The Phnom Penh Post Search

Search form




Logo of Phnom Penh Post newspaper Phnom Penh Post - សហភាព​អឺរ៉ុប ​ចេញ​សេចក្តី​ព្រាងច្បាប់​ថ្មី​ ទប់ទល់​នឹង​ក្រុមហ៊ុន​បច្ចេកវិទ្យា​ធំៗ ​នៅ​ជុំវិញ​ពិភពលោក

សហភាព​អឺរ៉ុប ​ចេញ​សេចក្តី​ព្រាងច្បាប់​ថ្មី​ ទប់ទល់​នឹង​ក្រុមហ៊ុន​បច្ចេកវិទ្យា​ធំៗ ​នៅ​ជុំវិញ​ពិភពលោក

Content image - Phnom Penh Post
ក្រុមហ៊ុន​បច្ចេកវិទ្យា​ធំៗ​ដូចជា Google, Apple, Facebook និង​ Amazon ។ AFP

សហភាព​អឺរ៉ុប ​ចេញ​សេចក្តី​ព្រាងច្បាប់​ថ្មី​ ទប់ទល់​នឹង​ក្រុមហ៊ុន​បច្ចេកវិទ្យា​ធំៗ ​នៅ​ជុំវិញ​ពិភពលោក

កាលពី​ថ្ងៃ​អង្គារ​សហភាព​អឺរ៉ុប​បានចេញ​សេចក្តីព្រាងច្បាប់​ថ្មី ដើម្បី​ទប់ទល់​នឹង​ក្រុមហ៊ុន​បច្ចេកវិទ្យា​ធំៗ​ដូចជា Google Amazon និង Facebook ដែល​សុទ្ធ​ជា​ក្រុមហ៊ុន​បច្ចេកវិទ្យា​មានអំណាច​ខ្លាំងជាងគេ ក្នុង​ការទប់ស្កាត់​សុវត្ថិភាព និង​សន្តិសុខ​លើ​ប្រព័ន្ធ​អ៊ីនធឺណិត​របស់​ប្រទេស​ក្នុង​តំបន់​។

សេចក្តី​ព្រាងច្បាប់​នេះ​មាន​ឈ្មោះ​ថា ច្បាប់​ស្ដីពី​ការទទួល​ខុសត្រូវ​លើ​សេវាកម្ម​ឌីជីថល (DSA) និង​ទីផ្សារ​ឌីជីថល (DMA) បាន​គូសបញ្ជាក់​ពី​បទប្បញ្ញត្តិ​យ៉ាង​ជាក់លាក់ និង​កម្រិត​អំណាច​របស់​ក្រុមហ៊ុន​អ៊ីនធឺណិត​ពិភពលោក​ក្នុង​ទីផ្សារ​អឺរ៉ុប​។ ក្រុមហ៊ុន​ទាំងនោះ​រួមមាន Google Apple Amazon Facebook និង​ក្រុមហ៊ុន​ដទៃទៀត ដែល​អាច​ប្រឈម​នឹង​ការដាក់ពិន័យ​យ៉ាងធ្ងន់ធ្ងរ ប្រសិនបើ​បំពាន​ច្បាប់​។

អ្នកស្រី Margrethe Vestager ស្នងការ​សហភាព​អឺរ៉ុប​ទទួលបន្ទុក​បញ្ហា​ការប្រកួត​ប្រជែង និង​ជា​ប្រធាន​ផ្នែក​ឌីជីថល​សហភាព​អឺរ៉ុប​បានធ្វើ​បទបង្ហាញ​ពី​សេចក្តីព្រាងច្បាប់​នេះ​កាលពី​ថ្ងៃ​អង្គារ​កន្លងទៅ បន្ទាប់ពី​មាតិកា​មួយចំនួន​នៃ​ច្បាប់​ថ្មី​នេះ​ត្រូវ​បាន​បែកធ្លាយ​លើ​ប្រព័ន្ធ​ផ្សព្វផ្សាយ​មុន​ ១ ​ថ្ងៃ​។

