ក្រុងឌូបៃ៖ អង្គការលើកលែងទោសអន្តរជាតិ (Amnesty International) បានព្រមាននៅក្នុងរបាយការណ៍មួយ កាលពីថ្ងៃអង្គារថា សង្គ្រាមដែលបានបំផ្លិចបំផ្លាញប្រទេស យេម៉ែន នោះ បានធ្វើឲ្យប៉ះពាល់យ៉ាងធ្ងន់ធ្ងរដល់ប្រជាជន ៤,៥ លាននាក់ ដែលរស់នៅជាមួយនឹងពិការភាព។
ក្រុមសិទ្ធិមនុស្សមានមូលដ្ឋាននៅក្រុងឡុងដ៍ បានអំពាវនាវដល់ក្រុមម្ចាស់ជំនួយ ក្រុមអ្នកផ្តល់ជំនួយ និងបណ្តាទីភ្នាក់ងារអង្គការសហប្រជាជាតិឲ្យចាត់វិធានការ ដើម្បីជួយប្រជាជនដែលពិការនៅក្នុងមជ្ឈមណ្ឌលជនភៀសខ្លួន។
លោក Rawya Rageh ទីប្រឹក្សាជាន់ខ្ពស់ផ្នែកវិបត្តិនៅអង្គការលើកលែងទោសអន្តរជាតិបានថ្លែងថា៖ «សង្គ្រាមនៅយេម៉ែន ត្រូវបានពិពណ៌នាថា មានការវាយប្រហារគ្រាប់បែកខុសច្បាប់ ជម្លៀសប្រជាជន និងខ្វះខាតសេវាមូលដ្ឋានផ្សេងៗដោយបណ្តាលឲ្យប្រជាជនប្រឹងប្រែងតស៊ូដើម្បីរស់»។
ការឆ្លើយតបតាមលក្ខណៈមនុស្សធម៌ត្រូវពង្រីកកាន់តែធំឡើង ប៉ុន្តែប្រជាជនដែលពិការ ដែលស្ថិតនៅក្នុងចំណោមមនុស្សភាគច្រើនដែលប្រឈមនឹងគ្រោះថ្នាក់នៅក្នុងជម្លោះប្រដាប់អាវុធ មិនគួរប្រឈមនឹងឧបសគ្គធំៗជាងនេះ ដើម្បីទទួលបានជំនួយសំខាន់ៗនោះទេ។
ជម្លោះរវាងកងកម្លាំងរដ្ឋាភិបាលគាំទ្រដោយអារ៉ាប៊ី សាអ៊ូឌីត និងក្រុមឧទ្ទាមហូធីគាំទ្រដោយអ៊ីរ៉ង់ បានអូសបន្លាយចាប់តាំងពីឆ្នាំ ២០១៥ ដោយបានបង្កឲ្យមានអ្វីដែលអង្គការសហប្រជាជាតិចាត់ទុកថា ជាវិបត្តិមនុស្សអាក្រក់បំផុតនៅក្នុងពិភពលោក។
អង្គការលើកលែងទោសនោះបានរាយការណ៍ថា មនុស្សជាច្រើនដែលពិការដែលត្រូវបានបង្ខំឲ្យភៀសខ្លួនចេញពីអំពើហិង្សាត្រូវតែប្រើឈើច្រត់ ឬរទេះរុញនៅក្នុងសង្គ្រាមវឹកវរនោះ។
របាយការណ៍នោះបានឲ្យដឹងថា នៅក្នុងករណីអាក្រក់ៗបំផុតនោះ ប្រជាជនពិការដែលចាកចេញពីក្រុមគ្រួសារ ក្រោយពីបែកគ្នា ខណៈដែលកំពុងភៀសខ្លួនចេញពីផ្ទះសំបែងរបស់ពួកគេនោះ។
ដោយត្រូវបានបោះពុម្ពផ្សាយនៅថ្ងៃប្រារព្ធទិវាជនពិការអន្តរជាតិ របាយការណ៍នោះ បានបង្ហាញឲ្យឃើញស្ត្រី ៥២ នាក់ បុរស និងក្មេងៗដែលពិការធ្ងន់ធ្ងរ៕ AFP/PSA