.jpg)
មន្ត្រីប៉ូលិសវិមាន Capitol តម្រង់ចុងកំាភ្លើងរបស់ពួកគេសំដៅទៅមាត់ទ្វារ ដែលក្រុមអ្នកគាំទ្រលោក Trump សម្រុកចូលនៅក្នុងអំឡុងពេលប្រជុំសភា។ AFP
នៅរាត្រីថ្ងៃពុធ ទី ៦ ខែមករា សភាជាតិអាមេរិកបន្តការបញ្ជាក់លទ្ធផលបោះឆ្នោតប្រធានាធិបតីដោយអង្គបោះឆ្នោតថា លោក Joe Biden ឈ្នះបន្ទាប់ពីការផ្អាកជាបណ្ដោះអាសន្ន ដោយសារក្រុមអ្នកគាំទ្រលោកប្រធានាធិបតី Donald Trump បានប៉ះទង្គិចជាមួយនឹងប៉ូលិសនៅរដ្ឋធានីវ៉ាស៊ីនតោន ហើយក្រោយមកសម្រុកចូលអគារសភាជាតិដែលឈានដល់ការបាញ់សម្លាប់ស្ត្រី ១ រូប។
បាតុកម្មដោយហិង្សានេះកើតឡើងប៉ុន្មានម៉ោងបន្ទាប់ពីលោក Trump បានជំរុញឱ្យអ្នកគាំទ្រនៅទីក្រុងវ៉ាស៊ីនតោនធ្វើការតវ៉ានឹងការបញ្ជាក់លទ្ធផលបោះឆ្នោត ដែលជាដំណើរការមួយដែលនឹងធានាជ័យជម្នះរបស់ប្រធានាធិបតីជាប់ឆ្នោត លោក Biden។
កាលពីម៉ោង ១២ ថ្ងៃត្រង់លោក Trump និយាយទៅកាន់ក្រុមអ្នកគាំទ្រប្រមាណ ២៥ ០០០ នាក់ ដែលប្រមូលផ្ដុំគ្នានៅមុខសេតវិមានថា៖ «យើងនឹងដើរទៅកាពីតូល [អគារសភាជាតិ] ហើយយើងនឹងលើកទឹកចិត្តដល់សមាជិកព្រឹទ្ធសភា និងសមាជិកសភាតំណាងរបស់យើងដែលមានសេចក្ដីក្លាហាន»។
លោក Trump បានបន្តទៀតថា៖ «យើងនឹងមិនបោះបង់ចោល យើងនឹងមិនចុះចាញ់»។
នៅម៉ោង ១ រសៀល ម៉ោងក្នុងស្រុក (អាមេរិក) ក្រុមបាតុករបានឡោមព័ទ្ធអគារសភាជាតិ ហើយចាប់ផ្ដើមច្រានប៉ូលិសវាយបំបែកបង្អួច រុញបំបាក់ទ្វារ និងសម្រុកចូលអង្គសភាទាំង ២ ដែលកំពុងពិភាក្សាការតវ៉ាលទ្ធផលបោះឆ្នោតនៅរដ្ឋ Arizona។
ប៉ូលិសបានបាញ់កាំភ្លើងជាច្រើនគ្រាប់ទៅកាន់បាតុករដែលកំពុងរុញបំបាក់ទ្វារបន្ទប់សភាតំណាង ហើយ CNN បានរាយការណ៍ថា បាតុករ ៤ នាក់បានស្លាប់ ដែលរួមមានស្ត្រីម្នាក់ស្លាប់ បន្ទាប់ពីត្រូវ ១ គ្រាប់ចំដើមទ្រូង។
អនុប្រធានាធិបតី Mike Pence ដែលកំពុងដើរតួជាប្រធានព្រឹទ្ធសភា, លោកស្រី Nancy Pelosi ប្រធានសភាតំណាង និងអនុប្រធានាធិបតីជាប់ឆ្នោត លោកស្រី Kamala Harris ដែលជាសមាជិកព្រឹទ្ធសភា ត្រូវបានជម្លៀសទៅកន្លែងដែលមានសុវត្ថិភាព ហើយអគារសភាត្រូវបានដាក់ក្រោមការបង្ខាំងមិនឱ្យចេញចូល។
លោកស្រី Pelosi និងមេដឹកនាំសំឡេងភាគតិចក្នុងព្រឹទ្ធសភាលោក Chuck Schumer បានចេញសេចក្ដីថ្លែងការណ៍រួមថា៖ «យើងសូមអំពាវនាវដល់លោកប្រធានាធិបតី Trump ឱ្យទាមទារក្រុមបាតុករទាំងអស់ចាកចេញពីបរិវេណកាពីតូលភ្លាមៗ»។
