.jpg)
លោក Charles Michel ចូលរួមកិច្ចប្រជុំតាមវីដេអូខុនហ្វើរិននៅទីក្រុងប្រ៊ុចសែល។ រូបថត AFP
កាលពីថ្ងៃអង្គារ កន្លងទៅប្រធានក្រុមប្រឹក្សាសហភាពអឺរ៉ុបលោក Charles Michel ច្រានចោលការចោទប្រកាន់ដែលថា សហភាពអឺរ៉ុបចែកចាយវ៉ាក់សាំងមានលក្ខណៈបក្ខពួកនិយម ដោយហាមឃាត់ចក្រភពអង់គ្លេស និងសហរដ្ឋអាមេរិកនាំចេញវ៉ាក់សាំងកូវីដ ១៩ ខណៈខ្លួននៅបន្តការនាំចេញដដែល។
សហគមន៍អឺរ៉ុបទទួលរងការរិះគន់ចំពោះការផ្គត់ផ្គង់វ៉ាក់សាំងកូវីដ ១៩ ឱ្យប្រទេសក្រីក្រមានលក្ខណៈយឺតយ៉ាវជាងប្រទេសអង់គ្លេស ឬសហរដ្ឋអាមេរិក និងប្រទេសដទៃទៀតដែលបច្ចុប្បន្នកម្រិតនៃការចែកចាយតិចជាងចិន រុស្ស៊ី ឬឥណ្ឌាជាដើម។
កាលពីថ្ងៃព្រហស្បតិ៍សប្ដាហ៍មុន សហភាពអឺរ៉ុបបានបង្កឱ្យមានភាពរអាក់រអួលដល់ប្រទេសទិញវ៉ាក់សាំងដោយគាំទ្រលើការសម្រេចចិត្តរបស់អ៊ីតាលីក្នុងការហាមមិនឱ្យមានការដឹកជញ្ជូនវ៉ាក់សាំងទៅកាន់ប្រទេសអូស្ត្រាលី។
នៅថ្ងៃដដែលនោះ ប្រទេសអ៊ីតាលី ប្រកាសហាមមិនឱ្យមានការដឹកជញ្ជូនវ៉ាក់សាំងកូវីដ AstraZeneca ទៅកាន់ប្រទេសអូស្ត្រាលី ដោយអះអាងថា ជាបទប្បញ្ញត្តិថ្មីរបស់សហភាពអឺរ៉ុបក្នុងការចែកចាយវ៉ាក់សាំងដោយមានតម្លាភាព។ ក្រោមយន្តការថ្មីនេះ ប្រទេសនានាត្រូវជូនដំណឹងជាមុនទៅគណៈកម្មការអឺរ៉ុបអំពីការសម្រេចចិត្តរបស់ពួកគេថា គួរហាមប្រាម ឬអនុញ្ញាតឱ្យមាននាំចេញវ៉ាក់សាំងទៅក្រៅប្លុកអឺរ៉ុប ឬយ៉ាងណា?
