រដ្ឋមន្រ្តីក្រសួងការបរទេសអាល្លឺម៉ង់លោក Heiko Maas បាននិយាយថា ការបង្កហេតុជាច្រើនពីប្រទេសតួកគី ជាហេតុធ្វើឱ្យគ្មានការបង្កើតកិច្ចពិភាក្សាដោយផ្ទាល់រវាងទីក្រុងអង់ការ៉ា និងអាថែន ដោះស្រាយជម្លោះឧស្ម័ននៅសមុទ្រមេឌីទែរ៉ាណេ។
រដ្ឋមន្ត្រីការបរទេសសហភាពអឺរ៉ុបបានជួបប្រជុំគ្នាកាលពីថ្ងៃទី ៧ ធ្នូ ដើម្បីពិភាក្សាពីលទ្ធភាពនៃការដាក់ទណ្ឌកម្មប្រឆាំងនឹងប្រទេសតួកគី ជុំវិញជម្លោះឧស្ម័ននៅមេឌីទែរ៉ាណេ។ មេដឹកនាំប្លុកនេះ នឹងសម្រេចចិត្តចុងក្រោយក្នុងអំឡុងកិច្ចប្រជុំកំពូលមួយនៅថ្ងៃទី ១០ ខែធ្នូ ដោយមានយន្ដការបង្កកការនាំចេញអាវុធជាដើម ក្នុងចំណោមវិធានការដែលអាចកើតមានក្រោមការពិចារណារបស់សមាជិកណាតូ។
រដ្ឋមន្រ្តីក្រសួងការបរទេសក្រិកលោក Nikos Dendias បាននិយាយថា មានការព្រមព្រៀងយ៉ាងទូលំទូលាយលើទស្សនៈដែលថា ប្រទេសតួកគី មិនបានផ្លាស់ប្តូរជាវិជ្ជមានណាមួយពីគោលនយោបាយរបស់ខ្លួនក្នុងការរុករកនៅក្នុងដែនទឹកដែលមានជម្លោះនៅភាគខាងកើតសមុទ្រមេឌីទែរ៉ាណេទេ។
ប្រធានាធិបតីតួកគី លោក Recep Tayyip Erdogan បានឆ្លើយតបកាលពីថ្ងៃទី ៧ ធ្នូ ដោយអំពាវនាវឱ្យមានការចរចាបន្ថែមទៀត ស្របពេលដែលលោកជំរុញឲ្យសហភាពអឺរ៉ុបលុបចោលយុទ្ធសាស្រ្តងងឹតងងុលរបស់ខ្លួន។
ប្រធានាធិបតីតួកគីក៏បាននិយាយផងដែរថា ប្រទេសរបស់លោកនឹងមិនទទួលយកផែនការ និងផែនទីដែលមានគោលបំណង ដើម្បីបង្ខាំងពួកគេមិនឱ្យទៅច្រាំងសមុទ្រអង់តាលីយ៉ាឡើយ។
សម្រាប់ប្រទេសអាល្លឺម៉ង់ ដែលបច្ចុប្បន្នកាន់តំណែងជាប្រធានក្រុមប្រឹក្សាសហភាពអឺរ៉ុបរយៈពេល ៦ ខែ គឺជាអ្នកដើរតួយ៉ាងសំខាន់ក្នុងការសម្រេចថាតើទណ្ឌកម្មគួរតែដាក់ ឬអត់។ ទីក្រុងប៊ែរឡាំងសង្ឃឹមថា នឹងសម្រុះសម្រួលរវាងក្រុងអាថែន និងអង់ការ៉ា ប៉ុន្តែមានការខឹងសម្បានៅពេលដែលប្រទេសតួកគី បន្តការរុករកឧស្ម័នរបស់ខ្លួននៅឯកោះស៊ីបក្នុងខែតុលា បន្ទាប់ពីមានការផ្អាក។
ភាពតានតឹងបានផ្ទុះឡើងរវាងប្រទេសក្រិក និងតួកគី កាលពីខែសីហា នៅពេលដែលទីក្រុងអង់ការ៉ាបានបញ្ជូននាវា ១ គ្រឿង ទៅគូសផែនទី ដើម្បីខួងរ៉ែនៅក្នុងដែនទឹកប្រទេសក្រិក។ សហភាពអឺរ៉ុបបានគាំទ្រប្រទេសក្រិក នៅក្នុងជម្លោះនេះហើយបានបើកកិច្ចប្រជុំកំពូលមួយនៅខែតុលា ដែលមេដឹកនាំអឺរ៉ុបបានព្រមានប្រទេសតួកគី ឱ្យដកនាវារុករកថាមពលរ៉ែរបស់ខ្លួនចេញ ឬក៏ត្រូវប្រឈមនឹងវិធានការដាក់ទណ្ឌកម្ម។
សហភាពអឺរ៉ុបនិយាយថា សមយុទ្ធរបស់តួកគី និងនាវារបស់គេបានបន្តដំណើរការនៅក្នុងដែនទឹកដែលត្រូវបានជំទាស់ដោយប្រទេសក្រិក និងសាធារណរដ្ឋស៊ីបដែលប្រទេសក្រិក និយាយថា សកម្មភាពបែបនេះ ធ្វើឱ្យកិច្ចពិភាក្សាជាផ្លូវការជាមួយប្រទេសតួកគី ជុំវិញការទាមទារដែនសមុទ្រមិនអាចកើតមានឡើងឡើយ។
