ក្រុងហាណូយៈ វៀតណាមបានចោទប្រកាន់ប្រទេស ចិន ពីបទចូលទៅក្នុងតំបន់ហាមឃាត់ និងបានទាមទារឲ្យនាវាល្បាតចិននៅក្នុងសមុទ្រខាងត្បូង ដកចេញពីដែនដីដែលមានជម្លោះនោះ។
ប្រទេសទាំង ២ នេះ បានជាប់នៅក្នុងភាពចម្រូងចម្រាសជាយូរមកហើយជុំវិញដែនទឹកសម្បូរដោយធនធាន ដោយប្រទេស ចិន អះអាងទាមទារយកតំបន់ដែនទឹកនោះស្ទើរតែទាំងអស់។
ប៉ុន្តែសហគមន៍អន្តរជាតិ បានគំាទ្រអ្នកទាមទារដទៃមានដូចជាប្រទេស វៀតណាម ហ្វីលីពីន ឥណ្ឌូនេស៊ី ម៉ាឡេស៊ី កោះតៃវ៉ាន់ ប្រ៊ុយណេ ដោយបានលើកឡើងពីសារៈសំខាន់នៃការធ្វើនាវាចរណ៍នៅក្នុងដែនទឹកដែលមានជម្លោះនោះ។
កាលពីថ្ងៃសុក្រ ក្រសួងការបរទេសវៀតណាម បានរិះគន់នាវាល្បាតចិន Haiyang Dizhi 8 និងនាវាអមការពារជាច្រើនគ្រឿងទៀតចំពោះការចូលដែនទឹករបស់ខ្លួនក្នុងប៉ុន្មានថ្ងៃថ្មីៗនេះ ថ្វីបើមិនបានផ្តល់កាលបរិច្ឆេទជាក់លាក់ក្តី។
សេចក្តីថ្លែងការណ៍មួយបានឲ្យដឹងថា៖ «នាវានោះ ស្ថិតនៅក្នុងតំបន់សមុទ្រនៃប្រទេស វៀតណាម ដោយបានបន្ថែមថា ពួកគេបានទំនាក់ទំនងជាមួយចិនច្រើនលើកច្រើនសាហើយតាមផ្លូវការទូត»។
«ប្រទេស វៀតណាម បានស្នើឲ្យពួកគេដកនាវាទាំងនោះចេញពីដែនទឹករបស់ខ្លួន និងគោរពអធិបតេយ្យភាពរបស់ខ្លួន»។
ខណៈដែលចិនបានអះអាងពីវត្តមានរបស់នាវានោះនៅក្នុងសមុទ្រចិនខាងត្បូងអ្នកនាំពាក្យក្រសួងការបរទេសបានថ្លែងថា ពួកគេសង្ឃឹមថា វៀតណាមពិតជាអាចគោរពដែនសមត្ថកិច្ចរបស់ចិននៅតំបន់នោះ។
លោក Geng Shuang អ្នកនាំពាក្យក្រសួងការបរទេសចិន បានថ្លែងថា៖ «យើងសង្ឃឹមថា ភាគីវៀតណាមអាចចៀសវាងចំណាត់ការណាមួយដែលធ្វើឲ្យស្ថានការណ៍កាន់តែស្មុគស្មាញថែមទៀត»៕ AFP/PSA