.jpg)
ក្មេងៗ យេម៉ែនអមដោយឪពុករបស់ពួកគេ កាន់អាវុធគ្រប់គ្នានៅក្នុងអំឡុងការជួបជុំមួយនៅក្នុងក្រុងសាណា។ AFP
ក្រុងសាណាៈ យោងតាមអង្គការសហប្រជាជាតិបានឲ្យដឹងថា សង្គ្រាមនៅប្រទេស យេម៉ែន បានបណ្តាលឲ្យមនុស្សរាប់ពាន់នាក់ស្លាប់ និងបង្កឲ្យមានវិបត្តិមនុស្សធម៌អាក្រក់បំផុតនៅក្នុងពិភពលោក។
សង្គ្រាមរវាងក្រុមឧទ្ទាមហ៊ូធី និងកងកម្លាំងគាំទ្ររដ្ឋាភិបាល បានកើតឡើងកាន់ខ្លាំងកាលពីខែមីនា ឆ្នាំ ២០១៥ នៅពេលដែលក្រុមចម្រុះយោធាដឹកនាំដោយអារ៉ាប៊ី សាអ៊ូឌីត បានធ្វើការអន្តរាគមន៍ប្រឆាំងក្រុមឧទ្ទាមហ៊ូធី។
យោងតាមអង្គការសុខភាពពិភពលោក (WHO) បានឲ្យដឹងថា មនុស្សប្រហែល ១ ម៉ឺននាក់ ដែលភាគច្រើនជាជនស៊ីវិលត្រូវបានស្លាប់ និងជាង ៦ ម៉ឺននាក់បានរងរបួស ចាប់តាំងពីក្រុមចម្រុះដឹកនាំដោយអារ៉ាប៊ី សាអ៊ូឌីត បានចូលរួមនៅក្នុងជម្លោះនោះមក។
ប៉ុន្តែចំនួនពិតប្រាកដ គឺមិនទាន់ដឹងនៅឡើយទេ ហើយក្រុមជំនួយមនុស្សធម៌បានព្រមានថា ចំនួននោះទំនងជាកើនឡើងគួរឲ្យកត់សម្គាល់ ជាមួយនឹងសកម្មភាពប្រឆាំងយ៉ាងខ្លាំងក្លាដែលបានដាក់ចំនួនអ្នកស្លាប់មានជាង ៥៧ ពាន់នាក់។
យុទ្ធជនស្មោះត្រង់ប្រធានាធិបតីយេម៉ែនគាំទ្រដោយ អារ៉ាប៊ី សាអ៊ូឌីត ដឹកអ្នករងរបួសទៅកាន់មន្ទីរពេទ្យ។ AFP
កាលពីថ្ងៃទី ១៨ ខែ មីនា ឆ្នាំ ២០១៩ ក្រុមប្រឹក្សាជនភៀសខ្លួនន័រវែស បានថ្លែងថា ក្រុមជនស៊ីវិលស្លាប់ និងរងរបួសបានកើនឡើងនៅក្នុង ប្រទេស យេម៉ែន ទោះបីជាមានបទឈប់បាញ់រយៈពេល ៣ ខែនៅកំពង់ផែហូដេដាក្តី។
យោងតាមក្រុមអ្នកផ្តល់ជំនួយមនុស្សធម៌របស់បារាំង Action Contre la Faim បានឲ្យដឹងថា មនុស្សចំនួន ៣,៣ លាននាក់ បានរត់ភៀសខ្លួននៅក្នុងទឹកដីប្រទេស យេម៉ែន។
ប្រទេស យេម៉ែន បានរងការប៉ះពាល់ដោយជំងឺអាសន្នរោគ ដែលបានបណ្តាលឲ្យមនុស្សជាង ២ ៥០០ នាក់ ស្លាប់ចាប់តាំងពីខែ មេសា ឆ្នាំ ២០១៧ មកម្ល៉េះ។ យោងតាមអង្គការ WHO បានឲ្យដឹងថា ករណីមនុស្ស ដែលគួរឲ្យសង្ស័យមានប្រហែល ១,២ លាននាក់ត្រូវបានគេរាយការណ៍មានជំងឺនេះ។
មូលនិធិគាំពារកុមារអង្គការសហប្រជាជាតិ (UNICEF) បានបង្ហាញឲ្យឃើញជារឿយៗអំពីឥទ្ធិពលនៃជម្លោះដែលបង្កគ្រោះថ្នាក់ដល់កុមារ។
ក្រុមឧទ្ទាមហ៊ូធី បង្ហាញអ្វីដែលជាកងកម្លាំងយោធាហ៊ូធី ដែលបានធ្វើការវាយប្រហារមីស៊ីលបាលីស្ទិក។ AFP
អង្គការ WHO បាននិយាយកាលពីខែ វិច្ឆិកា ឆ្នាំ ២០១៨ ថា៖ «ស្ថានភាពនៃការរស់នៅរបស់ក្មេងប្រុស ក្មេងស្រីគ្រប់ៗគ្នានៅក្នុងប្រទេស យេម៉ែន» ហាក់ដូចជាការរស់នៅក្នុងឋាននរកអ៊ីចឹង។
អង្គការ WHO បាននិយាយថា កុមារមានអាយុតិចជាង ៥ ឆ្នាំចំនួន ១,៨ លាននាក់កំពុងមានជំងឺបណ្តាលមកពីកង្វះអាហាររូបត្ថម្ភយ៉ាងធ្ងន់ធ្ងរ។
មូលនិធិគាំពារកុមារបានថ្លែងថា នៅរវាងខែ មេសា ឆ្នាំ ២០១៥ និងខែ តុលា ឆ្នាំ ២០១៨ កុមារប្រហែល ៨៥ ពាន់នាក់ អាចនឹងស្លាប់ដោយសារកង្វះអាហាររូបត្ថម្ភ៕ AFP/SK
