថា​​ប្រទេសខ្លះ​យើ​ងត្រូវ​ស្នើ​ឱ្យ​គេ​កុំ​រំពឹង​ទុក​ការ​ផ្គត់​ផ្គង់​វ៉ាក់សាំង​ពីប្រទេស​យើង​អី ព្រោះ​ដោយ​សារតែ​ស្ថាន​ភាពឥណ្ឌាបច្ចុប្បន្ន​»។

យ៉ាងណាមិញ ប្រភព​នេះ​មិន​បាន​​បញ្ជាក់ឈ្មោះប្រទេស​ ដែល​ខ្លួន​ស្នើ​ចង់​ឱ្យ​ពន្យា​រនោះទេ​។

វិទ្យាស្ថាន​សេរ៉ូម​ឥណ្ឌា ត្រូវ​ផ្គត់​ផ្គង់​វ៉ាក់សាំង​ដល់​គម្រោង​ COVAX ចំនួន​ ២ ពាន់​លាន​ដូស​ក្នុង​ឆ្នាំនេះ​ ប៉ុន្តែ​ត្រូវ​ផ្អាក​ការ​នាំ​ចេញ​ខ្លួន​តាំងពីខែ​មីនា​ មក​ម៉្លេះ​​។ ការ​ផ្អាក​ការ​នាំ​ចេញ​នេះ ត្រូវ​បាន​គេ​រំពឹង​ទុក​ថា ​នឹង​បង្ក​ឱ្យ​មាន​កង្វះ​វ៉ាក់​សាំង​ដល់​ទៅ​​ ១៩០ លានដូសនៅចុងខែមិថុនា។

វិទ្យាស្ថានសេរ៉ូមប្រទេសឥណ្ឌា (SII) ​បាន​ឱ្យ​ដឹងថា​ បច្ចុប្បន្ន​វិទ្យាស្ថាន​នេះ កំពុង​ផ្ដោតលើ​បញ្ហាវ៉ាក់សាំង​នៅប្រទេស​ឥណ្ឌា​សិន​ ដោយ​កាល​នោះ​គេ​ធ្លាប់​រំពឹងថា​ ប្រទេស​នេះ​នឹងចាប់ផ្តើមផ្គត់​ផ្គង់វ៉ាក់សាំង​ដល់​​ប្រទេស​នានា​​ឡើង​វិញ​ចាប់​ពីខែ​ មិថុនា​ទៅ​។

ទាក់​ទិន​នឹង​ការ​កំណត់​ពេលវេលា​នៃ​ការ​នាំ​ចេញ​វ៉ាក់សាំង​នៅ​ខែតុលាសម្ព័ន្ធវ៉ាក់សាំងGAVI ដែល​សហ​ដឹក​នាំ​គម្រោង​ COVAX ដែរ​នោះ ​បាន​ប្រាប់សារព័ត៌មាន​ Reuter ថា គេ​រំពឹង​ទុក​ថា​ វិទ្យាស្ថានសេរ៉ូម​នឹង​នាំ​ចេញ​វ៉ាក់សាំង​យ៉ាងហោច​ ១៤០ លាន​ដូស​ នៅចុងខែ​ ឧសភា។

គម្រោង​វ៉ាក់សាំង ​COVAX បាន​ចុះ​កិច្ច​ព្រមព្រៀង​ជាមួយវិទ្យាស្ថាន​សេរ៉ូម​ឥណ្ឌា​ ដើម្បី​ចែកចាយ​រវាង​វ៉ាក់​សាំង​​ AstraZeneca ឬវ៉ាក់សាំង ​Novavax ចំនួន ១,១ ពាន់​លាន​ដូស​។ យ៉ាងណាមិញ ប្រធាន​អង្គការ​ UNICEF កាលពីថ្ងៃចន្ទ បានស្នើឱ្យ​ប្រទេស ​G7 ផ្គត់ផ្គង់​វ៉ាក់សាំង​ទៅឱ្យគម្រោង​ COVAX ដែល​ជាវិធាន​ការ​​បន្ទាន់​ ដើម្បី​ដោះស្រាយកង្វះខាត​ធ្ងន់ធ្ងរ​ ដែល​បណ្តាល​មក​ពីវិបត្តិ​នៅ​ប្រទេស​ឥណ្ឌា​។ បច្ចុប្បន្ន​ អង្គការ​នេះ ក៏​កំពុង​ជួយផ្គ​ត់ផ្គង់វ៉ាក់សាំងកូវីដ ១៩ តាម​រយៈ​គម្រោង​ COVAX ប្រមាណ ១៩០ លាន​ដូស​នៅ​ចុង​ខែមិថុនា។