យ៉ាងណាមិញ បើយោងតាមមន្ត្រីសហគមន៍អឺរ៉ុបម្នាក់បាននិយាយថា គណៈកម្មការមិនបានប្រឆាំងនឹងសេចក្តីសម្រេចចិត្តរបស់ប្រទេសអ៊ីតាលី ទេ ដោយឡែកក្រុមហ៊ុនវ៉ាក់សាំង AstraZeneca វិញ បានបដិសេធមិនធ្វើអត្ថាធិប្បាយចំពោះបញ្ហានេះ។
ការសម្រេចរបស់អ៊ីតាលីធ្វើឡើង ក្រោយនាយករដ្ឋមន្ត្រីអ៊ីតាលី លោក Mario Draghi អំពាវនាវក្នុងអំឡុងកិច្ចប្រជុំកំពូលសហភាពអឺរ៉ុប កាលពីសប្តាហ៍មុនឱ្យរឹតបន្តឹងលើក្រុមហ៊ុនវ៉ាក់សាំងណា ដែលមិនគោរពតាមការប្តេជ្ញាចិត្តផ្គត់ផ្គង់វ៉ាក់សាំងរបស់ប្រទេសនៅអឺរ៉ុប។
ក្រសួងការបរទេសអ៊ីតាលីបាននិយាយថា វ៉ាក់សាំងចំនួន ២៥០ ៧០០ ដូស ដែលគ្រោងនឹងដឹកទៅអូស្ត្រាលី គឺជាការផ្គត់ផ្គង់មួយទាំងដែលអឺរ៉ុប និងអ៊ីតាលី កំពុងខ្វះខាតវ៉ាក់សាំងសម្រាប់ចែកចាយប្រជាជនខ្លួន និងបានលើកឡើងថា ប្រទេសអូស្ត្រាលី ត្រូវបានគេចាត់ទុកថា ជាប្រទេស «មិនងាយរងគ្រោះ» ដូចប្រទេសក្រីក្រដទៃ។
ប្រទេសអង់គ្លេស មានប្រតិកម្មរហ័សចំពោះការបដិសេធរបស់លោក Michel ដែលជាបុគ្គលតំណាងឱ្យប្រទេសជាសមាជិកទាំង ២៧ របស់សហភាពអឺរ៉ុបថា សហភាពអឺរ៉ុបមិនដែលរារាំងការនាំចេញវ៉ាក់សាំងអ្វីនោះឡើយ។
អ្នកនាំពាក្យរដ្ឋាភិបាលអង់គ្លេសបាននិយាយថា៖ «រាល់ការលើកឡើងអំពីការហាមឃាត់ការនាំចេញរបស់ចក្រភពអង់គ្លេស ឬការឹតត្បិតការនាំចេញវ៉ាក់សាំងនោះពីសហភាពអឺរ៉ុប គឺជាពាក្យមិនពិតទេ»។ បន្ថែមពីនេះ រដ្ឋមន្ត្រីក្រសួងការបរទេសអង់គ្លេស លោក Dominic Raab បានប្រាប់លោក Michael ថា ឱ្យនិយាយពាក្យពិតមក។
ការប៉ះទង្គិចពាក្យសម្ដីគ្នា កើតឡើងក្រោយពេលលោក Michael បានចេញសេចក្ដីថ្លែងការណ៍ដ៏វែងមួយកាលពីថ្ងៃអង្គារ ដែលថា បើគ្មានអឺរ៉ុបទេ ម្ល៉េះនឹងមិនមានការអភិវឌ្ឍ និងផលិតវ៉ាក់សាំងជាច្រើនប្រភេទក្នុងរយៈពេលតិចជាង ១ ឆ្នាំនេះទេ ហើយក៏ដោយសារសាមគ្គីភាពរបស់សហភាពអឺរ៉ុបនេះហើយ ទើបធានាបានថា បណ្តាប្រទេសក្រីក្រនៃប្លុកនេះនឹងទទួលបានវ៉ាក់សាំងមុនគេ។
លោក Michel បានឱ្យដឹងថា សហភាពអឺរ៉ុបជាតំបន់ដែលផលិតវ៉ាក់សាំងបានច្រើនជាងគេក្នុងពិភពលោកបានរៀបចំគោលការណ៍រួចជាស្រេចក្នុងការគ្រប់គ្រងចំនួនវ៉ាក់សាំង ដើម្បីធានាថា ចែកចាយបានគ្រប់គ្រាន់សម្រាប់ប្រទេសនៅក្នុងសហភាពអឺរ៉ុប។
លោកបានបន្ថែមថា គោលបំណងរបស់អឺរ៉ុប គឺដើម្បីបង្ការកុំឱ្យក្រុមហ៊ុនវ៉ាក់សាំង ចែកចាយឱ្យបានត្រឹមត្រូវ ពោលគឺសហភាពអឺរ៉ុបបញ្ជាទិញបានមុន ដូចនេះប្រទេសខ្លួនត្រូវទទួលបានមុន បំណងគឺដើម្បីចែកចាយឱ្យបានដល់ប្រទេសដែលងាយរងគ្រោះបំផុត និងតាមលំដាប់លំដោយ ហើយសហភាពអឺរ៉ុបប្ដេជ្ញាមិនឈប់ចែកចាយវ៉ាក់សាំងឡើយ៕
