.jpg)
ទង់ជាតិរបស់សហភាពអឺរ៉ុប ដែលមានប្រទេសចំនួន ២៨ ជាសមាជិក។ Myanmar Times
ក្រុងយ៉ាំងហ្គោន៖ កាលពីថ្ងៃចន្ទ សហភាពអឺរ៉ុបបានអំពាវនាវឲ្យរដ្ឋាភិបាលមីយ៉ាន់ម៉ា ធ្វើតាមរបាយការណ៍មួយរបស់គណៈកម្មាធិការអន្តរជាតិដែលបានបង្កើតឡើងដោយរដ្ឋាភិបាល ដែលបានឃើញអំពើឧក្រិដ្ឋកម្មសង្គ្រាម និងការរំលោភសិទ្ធិមនុស្សយ៉ាងធ្ងន់ធ្ងរ ត្រូវបានធ្វើឡើងនៅក្នុងរដ្ឋរ៉ាក់ឃីនកាលពីឆ្នាំ ២០១៧ កន្លងទៅ។
សហភាពអឺរ៉ុបដែលមានសមាជិក ២៨ ប្រទេស បានស្នើឲ្យរដ្ឋាភិបាលមីយ៉ាន់ម៉ា «ធ្វើការស៊ើបអង្កេតឲ្យបានត្រឹមត្រូវ ស្របទៅតាមស្តង់ដាអន្តរជាតិ» អំពីការរំលោភសិទ្ធិមនុស្សនៅក្នុងរដ្ឋរ៉ាក់ឃីន ដែលបានរាយការណ៍ដោយគណៈកម្មការស៊ើបអង្កេតឯករាជ្យ។
នៅក្នុងសេចក្តីថ្លែងការណ៍មួយ សហភាពអឺរ៉ុបបានថ្លែងថា៖ «វិធានការគួរឲ្យជឿជាក់ត្រូវបានធ្វើឡើងដោយយុត្តិធម៌ ដល់អ្នកដែលត្រូវទទួលខុសត្រូវ ចំពោះការរំលោភយ៉ាងធ្ងន់ធ្ងរទាំងនេះ ជាពិសេសដោយកងកម្លាំងសន្តិសុខរបស់មីយ៉ាន់ម៉ា»។
សេចក្តីថ្លែងការណ៍បានបន្ថែមថា៖ «យើងសូមស្វាគមន៍ចំពោះអនុសាសន៍ ជុំវិញការធ្វើកំណែទម្រង់ច្បាប់រដ្ឋធម្មនុញ្ញ នៅក្នុងកងកម្លាំងការពារជាតិមីយ៉ាន់ម៉ា ដើម្បីទប់ស្កាត់មិនឲ្យមានការរំលោភសិទ្ធិមនុស្សឡើងវិញ នៅក្នុងប្រទេសនេះ»។
គណៈកម្មការនោះ បានដឹកនាំដោយអ្នកការទូតជាន់ខ្ពស់ហ្វីលីពីន គឺលោក រូសារីអូ ម៉ាណាឡូ បានថ្លែងនៅក្នុងរបាយការណ៍របស់ខ្លួនមានកម្រាស់ ៤៦១ ទំព័រ ថា អំពើឧក្រិដ្ឋកម្មសង្គ្រាមបានប្រព្រឹត្តនៅក្នុងយុទ្ធនាការយោធាទ្រង់ទ្រាយធំប្រឆាំងកងកម្លាំងការពាររូហ៊ីងយ៉ាអារ៉ាកាន (ARSA) នៅរវាងថ្ងៃទី ២៥ ខែសីហា និងថ្ងៃទី ៥ ខែ កញ្ញា ឆ្នាំ ២០១៧។
គណៈកម្មការបានថ្លែងថា យុទ្ធនាការសម្លាប់អង្គាល ៣ លើក ត្រូវបានធ្វើឡើងនៅក្នុងការបង្ក្រាបទៅលើកម្លាំង ARSA៕ Myanmar Times/SK