ទិន្នន័យ​ពី​អង្គការ Unicef បាន​ឱ្យ​ដឹងថា​ បើ​ប្រទេស​ខាង​លើ​សហការ​​គ្នា នោះពួកគេ​នឹង​​អាច​ផ្គត់​ផ្គង់​បាន​ប្រហែល​ ១៥៣ លានដូស​ ហើយ​ជាមួយ​គ្នា​នេះ​ ប្រទេស​ទាំង​នេះ​ក៏​នៅ​តែ​អាច​ផ្គត់​ផ្គង់​វ៉ាក់​សាំងដល់​​ប្រជាជ​​នខ្លួន​គ្រប់​គ្រាន់ជានិច្ច​។

ប្រធានអង្គការសុខភាពពិភពលោក​ TedrosAdhanom Ghebreyesus បាន​ឱ្យ​ដឹង​ថា វិទ្យាស្ថាន​សេរ៉ូម​ឥណ្ឌា​ ត្រូវ​តែ​ត្រឡប់​មក​ផលិត​ និង​ធ្វើ​យ៉ាង​ណា​បំពេញ​តម្រូវ​ការ​ផ្គត់​ផ្គង់​ឱ្យ​ទាន់​ពេល​វេលា​ទៅ​តាម​ការ​សន្យា​ជាមួយ​គម្រោង​ COVAX ក្នុង​ការ​ផ្គត់​ផ្គង់​វ៉ាក់​សាំង​ដល់​ប្រទេ​ស​ជុំ​វិញ​ពិភព​លោក​។

លោកស្រី Henrietta H. Fore ប្រធាន​អង្គការ​ UNICEF បានថ្លែង​ថា ​ទាក់​ទិន​នឹង​​ហានិភ័យនៃ​ការ​មិន​បាន​ផ្គត់​ផ្គង់​វ៉ាក់​សាំង​ទៅ​តាម​តម្រូវ​ការ​ និង​ពេលវេលា​ ដែល​នេះ​ អាច​បណ្ដាល​ឱ្យប៉ះពាល់​ដល់​​ប្រទេស​ប្រាក់​ចំណូលទាប​ និងមធ្យម​ ដោយគ្មា​នលទ្ធភាពទទួលបាន​វ៉ាក់សាំង ការ​ធ្វើ​តេស្ត និងការព្យាបាល​ត្រឹម​ត្រូវ​។

គួរបញ្ជាក់​ផងដែរថា ចំនួន​ករណី​ឆ្លង​ថ្មី​នៅ​ប្រទេសឥណ្ឌា ​កាលពីថ្ងៃច័ន្ទ កន្លងទៅ​ មាន​ការ​ធ្លាក់​ចុះ​បន្តិច​ បើទោះជា​​ចំនួនអ្នកស្លាប់ប្រចាំថ្ងៃនៅ​តែមាន​លើសពី ៤ ០០០ នាក់​ក៏ដោយ។ ប៉ុន្តែ​ ​អ្នកជំនាញ​ បាន​និយាយ​ថា​ចំនួន​នេះ​ជា​ចំនួន​ ដែល​មិនអាចជឿទុកចិត្តបាន​ ដោយសា​រ​កង្វះការធ្វើតេស្ត​នៅ​តាមតំបន់​ជនបទ​ទូទាំងប្រទេស​៕

អត្ថបទគួរចាប់អារម្មណ៍