កាលពីថ្ងៃពុធ ទី ១៣ មករា ប្រធានាធិបតីអាហ្វ្រិកខាងត្បូង និងប្រធានសហភាពអាហ្វ្រិកលោក Cyril Ramaphosa បានប្រកាសថា សហភាពអាហ្វ្រិកនិងទិញយកវ៉ាក់សាំងកូវីដ ១៩ ចំនួន ២៧០ លានដូស ពីក្រុមហ៊ុនផលិតចំនួន ៣ សម្រាប់ប្រើប្រាស់ក្នុងប្រទេសជាសមាជិក។
លោក Ramaphosa បាននិយាយថា៖ «ជាលទ្ធផលនៃកិច្ចខិតខំប្រឹងប្រែងរបស់យើងផ្ទាល់ មកដល់ពេលនេះយើងទទួលបានការប្ដេជ្ញាចិត្តផ្គត់ផ្គង់វ៉ាក់សាំងចំនួន ២៧០ លានពីអ្នកផ្គត់ផ្គង់ធំៗ ចំនួន ៣ គឺ Pfizer, AstraZeneca (តាមរយៈវិទ្យាស្ថានសេរ៉ូមនៃប្រទេសឥណ្ឌា) និង Johnson & Johnson»។
លោកក៏បាននិយាយថា យ៉ាងហោចណាស់វ៉ាក់សាំងចំនួន ៥០ លានដូស នឹងមានឱ្យប្រើប្រាស់ «សម្រាប់រយៈពេលដ៏សំខាន់ពីខែមេសា ដល់ខែមិថុនា ឆ្នាំ ២០២១»។
វ៉ាក់សាំងចំនួន ២៧០ លានដូស នឹងបន្ថែមពីលើនូវវ៉ាក់សាំងចំនួន ៦០០ លានដូស ដែលត្រូវបានសន្យាផ្គត់ផ្គង់ដោយអង្គការសុខភាពពិភពលោកតាមកម្មវិធី COVAX។ តែចំនួននេះគឺមិនគ្រប់គ្រាន់សម្រាប់ផ្ដល់ជូនប្រជាជនទេ ដោយសារទ្វីបអាហ្វ្រិកមានប្រជាជនសរុប ១,៣ ពាន់លាននាក់ ហើយមនុស្សម្នាក់ៗ ត្រូវការការចាក់វ៉ាក់សាំងចំនួនពីរ ធ្វើឱ្យអាហ្វ្រិកត្រូវវ៉ាក់សាំងយ៉ាងហោចណាស់ចំនួន ២,៦ ពាន់លានដូស៕