សហភាពអឺរ៉ុបកាលពីថ្ងៃសៅរ៍ ទី ៣០ មករា បានលុបចោលផែនការដាក់កម្រិតលើការនាំចេញវ៉ាក់សាំងកូវីដ ១៩ ទៅកាន់ចក្រភពអង់គ្លេសតាមរយៈអៀរឡង់ខាងជើង បន្ទាប់ពីរងការរិះគន់យ៉ាងខ្លាំងពីសាធារណរដ្ឋអៀរឡង់ ចក្រភពអង់គ្លេស និងអង្គការសុខភាពពិភពលោក។
កាលពីថ្ងៃសុក្រ សហភាពអឺរ៉ុបដោយមិនបានពិភាក្សាជាមួយប្រទេសជាសមាជិកឬចក្រភពអង់គ្លេស បានប្រកាសផែនការប្រើប្រាស់វិធានការបន្ទាន់មួយនៃកិច្ចព្រមព្រៀង Brexit ដើម្បីដាក់កម្រិតលើការនាំចេញវ៉ាក់សាំងកូវីដ ១៩ តាមរយៈព្រំដែនអៀរឡង់ ខណៈប្លុកនេះ កំពុងប្រឈមនឹងការខ្វះខាតវ៉ាក់សាំង។
នាយករដ្ឋមន្ត្រីចក្រភពអង់គ្លេសលោក Boris Johnson បាននិយាយថា លោក «មានការព្រួយបារម្ភយ៉ាងខ្លាំង» អំពីការប្រកាសនេះ រីឯរដ្ឋមន្ត្រីកិច្ចការអៀរឡង់ខាងជើងលោកស្រី Arlene Foster បាននិយាយថា ផែនការនេះ
គឺជា «អំពើអរិភាព»។
ភ្លាមៗក្រោយការប្រកាស លោក Johnson និងនាយករដ្ឋមន្ត្រីសាធារណរដ្ឋអៀរឡង់លោក Micheal Martin បាននិយាយជាមួយប្រធានគណៈកម្មការសហភាពអឺរ៉ុបលោកស្រី Ursula von der Leyen រៀងខ្លួន។
ក្រោយពីការជួបជាមួយនាយករដ្ឋមន្ត្រីទាំង ២ រូបនេះ លោកស្រី von der Leyen បានបង្ហោះសារទៅកាន់បណ្ដាញ Twitter ថា៖ «យើងបានឯកភាពលើគោលការណ៍ថា មិនគួរមានការដាក់កម្រិតលើការនាំចេញវ៉ាក់សាំងរបស់ក្រុមហ៊ុន ដែលកំពុងបំពេញភារកិច្ចតាមកិច្ចសន្យា»។
មន្ត្រីគណៈកម្មការសហភាពអឺរ៉ុបមួយចំនួនបាននិយាយថា ការដាក់កម្រិតនេះ គឺជាកំហុស ហើយធានាថា ការដាក់កម្រិតនឹងមិនប៉ះពាល់ដល់កិច្ចព្រមព្រៀង Brexit ទេ ដែលកិច្ចព្រមព្រៀងនេះ បានធានាមិនឱ្យមានការត្រួតពិនិត្យព្រំដែនថ្មីរវាងសាធារណរដ្ឋអៀរឡង់ និងអៀរឡង់ខាងជើង។
អង្គការសុខភាពពិភពលោក (WHO) ក៏បានចូលរួមក្នុងការរិះគន់សហភាពអឺរ៉ុបផងដែរ ដោយបាននិយាយថាវិធានការបែបនេះ អាចធ្វើឱ្យបន្តអូសបន្លាយការរាតត្បាតជំងឺកូវីដ ១៩។ អគ្គនាយក WHO លោកវេជ្ជបណ្ឌិត Tedros Adhanom Ghebreyesus បាននិយាយកាលពីថ្ងៃសុក្រថា «ជាតិនិយមវ៉ាក់សាំង» អាចនាំទៅរក «ការងើបឡើងវិញយ៉ាងយឺត»។