រីឯលោក Biden វិញបាន ថ្លែងសុន្ទរកថាភ្លាមៗថា៖ «ខ្ញុំសូមអំពាវនាវដល់ហ្វូងបាតុករទាំងនេះឱ្យដកថយហើយអនុញ្ញាតឱ្យលទ្ធិប្រជាធិបតេយ្យដើរទៅមុខ»។ លោកបន្តទៀតថា៖ «ខ្ញុំសូមអំពាវនាវឱ្យលោកប្រធានាធិបតី Trump ចេញទៅតាមកញ្ចក់ទូរទស្សន៍ជាតិឥឡូវនេះ ដើម្បីបំពេញកាតព្វកិច្ចតាមសម្បថរបស់លោកថា នឹងការពាររដ្ឋធម្មនុញ្ញ និងទាមទារឱ្យបញ្ចប់ការឡោមព័ទ្ធអគារសភានេះ»។
ក្រោយពីការទាមទារទាំងនេះ លោក Trump បានបង្ហោះសារតាមបណ្ដាញសង្គម Twitter ថា៖ «ខ្ញុំស្នើសុំអ្នករាល់គ្នានៅកាពីតូល [អគារសភា] សហរដ្ឋអាមេរិកឱ្យរក្សាសន្តិភាព។ អហិង្សា! សូមចងចាំថាយើងជាគណបក្សគោរពច្បាប់ និងបទបញ្ជាគោរពច្បាប់ និងបុរស និងស្ត្រីដ៏អស្ចារ្យរបស់យើងដែលមានពណ៌ខៀវ [បក្សប្រជាធិបតេយ្យ]។ សូមអរគុណ!»។
ប៉ុន្តែក្រោយមកលោក Trump បានការពារអ្នកគាំទ្ររបស់លោកថា៖ «ទាំងនេះ គឺជារឿងនិងព្រឹត្តិការណ៍ដែលកើតឡើងនៅពេលជ័យជម្នះនៃការបោះឆ្នោតភ្លូកទឹកភ្លូកដី ត្រូវបានគេដកហូតដោយខ្វះសុជីវធម៌ និងកាចសាហាវពីអ្នកស្នេហាជាតិដ៏អស្ចារ្យ ដែលត្រូវបានគេធ្វើបាបដោយអយុត្តិធម៌អស់រយៈពេលជាយូរមកហើយ»។
លោកបន្ត៖ «សូមត្រឡប់ទៅផ្ទះវិញដោយក្ដីស្រឡាញ់ និងដោយសន្តិភាព។ សូមចងចាំថ្ងៃនេះជារៀងរហូត!»។
ប៉ូលិសប្រមូលផ្តុំគ្នាខណៈអ្នកគាំទ្រ Trump ប៉ះទង្គិចជាមួយកងកម្លាំងសន្តិសុខ។ AFP
ក្រុមហ៊ុនបណ្ដាញសង្គម Twitter និង Facebook បានចាត់វិធានការលុបចោលសារ ២ ចុងក្រោយនេះ ដោយលើកឡើងថា សារទាំងនេះ បានរំលោភគោលការណ៍ណែនាំសហគមន៍របស់ពួកគេ ហើយក្រុមហ៊ុន Facebook បានដាក់ការហាមឃាត់មិនឱ្យលោក Trump បង្ហោះសារថ្មីក្នុងរយៈពេល ២៤ ម៉ោងហើយក្រុមហ៊ុន Twitter វិញបានធ្វើការហាមឃាត់រយៈពេល ១២ ម៉ោង។
លោក Pence ដែលប៉ុន្មានថ្ងៃនេះរងការរិះគន់ពីលោក Trump និងអ្នកគាំទ្រថា មិនយល់ព្រមច្រានចោលលទ្ធផលនៃការបោះឆ្នោតនៅអង្គបោះឆ្នោតបានចេញសេចក្ដីថ្លែងការណ៍លើអំពើហិង្សានេះ។
លោក Pence បង្ហោះសារថា៖ «អំពើហិង្សា និងការបំផ្លាញដែលកំពុងតែកើតឡើងនៅកាពីតូលអាមេរិកត្រូវតែបញ្ឈប់ ហើយត្រូវតែបញ្ឈប់ឥឡូវនេះ។ អ្នកដែលពាក់ព័ន្ធត្រូវតែគោរពមន្ត្រីអនុវត្តច្បាប់ហើយចាកចេញពីអគារជាបន្ទាន់»។
លោកបន្តទៀតថា៖ «ការតវ៉ាដោយសន្តិវិធី គឺជាសិទ្ធិរបស់ពលរដ្ឋអាមេរិកទាំងអស់ ប៉ុន្តែការវាយប្រហារនេះទៅលើអគារកាពីតូលរបស់យើងនឹងមិនត្រូវបានអត់ឱនទេ ហើយអ្នកដែលពាក់ព័ន្ធនឹងត្រូវបានកាត់ទោសតាមច្បាប់យ៉ាងពេញលេញ» ។