អ្នកស្រី​បាន​និយាយថា សេចក្តី​ព្រាង​ច្បាប់​សម្រាប់​ប្លុក​អឺរ៉ុប​នេះ ធ្វើឡើង​ក្នុង​គោលបំណង​គ្រប់គ្រង​ប្រព័ន្ធ​អ៊ីនធឺណិត ពោល​គឺ​ធ្វើ​យ៉ាងណា​ឱ្យ «​មាន​សណ្តាប់ធ្នាប់​ល្អ​» និង​ធ្វើឱ្យ​ប្រសើរ​ឡើង​នូវ «​ការគ្រប់គ្រង​សុវត្ថិភាព​លើ​អ៊ីនធឺណិត​» ​ក្នុង​ទីផ្សារ​អនឡាញ​នេះ​។ ច្បាប់​ស្ដីពី​សេវាកម្ម​ឌីជីថល និង​ទីផ្សារ​ឌីជីថល​នឹង​បង្កើត​សេវាកម្ម​ដែលមាន​សុវត្ថិភាព និង​គួរឱ្យ​ទុកចិត្ត​បំផុត​ក្នុង​ការការពារ​សេរីភាព​នៃ​ការបញ្ចេញមតិ​លើ​ប្រព័ន្ធ​អ៊ីនធឺណិត​។

សហភាព​អឺរ៉ុប​បាន​ឱ្យ​ដឹងថា អ្នក​ដែល​ប្រព្រឹត្ត​ខុស​នឹង​ច្បាប់​នេះ​នឹង​ត្រូវ​ប្រឈម​នឹង​ការផាកពិន័យ​រហូតដល់​ ១០% ​នៃ​ចំណូល​របស់​ពួកគេ (​បើសិន ក្នុង​ករណី​ក្រុមហ៊ុន Google អាច​ស្មើនឹង​ ១៦ ​ពាន់​លាន​ដុល្លារ​ក្នុង​ករណី​ធ្ងន់ធ្ងរ​បំផុត ឬ​អាច​នឹង​ប្រឈម​ការក្ស័យធន​ផងដែរ​។

សហភាព​អឺរ៉ុប​ក៏​បាន​ស្នើឱ្យ​មានការ​ពិន័យ​ក្រុមហ៊ុន​ទាំងនេះ​ដល់ ៦% នៃ​ប្រាក់ចំណូល ឬ​ហាមឃាត់​មិនឱ្យ​ក្រុមហ៊ុន​ទាំងនេះ​ចូលក្នុង​ទីផ្សារ​អឺរ៉ុប​ទៀតផង​ក្នុងករណី​មាន​ការរំលោភបំពាន​ច្បាប់​ធ្ងន់ធ្ងរ​ម្តង​ហើយ​ម្តងទៀត ដែល​បង្ក​គ្រោះថ្នាក់​ដល់​សន្តិសុខ​របស់​ពលរដ្ឋ​អឺរ៉ុប​។

ច្បាប់​ស្ដីពី​សេវាកម្ម​ឌីជីថល​ និង​ទីផ្សារ​ឌីជីថល​បាន​កំណត់​លក្ខខណ្ឌ​តឹងរ៉ឹង​ជាច្រើន​លក្ខខណ្ឌ​សម្រាប់​ការធ្វើ​ជំនួញ​នៅក្នុង​ប្រទេស​ចំនួន​ ២៧ ​របស់​សហភាព​អឺរ៉ុប​ ខណៈ​ដែល​អាជ្ញាធរ​អឺរ៉ុប​មាន​គោលបំណង ទប់ស្កាត់​ការរីក​រាលដាល​នៃ​ការផ្សាយ​ព័ត៌មាន​មិន​ពិត និង​ការវាយប្រហារ​តាមរយៈ​ពាក្យសម្ដី​លើ​អ៊ីនធឺណិត និង​ការកាន់កាប់​ទីផ្សារ​ផ្ដាច់មុខ​ក្នុង​ទីផ្សារ​អឺរ៉ុប​របស់​ក្រុមហ៊ុន​បច្ចេកវិទ្យា​យក្ស​ទាំងអស់នេះ​ផងដែរ​។

មនុស្ស​ជំនិត​របស់​គណៈកម្មការ​សហភាព​អឺរ៉ុប​បាន​និយាយថា ក្រុមហ៊ុន​ចំនួន​ ១០ កំពុង​ត្រូវបាន​គេ​កំណត់​ជា​គោលដៅ​ក្នុងការ​អនុវត្ត​ច្បាប់ នេះ និង​កំពុងតែ​ប្រកួតប្រជែង​ខ្លាំងក្លា​ក្នុង​ទីផ្សារ​អឺរ៉ុប ដែល​ច្បាប់​នេះ​នឹង​មាន​នូវ​បទប្បញ្ញត្តិ​ជាក់លាក់ ដើម្បី​កំណត់​អំណាច​របស់​ពួកគេ​ក្នុង​ការកាន់កាប់​ទីផ្សារ​ទាំងនេះ​។

