ក្រុងគែរ៖ អង្គភាពអារ៉ាប់បានថ្លែងកាលពីថ្ងៃពុធថា សម្ព័ន្ធអារ៉ាប់កំពុងកោះប្រជុំជាបន្ទាន់មួយនៅថ្ងៃសៅរ៍ ដើម្បីពិភាក្សាអំពីការវាយប្រហារទ្រង់ទ្រាយធំរបស់តួកគីប្រឆាំងកងកម្លាំងឃើដនៅស៊ីរី។
លោក ហ៊ូសសាំ ហ្សាគី ជាជំនួយការអគ្គលេខាធិការរបស់សម្ព័ន្ធអារ៉ាប់ បានថ្លែងនៅក្នុងសេចក្តីថ្លែងការណ៍មួយកាលពីរសៀលថ្ងៃពុធថា បន្ទាប់ពីមានការស្នើសុំមួយដោយប្រទេស អេហ្ស៊ីប ក្រុមមន្ត្រីការបរទេសប្រចាំតំបន់នឹងជួបជុំគ្នានៅក្នុងទីក្រុងគែរនៅថ្ងៃទី ១២ ខែ តុលា «ដើម្បីពិភាក្សាអំពីការឈ្លានពានរបស់តួកគីទៅលើទឹកដីស៊ីរី»។
ការប្រកាសនោះបានកើតឡើងក្រោយពីប្រទេស តួកគី បានបើកការវាយប្រហារផ្លូវអាកាស និងកាំភ្លើងធំបានប្រយុទ្ធគ្នានៅតាមព្រំដែនជាមួយប្រទេស ស៊ីរី ដែលហែកហួរដោយសង្គ្រាមមួយនេះកាលពីព្រឹកថ្ងៃពុធ។
ដោយមានការគាំទ្រពីក្រុមជីវពលសកម្មប្រយុទ្ធស៊ីរីតួកគីបានបើកការវាយលុកថ្មើរជើងទ្រង់ទ្រាយធំនៅក្នុងទីក្រុងតែល អាប៊េដ ជាតំបន់ស្ថិតនៅក្រោមការគ្រប់គ្រងរបស់អង្គភាពការពារប្រជាជនឃើដ (YPG) នៅស៊ីរី។
ការវាយប្រហាររបស់ក្រុងអង់ការ៉ា បានធ្វើឡើង បន្ទាប់ពីការផ្លាស់ប្តូរគោលនយោបាយរបស់អាមេរិកភ្លាមៗ ដែលបានមើលឃើញអាមេរិកដកកងកម្លាំងរបស់ខ្លួនចេញពីទីតាំងខ្លះនៅស៊ីរីភាគខាងជើង ដោយបានផ្តល់ភ្លើងខៀវឲ្យតួកគីធ្វើប្រតិបត្តិការយោធាទៅលើក្រុមឃើដនោះ។
លោក ហ៊ូសសាំ ហ្សាគី បានចាត់ទុកយុទ្ធនាការទ្រង់ទ្រាយធំនោះថា «ជាការវាយប្រហារមួយដែលមិនអាចទទួលយកបានទៅលើអធិបតេយ្យភាពរបស់ប្រទេសសមាជិកអារ៉ាប់មួយនេះ ដែលបានស្វែងរកផលប្រយោជន៍ទៅតាមស្ថានការណ៍បង្កហេតុរបស់ខ្លួន និងការបំពានច្បាប់អន្តរជាតិផងដែរ»៕ AFP/SK