កាលពីថ្ងៃពុធ ទី ១៧ កុម្ភៈ សហរដ្ឋអាមេរិកបានចោទប្រកាន់អ្នកសរសេរកម្មវិធីកុំព្យួទ័រកូរ៉េខាងជើងចំនួន ៣ នាក់ ទាក់ទងនឹងការវាយប្រហារតាមអ៊ីនធឺណិត។ ការវាយប្រហារតាមអ៊ីនធឺណិត គឺមានគោលបំណងលួចយកប្រាក់ជាង ១,៣ ពាន់លានដុល្លារ ជាហិរញ្ញវត្ថុអេឡិចត្រូនិចពីធនាគារ និងគោលដៅផ្សេងទៀត។
ការចោទប្រកាន់នេះ គឺជាការចោទបន្ថែមទៅលើបទចោទប្រកាន់មុនៗរបស់បុរសទាំង ៣ នាក់នេះ ដែលបានលួចប្លន់រូបិយប័ណ្ណអេឡិចត្រូនិកនៅប្រទេសស្លូវេនី និងឥណ្ឌូនេស៊ី។ ក្រុមនេះត្រូវបានគេចោទប្រកាន់ផងដែរថា មានគោលបំណងវាយលុកចូលទៅក្នុងប្រព័ន្ធ AMC Theatres និងក្រុមហ៊ុនភាពយន្តអង់គ្លេស Mammoth Screen។
ក្រសួងយុត្តិធម៌អាមេរិកបានឱ្យដឹងថា ពួកគេបានកំណត់គោលដៅលើធនាគារ និងក្រុមហ៊ុនរូបិយប័ណ្ណអេឡិចត្រូនិកនៅអាមេរិក បង់ក្លាដែស អង់គ្លេស ម៉ិកស៊ិក ប៉ាគីស្ថាន និងវៀតណាម៕