ក្រុមហ៊ុន​ដែល​អាច​ត្រូវគេ​រឹតបន្តឹង​បទប្បញ្ញត្តិ រួមមាន ក្រុមហ៊ុន​អាមេរិក​ដូចជា​ក្រុមហ៊ុន Facebook ​ក្រុមហ៊ុន​ Google ​ក្រុមហ៊ុន​ Amazon ក្រុមហ៊ុន​ Apple ​ក្រុមហ៊ុន​ Microsoft និង​ក្រុមហ៊ុន SnapChat និង​ក្រុមហ៊ុន​ធំៗ​របស់​ចិន​ដូចជា​ក្រុមហ៊ុន​ Alibaba និង​ក្រុមហ៊ុន​ Bytedance ​ព្រមទាំង​ក្រុមហ៊ុន​ Samsung ​របស់​ប្រទេស​កូរ៉េ​ខាងត្បូង និង​ក្រុមហ៊ុន ​Booking.com ​របស់​ប្រទេស​ Netherlands ​ផងដែរ​។

សំណើ​សេចក្ដីព្រាងច្បាប់​នេះ​នឹងត្រូវ​ឆ្លងកាត់​ដំណើរការ​ផ្តល់​សច្ចាប័ន​វែងឆ្ងាយ និង​ស្មុគស្មាញ​ទៀត​ដោយមាន​រដ្ឋ​ចំនួន​ ២៧ ​របស់​សហភាព​អឺរ៉ុប សភាអឺរ៉ុប ព្រមទាំង​ការចរចា​រវាង​​ក្រុមហ៊ុន សមាគម​ពាណិជ្ជកម្ម​មុន​នឹង​មានការ​អនុម័ត​ច្បាប់​ចុងក្រោយ​ជា​ផ្លូវការ​។

យ៉ាងណាមិញ​ចំពោះ​ច្បាប់​សេវាកម្ម​ឌីជីថល​គឺជា​មធ្យោបាយ​មួយ​ដើម្បី​ផ្តល់ឱកាស​កាន់តែ​ច្រើនជាង​មុន​សម្រាប់​ឱ្យ​គណៈកម្មាធិការ​អឺរ៉ុប​ស្វែងរក​វេទិកា​ប្រព័ន្ធ​ផ្សព្វផ្សាយ​សង្គម​ណា​ដែល​បានអនុញ្ញាត​ឱ្យ​មាតិកា​ខុសច្បាប់​តាម​អ៊ីនធឺណិត​ដូចជា ការឃោសនា​ជ្រុលនិយម ការវាយប្រហារ​តាមរយៈ​ពាក្យសម្ដី​ព័ត៌មាន​មិន​ពិត និង​រូបភាព​អាសអាភាស​របស់​កុមារ​ផងដែរ​។

តាមរយៈ​ច្បាប់​ទីផ្សារ​ឌីជីថល​សហភាព​អឺរ៉ុប​កំពុង​ព្យាយាម​ផ្តល់​អំណាច​ថ្មី​ដល់ទី​ក្រុង​ប្រ៊ុចសែល ដើម្បី​អនុវត្ត​ច្បាប់​នៃ​ការប្រកួតប្រជែង​ឱ្យបាន​លឿន និង​ជំរុញឱ្យមាន​តម្លាភាព​កាន់តែខ្លាំង​នៅក្នុង​ក្បួន​ដោះស្រាយ និង​ការប្រើប្រាស់​ទិន្នន័យ​ផ្ទាល់ខ្លួន​។ ច្បាប់​នេះ​ត្រូវបាន​រចនា​ឡើង​ដើម្បី​ធ្វើ​បច្ចុប្បន្នភាព​ច្បាប់​ដែលមាន​ស្រាប់​តាំងពី​ឆ្នាំ​ ២០០៤ ​តាំងពី​ពេលដែល​ក្រុមហ៊ុន​អ៊ីនធឺណិត​ធំៗ​ជាច្រើន​សព្វថ្ងៃ​មិនទាន់មាន​វត្តមាន​នៅឡើយ​។

