.jpg)
ក្រុមផលិតឱសថអង់គ្លេស AstraZeneca កាលពីថ្ងៃសៅរ៍ ទី ៦ កុម្ភៈ បានប្រកាសថា វ៉ាក់សាំងជំងឺកូវីដ ១៩ របស់ខ្លួនដែលបង្កើតជាមួយសាកលវិទ្យាល័យ Oxford គឺហាក់ដូចជាផ្តល់ការការពារតិចតួចចំពោះវ៉ារ្យង់វីរុសកូរ៉ូណារកឃើញនៅអាហ្វ្រិកខាងត្បូង ដោយផ្អែកលើទិន្នន័យបឋមពីការសាកល្បង។
បើយោងតាមការរាយការណ៍របស់កាសែត Financial Times ចេញផ្សាយនៅព្រឹកថ្ងៃដដែល ការសិក្សាពីសាកលវិទ្យាល័យអាហ្វ្រិកខាងត្បូង Witwatersrand និងសាកលវិទ្យាល័យ Oxford បានបង្ហាញថា វ៉ាក់សាំងនេះមានការថយប្រសិទ្ធភាពប្រឆាំងនឹងវ៉ារ្យង់អាហ្វ្រិកខាងត្បូងនេះ តែគ្មានអ្នកចូលរួមក្នុងការសាកល្បងជាង ២ ០០០ នាក់ ត្រូវបានបញ្ជូនទៅកាន់មន្ទីរពេទ្យ ឬស្លាប់ទេ។
ក្នុងចំណោមវ៉ារ្យង់វីរុសកូរ៉ូណាបច្ចុប្បន្ន អ្នកវិទ្យាសាស្ត្រមានការព្រួយបារម្ភចំពោះវ៉ារ្យង់ចំនួន ៣ ផ្សេងគ្នា ដែលត្រូវបានរកឃើញនៅអង់គ្លេស ប្រេស៊ីល និងអាហ្វ្រិកខាងត្បូង ដោយសារវ៉ារ្យង់ទាំងនេះ គឺមានលក្ខណៈងាយឆ្លងជាងមុន៕
