ក្រុងប៉ារីស៖ ក្រុមសហជីពបារាំងកាលពីថ្ងៃពុធ បានបន្តធ្វើកូដកម្មជាច្រើន ដោយមានបំណងបង្កើនសម្ពាធទៅលើរដ្ឋាភិបាលមុននឹងរដ្ឋាភិបាលនេះ ធ្វើការបង្ហាញការកែទម្រង់ប្រាក់សោធននិវត្តន៍ចុងក្រោយ ដែលបានជំរុញឲ្យមានការតវ៉ាពីបញ្ហាការងារធំបំផុតនៅបារាំងជាច្រើនទសវត្សរ៍នោះ។
រដ្ឋាភិបាលនឹងបង្ហាញពីការកែទម្រង់ប្រាក់សោធននិវត្តន៍ដែលត្រូវបានកែប្រែរួចនៅជំនួបគណៈរដ្ឋមន្ត្រីនៅថ្ងៃសុក្រនេះ មុននឹងដាក់សេចក្តីព្រាងច្បាប់នេះ ទៅសភាសម្រាប់ការជជែកដេញដោលដែលត្រូវបានគ្រោងចាប់ផ្តើមនៅថ្ងៃទី ១៧ ខែកុម្ភៈ។
លោក Philippe Martinez អគ្គលេខាសម្ព័ន្ធសហជីពការងារ (CGT) បានថ្លែងប្រាប់ទូរទស្សន៍ BFM កាលពីថ្ងៃសុក្រសប្តាហ៍មុនថា៖ «ការបង្ហាញពីការកែទម្រង់ប្រាក់សោធននិវត្តន៍ ដែលត្រូវបានកែប្រែរួចនោះនៅថ្ងៃសុក្រនេះ»។
ក្រុមមេដឹកនាំសហជីពបានចាប់ផ្តើមធ្វើកូដកម្មនៅផ្នែករថភ្លើងផ្លូវដែក និងរថភ្លើងក្រោមដីប្រឆាំងនឹងការកែទម្រង់ប្រាក់សោធននិវត្តន៍នេះ ប៉ុន្តែការរំខានទាំងនោះបានចប់ទាំងស្រុង ក្រោយពីក្រុមមន្ត្រីបានបោះបង់ចោលគម្រោងផ្សេងៗជាបណ្តោះអាសន្ន ដែលយ៉ាងហោចណាស់បង្កើនអាយុចូលនិវត្តន៍ពី ៦២ ឆ្នាំ ទៅ ៦៤ ឆ្នាំ។
ប៉ុន្តែចាប់តាំងពីពេលនោះមកការប្រឆាំងបានប្រែក្លាយទៅជាវិធានការបដិវត្តន៍ដូចជាការផ្តាច់ភ្លើងអគ្គិសនី និងបិទកំពង់ផែ និងមានការកាន់កាប់ទីស្នាក់ការរបស់សម្ព័ន្ធសហជីពប្រជាធិបតេយ្យ (CFDT) ដោយក្រុមអ្នកប្រឆាំងសកម្មជាច្រើននោះ៕ AFP/PSA