អ្នកស្រី Karen Bhatia ​ប្រធាន​កិច្ចការ​រដ្ឋាភិបាល និង​គោលនយោបាយ​សាធារណៈ​របស់​ក្រុមហ៊ុន Google ​បាន​និយាយថា​៖ «​យើង​នឹងសិក្សា​ដោយ​យកចិត្ត​ទុកដាក់​នូវ​សំណើ​របស់​គណៈកម្មការ​អឺរ៉ុប​ក្នុង​រយៈពេល​ ២-៣ ​ថ្ងៃ​ខាងមុខ​។ ទោះយ៉ាង​ណាក្ដី​យើង​មាន​ការព្រួយបារម្ភ​ថា ពួកគេ​ហាក់ដូចជា​ផ្តោត​សំខាន់​ទៅលើ​ក្រុមហ៊ុន​មួយ​ក្តាប់​តូច​ប៉ុណ្ណោះ​»​។

អ្នកនាំពាក្យ​របស់​ក្រុមហ៊ុន Facebook បាន​និយាយថា បទប្បញ្ញត្តិ​ដែល​បានស្នើ​ឡើង​ «​កំពុង​នៅ​ផ្លូវត្រូវ​ហើយ​ក្នុង​ការជួយ​ថែរក្សា​អត្ថប្រយោជន៍​របស់​អ៊ីនធឺណិត​» និង​បាន​ទទូចថា ក្រុមហ៊ុន​កំពុង​ទន្ទឹងរង់ចាំ​ «​ការចូលរួម​ជាមួយ​សមាជិកសភា​សហភាព​អឺរ៉ុប​នាពេល​ឆាប់ៗ​»​។

ក្រុមហ៊ុន​នេះ​ក៏បាន​និយាយ​សំដៅលើ​ក្រុមហ៊ុន​បច្ចេកវិទ្យា​យក្ស Apple ដោយ​ទទូចថា ខ្លួន​ចង់ឱ្យ​ច្បាប់​ជួយ​កំណត់ព្រំដែន​សម្រាប់​ក្រុមហ៊ុន​ផលិត​ទូរស័ព្ទ iPhone ផង ដើម្បី​ធ្វើយ៉ាងណា​កុំឱ្យ​ក្រុមហ៊ុន​នេះ​ធ្វើអ្វី​ប៉ះពាល់​ដល់​សិទ្ធិ​ឯកជនភាព​របស់​អ្នកប្រើប្រាស់​។

ក្រុម​សកម្មជន​ Avaaz បាន​និយាយថា ច្បាប់​នេះ​បង្ហាញ​ពី «​សកម្មភាព​ក្លាហាន និង​ស្វាហាប់​» ប៉ុន្តែ​បានស្នើ​ឱ្យ​ទីក្រុង​ប្រ៊ុចសែល​អនុវត្ត​ច្បាប់​នេះ​ឱ្យបាន​ពេញលេញ និង​ប្រាកដ​ប្រជា​បំផុត​។

ប្រធាន​ផ្នែក​ច្បាប់​លោក SarahA ndrew បាន​និយាយថា​៖ «​នេះ គឺជា​ក្របខ័ណ្ឌ​ដ៏​រឹងមាំ​មួយ​ហើយ​សហគមន៍​អឺរ៉ុប​មាន​គុណតម្លៃ​ខ្ពស់ និង​ប្រជាធិបតេយ្យ​ក្នុងការ​គ្រប់គ្រង និង​ដោះស្រាយ​បញ្ហា​ដែល​បង្កឡើង វេទិកា​បណ្ដាញ​សង្គម​នានា​ដើម្បី​គ្រប់គ្រង​កំណត់​ការឈាន​ដល់​ការផ្សព្វផ្សាយ​ព័ត៌មាន​មិន​ពិត​ និង​ការពារ​សេរីភាព​បញ្ចេញមតិ​របស់​អ្នកប្រើប្រាស់​»​។

សមាជិកសភា​អឺរ៉ុប​លោក​ David Cormand ដែលជា​សមាជិក​គណៈកម្មាធិការ​ទីផ្សារ​បាន​និយាយថា ច្បាប់​នេះ​គឺជា «​ជំហាន​ឆ្ពោះ​ទៅរក​ទិសដៅ​ត្រឹមត្រូវ​» ប៉ុន្តែ​ខ្វះ​មហិច្ឆតា​ក្នុង​ «​ការទទួល​បាន​អំណាច​លើ​សេវាកម្ម​ឌីជីថល​របស់ខ្លួន​បន្ដិច​»៕

អត្ថបទគួរចាប់អារម្មណ៍