ទាក់ទងនឹងទណ្ឌកម្មតួកគីបានច្រានចោលការដាក់ទណ្ឌកម្មរបស់អឺរ៉ុបដោយនិយាយថា វាមិនសមស្របឡើយ។ សភាសហភាពអឺរ៉ុបបានអំពាវនាវឱ្យមានការដាក់ទណ្ឌកម្មនៅថ្ងៃទី ២៦ ខែវិច្ឆិកា ប៉ុន្តែការវិលត្រឡប់របស់នាវាតួកគី Oruc Reis ហើយការអំពាវនាវរបស់ប្រធានាធិបតីតួកគី លោក Tayyip Erdogan ឱ្យមានកិច្ចសន្ទនាជាមួយសហព័ន្ធអឺរ៉ុប អាចផ្តល់ហេតុផលដល់សហភាពអឺរ៉ុប ដើម្បីបញ្ឈប់ការដាក់ទណ្ឌកម្មនេះ។
តួកគីក៏បានផ្ញើសារទៅកាន់សហគមន៍អឺរ៉ុបផងដែរ នៅពេលដែលប្រធានាធិបតី Recep Tayyip Erdogan បានបញ្ជាក់ជាថ្មីថា អនាគតរបស់ប្រទេសតួកគី គឺស្ថិតនៅក្នុងសហភាពនេះ។ នាពេលថ្មីៗលោកក៏បានបញ្ជូនទីប្រឹក្សាគោលនយោបាយការបរទេស គឺលោក Ibrahim Kalin ទៅកាន់ទីក្រុងប្រ៊ុចសែលប្រទេសបែលហ្ស៊ិក ដើម្បីបញ្ជូនសារនេះ និងគូសបញ្ជាក់ថា ទណ្ឌកម្មលើប្រទេសតួកគី នឹងប៉ះពាល់ដល់ទំនាក់ទំនងទ្វេភាគីថែមទៀត។
ដូចករណីនៅក្នុងខែតុលា អធិការបតីអាល្លឺម៉ង់លោកស្រី Angela Merkel បានសារភាពថា មិនមានការប្រសើរឡើងរវាងទំនាក់ទំនងជាមួយតួកគី ជុំវិញបញ្ហានៅភាគខាងកើតសមុទ្រមេឌីទែរ៉ាណេនោះទេ បើទោះបីជាលោកស្រីបាននិយាយថា ការវិលត្រឡប់របស់នាវា Oruc Reis គឺជាសញ្ញាល្អក៏ដោយ។
អាល្លឺម៉ង់បានប្រឆាំងទណ្ឌកម្មដាក់លើតួកគីកាលពីខែតុលា ថ្វីបើទំនាក់ទំនងរវាងអាល្លឺម៉ង់ និងទីក្រុងអង់ការ៉ាអាចនៅតែបន្តមានភាពស្មុគ្រស្មាញ ប៉ុន្តែក្នុងរយៈពេល ២ ខែកន្លងមកនេះ ប្រទេសអាល្លឺម៉ង់ បានខកចិត្តជាខ្លាំងជាពិសេសការបដិសេធរបស់តួកគីចំពោះសំណើដែលបានលើកឡើងដោយសហគមន៍អឺរ៉ុបកាលពីដើមខែតុលា។
អគ្គលេខាធិការអង្គការណាតូលោក Jens Stoltenberg ក៏បានស្វាគមន៍ការសម្រេចដកនាវា Oruc Reis នេះតែ ១ ថ្ងៃប៉ុណ្ណោះ មុនការចាប់ផ្តើមកិច្ចប្រជុំរដ្ឋមន្រ្តីការបរទេសណាតូនៅថ្ងៃទី ១ ធ្នូ។ វាមិនមែនជារឿងចៃដន្យទេដែលប្រទេសតួកគី បានធ្វើការអំពាវនាវជាចំហដល់ប្រទេសក្រិក ដើម្បីបន្តកិច្ចពិភាក្សាការរុករកនៅថ្ងៃដដែល ដែលជាថ្ងៃដែលរដ្ឋមន្រ្តីការបរទេសណាតូបានជួបប្រជុំគ្នា។
រដ្ឋមន្ត្រីការបរទេសតួកគី លោក Mevlut Cavusoglu ក៏អាចនឹងអំពាវនាវម្តងទៀតដល់សមភាគីរបស់លោកមកពីបណ្តាប្រទេសណាតូ ផ្សេងទៀតផងដែរ។
ប៉ុន្តែយ៉ាងណាក៏ដោយមានទស្សនវិស័យតិចតួចណាស់ ដែលក្រិកយល់ព្រមនឹងអង្គុយនៅតុតែមួយជាមួយតួកគីមុនពេលកិច្ចប្រជុំកំពូលអឺរ៉ុប។ ប្រទេសក្រិក ចង់ឱ្យដាក់ទណ្ឌកម្មលើប្រទេសតួកគី ហើយមិនយល់ស្របទេដែលថា ភាពតានតឹងបានថយចុះដោយសារការដកចេញនូវនាវា Oruc Reis៕