ក្រុងម៉ាណាហ្គាៈ សម្ព័ន្ធមិត្តប្រឆាំងរបស់នីការ៉ាហ្គា បាននិយាយកាលពីថ្ងៃអង្គារថា ការចរចាជាមួយរដ្ឋាភិបាលរបស់លោក ដាញ៉ែល អរតេហ្គា មិនអាចបន្តទៅទៀតទេ ប្រសិនបើក្រុមអ្នកទោសនយោបាយ មិនទាន់ត្រូវបានដោះលែង និងការបង្ក្រាបទៅលើក្រុមអ្នកតវ៉ាប្រឆាំងរបបនេះ មិនទាន់ចប់។
លោកស្រី មេធាវីបក្សប្រឆាំង Azahalea Solis បានថ្លែងប្រាប់អ្នកកាសែតថា៖ «មិនមានលក្ខខណ្ឌច្រើន ដើម្បីបន្តការចរចាជាមួយរដ្ឋាភិបាលទេ»។ សម្ព័ន្ធមិត្តប្រឆាំងស៊ីវិល ដើម្បីយុត្តិធម៌ និងលទ្ធិប្រជាធិបតេយ្យ (ACJD) បានព្យួរការចរចាជាមួយរដ្ឋាភិបាល ដែលមានបំណងធ្វើការទម្លាយភាពទាល់ច្រកជុំវិញវិបត្តិនយោបាយមួយ ដែលអូសបន្លាយ ១១ ខែហើយនោះ។
ទោះបីជា ACJD បានបង្ហាញមុខនៅកន្លែងមួយនៅក្នុងក្រុង ម៉ាណាហ្គា ជាទីដែលការចរចា ត្រូវបានទទួលជាម្ចាស់ផ្ទះដោយវិទ្យាស្ថានគ្រប់គ្រងពាណិជ្ជកម្មអាមេរិកកណ្តាលក្តី ក៏គណៈប្រតិភូមិនបានជួបជាមួយក្រុមអ្នកចរចារបស់រដ្ឋាភិបាលដែរ។
លោកស្រី Solis បានថ្លែងថា ជំនួសមកវិញ សម្ព័ន្ធមិត្តប្រឆាំងនោះបានស្នើឲ្យក្រុមអ្នកសម្របសម្រួល Waldemar Stanislaw Sommertag ជាប្រេសិតពិសេសនៃបុរីវ៉ាទីកង់ និងប្រេសិតពិសេសនៃអង្គការនៃក្រុមរដ្ឋអាមេរិកលោក Luis Angel Rosadilla ជំរុញឲ្យរដ្ឋាភិបាលនេះ បង្ហាញឆន្ទៈ ដើម្បីឈានដល់កិច្ចព្រមព្រៀងមួយ។
ការចរចានោះ ត្រូវបានព្យួរកាលពីថ្ងៃចន្ទ ដោយសារមានការតវ៉ាចំពោះអំពើហិង្សា និងការបង្ក្រាបទៅលើក្រុមអ្នកតវ៉ាយ៉ាងធ្ងន់ធ្ងរ។
ប៉ូលិសប្រឆាំងកុបកម្ម បានប្រើឧស្ម័នបង្ហូរទឹកភ្នែក ដើម្បីបញ្ឈប់ការតវ៉ាប្រឆាំងកាលពីថ្ងៃសៅរ៍ ខណៈដែលមានការចាប់ឃុំខ្លួនមនុស្ស ១០០ នាក់បណ្តោះអាសន្ននៅក្នុងអំឡុងការតវ៉ា ដែលនៅក្នុងនោះមានមេដឹកនាំប្រឆាំង ២ នាក់។
សម្ព័ន្ធមិត្តប្រឆាំង ក៏បានផ្ទុះកំហឹងថា មានអ្នកទោស ១៥០ នាក់ ដែលត្រូវបានដោះលែងចាប់តាំងពីការចរចា បានចាប់ផ្តើមកាលពីថ្ងៃទី ២៧ ខែកុម្ភៈ ឆ្នាំ ២០១៨ ត្រូវបានគេឃុំខ្លួនឲ្យនៅក្នុងផ្ទះ និងបានទាមទារឲ្យពួកគេមានសេរីភាពពេញលេញឡើងវិញ។
រដ្ឋាភិបាលនីការ៉ាហ្គា មិនបានធ្វើការពន្យល់អំពីការជាប់គាំងក្នុងការចរចានាពេលថ្មីៗនេះទេ៕ AFP/PSA