កាលពីថ្ងៃព្រហស្បតិ៍ ទី ៨ ខែមេសា រដ្ឋមន្រ្តីក្រសួងសុខាភិបាលឥណ្ឌូណេស៊ីបាននិយាយថា វ៉ាក់សាំងកូវីដ ១៩ របស់ AstraZeneca ប្រហែល ១០០ លានដូស អាចប្រឈមនឹងការពន្យារពេលក្នុងការដឹកជញ្ជូនមកប្រទេសឥណ្ឌូនេស៊ី ដោយសារការរឹតត្បឹតនៃការដឹកជញ្ចូនមកពីប្រទេសឥណ្ឌា។
រដ្ឋមន្រ្តីក្រសួងសុខាភិបាលលោក Budi GunadiSadikin បាននិយាយនៅក្នុងអង្គប្រជុំសភាថាឥណ្ឌូណេស៊ីនឹងទទួលវ៉ាក់សាំង AstraZeneca ចំនួន ២០ លានដូសតាមរយៈកិច្ចព្រមព្រៀងទ្វេភាគីក្នុងឆ្នាំ ២០២១ ខណៈការឯកភាពដំបូងគឺមានចំនួន ៥០ លានដូស។ លោកបាននិយាយបន្ថែមថា ចំណែកវ៉ាក់សាំងចំនួន ៣០ លានដូសនោះនឹងត្រូវដឹកជញ្ជូននៅត្រីមាសទី២ នៅឆ្នាំ ២០២២។
បន្ទាប់ពីលើកឡើងពីការពន្យារពេលនូវការដឹកជញ្ជូន លោកក៏បានបន្ថែមពីការដែលធ្វើការពន្យារពេលនេះអាចបង្កជាបញ្ហាដែលអាចរារាំងយុទ្ធនាការចាក់វ៉ាក់សាំងក្នុងប្រទេសផងដែរ។ ក្រៅពី AstraZeneca តាមគម្រោង COVAX របស់អង្គការសហប្រជាជាតិប្រទេសឥណ្ឌូនេស៊ី ពឹងលើវ៉ាក់សាំងដែលផលិតដោយក្រុមហ៊ុន Sinovac Biotech ក្នុងការចែកចាយវ៉ាក់សាំងដែលចាប់ផ្តើមកាលពីខែមករាមក៕