បើទោះជាបានដកការដាក់កម្រិតនេះក៏ដោយ សហភាពអឺរ៉ុបនៅតែមានបំណងធ្វើការត្រួតពិនិត្យការនាំចេញវ៉ាក់សាំងទៅកាន់ប្រទេសដែលមិនមែនសមាជិកសហភាពអឺរ៉ុប ដោយមិនមានការពាក់ព័ន្ធជាមួយព្រំដែនអៀរឡង់ខាងជើង ដែលការត្រួតពិនិត្យនេះ អាចកាត់បន្ថយការនាំចេញវ៉ាក់សាំងទៅប្រទេសទាំងនោះ។
យ៉ាងណាមិញការប្រកាសដាក់កម្រិតនាំចេញវ៉ាក់សាំង គឺធ្វើឡើងនៅពេលជាមួយការអនុញ្ញាតឱ្យប្រើប្រាស់វ៉ាក់សាំងផលិតដោយក្រុមហ៊ុនឱសថអង់គ្លេស/ស៊ុយអែត Astra Zeneca។ សហភាពអឺរ៉ុបគឺកំពុងស្ថិតក្នុងជម្លោះជាមួយ AstraZencaទាក់ទងការកាត់បន្ថយការផ្គត់ផ្គង់វ៉ាក់សាំងកូវីដ ១៩ សម្រាប់ប្លុកនេះ ដោយសារបញ្ហាផលិតកម្ម។ ការប្រកាសដាក់កម្រិតនាំចេញវ៉ាក់សាំងគឺ ត្រូវបានគេយល់ឃើញថា គឺតម្រង់ទៅកាន់ក្រុមហ៊ុន AstraZeneca ដែលមានរោងចក្រមួយនៅប្រទេសបែលហ្ស៊ិក។
សហភាពអឺរ៉ុប បានចោទប្រកាន់ AstraZenca ថាបានរំលោភកិច្ចសន្យា ហើយធ្វើការផ្គត់ផ្គង់ទៅចក្រភពអង់គ្លេសច្រើនជាង និងរួមទាំងបានដឹកជញ្ជូនវ៉ាក់សាំងផលិតនៅទ្វីបអឺរ៉ុបទៅកាន់ទីនោះផងដែរ។ សហភាពអឺរ៉ុបបានទាមទារឱ្យ AstraZeneca ទាញយកវ៉ាក់សាំងផលិតសម្រាប់អង់គ្លេសមកផ្គត់ផ្គង់ពួកគេវិញ។
ក្រុមហ៊ុន AstraZeneca បានច្រានចោលការទាមទារនេះ ហើយបាននិយាយថា ខ្លួនមិនបានរំលោភកិច្ចសន្យាទេ។ ចក្រភពអង់គ្លេសបានចុះកិច្ចសន្យាផ្ទាល់ជាមួយក្រុមហ៊ុននេះរយៈពេល ៣ ខែ មុនសហភាពអឺរ៉ុប ហើយក្រោមកិច្ចសន្យានោះ វ៉ាក់សាំងដែលផលិតនៅចក្រភពអង់គ្លេសត្រូវផ្គត់ផ្គង់ទៅទីនោះ ជាមុនសិន។
រឿងទាំងអស់នេះ កើតឡើងខណៈពេលដែល ផែនការរបស់សហភាពអឺរ៉ុបក្នុងការចាក់វ៉ាក់សាំងជូនប្រជាជនពេញវ័យចំនួន ៧០% ត្រឹមរដូវក្ដៅ គឺកំពុងបរាជ័យដោយសារបញ្ហាផលិតកម្មវ៉ាក់សាំង Pfizer/BioNTechនិង Moderna ដែលបង្កឱ្យមានកង្វះវ៉ាក់សាំងនៅទ្វីបនេះ៕