ប៉ូលិសទីបំផុត បានដកក្រុមបាតុករ និងគ្រប់គ្រងអគារឡើងវិញនៅម៉ោង ៣ រសៀលម៉ោងក្នុងស្រុក ហើយប៉ុន្មានបន្ទាប់មកទើបបានសភាអាមេរិកបានបន្តការរាប់សន្លឹកឆ្នោត។ ក្រសួងសន្តិសុខដែនដីជាតិ និងទីភ្នាក់ងារសម្ងាត់ FBI បានដាក់ពង្រាយភ្នាក់ងារប្រដាប់ដោយអាវុធ ដើម្បីជួយប៉ូលិសក្នុងការរក្សាសន្តិសុខ។
រដ្ឋមន្ត្រីក្រសួងការពារជាតិស្ដីទីលោក Christopher Miller និងប្រធាននាយសេនាធិការរួមនាយឧត្ដមសេនីយ៍ Mark Milley បានចល័តទ័ពឆ្មាំជាតិនៃរដ្ឋធានីវ៉ាស៊ីនតោនចំនួន ១ ១០០ នាក់ ក្រោយពីបានពិភាក្សាជាមួយនឹងលោក Pence លោកស្រី Pelosi លោក Schumer និងលោក Mitch McConnell។
អភិបាលរដ្ឋធានីវ៉ាស៊ីនតោនលោកស្រី Muriel Bowser បានដាក់បម្រាមគោចរពីម៉ោង ៦ ល្ងាចដល់ ៦ ព្រឹក សម្រាប់រយៈពេល ១៥ ថ្ងៃខាងមុខ ហើយបានស្នើសុំដល់អភិបាលរដ្ឋ Virginia និងអភិបាលរដ្ឋ Maryland ឱ្យជួយបញ្ជូនប៉ូលិស និងទ័ពឆ្មាំជាតិរបស់ពួកគេមកជួយរក្សាសន្តិសុខ។
សមាជិកសភាគណបក្សប្រជាធិបតេយ្យ និងខ្លះគណបក្សសាធារណរដ្ឋបានស្ដីបន្ទោសលោក Trump ចំពោះការញុះញង់ឱ្យមានអំពើហិង្សា។ សមាជិកខ្លះ បានទាមទារឱ្យដកលោក Trump ចេញពីតំណែងជាបន្ទាន់ ខ្លះទៀតបានទាមទារឱ្យលោក Pence ប្រើវិសោធនកម្មរដ្ឋធម្មនុញ្ញទី២៥ ដើម្បីដកលោក Trump។
វិសោធនកម្មរដ្ឋធម្មនុញ្ញទី២៥ បានអនុញ្ញាតឱ្យអនុប្រធានាធិបតីនឹងសំឡេងភាគច្រើននៃគណៈរដ្ឋមន្ត្រី ធ្វើការប្រកាសថា ប្រធានាធិបតីមិនមានសមត្ថភាពកាន់អំណាច និងដកហូតអំណាចជាបណ្ដោះអាសន្ន ហើយបន្ទាប់មកសភាអាចបោះឆ្នោត ២ ភាគ ៣ ដើម្បីដកប្រធានាធិបតីពីតំណែង។
រយៈពេលប៉ុន្មានសប្ដាហ៍បានកន្លងផុតទៅហើយ ចាប់តាំងពីរដ្ឋនានាបានបញ្ចប់ការបញ្ជាក់ថា លោក Biden បានឈ្នះអង្គបោះឆ្នោត ៣០៦ ធៀបនឹង ២៣២ របស់លោក Trump ហើយការតវ៉ារបស់លោក Trump ចំពោះលទ្ធផលនេះ បានបរាជ័យនៅក្នុងតុលាការនៅទូទាំងប្រទេស។ សមាជិកបក្សសាធារណរដ្ឋបានសន្យាថា នឹងធ្វើការតវ៉ាលទ្ធផលនៅរដ្ឋចំនួន ៦ នៅពេលដែលសភាបញ្ជាក់លទ្ធផល។
តែក្រោយពីការសម្រុកចូលអគារសភាបានធ្វើឱ្យការតវ៉ាលទ្ធផលនៅ រដ្ឋ Arizona និងរដ្ឋ Pennsylvania បានបរាជ័យដោយសភាទាំង ២ បានបោះឆ្នោតច្រានចោលការតវ៉ា ហើយផែនការតវ៉ាលទ្ធផលនៅ រដ្ឋ Georgia, រដ្ឋ Michigan និងរដ្ឋ Nevada ត្រូវបានបោះបង់ចោល៕
