ប្រធានាធិបតីអាមេរិកលោក Joe Biden បានប្រកាសពីគ្រោះមហន្តរាយនៅតំបន់ជាច្រើននៃរដ្ឋ Texas។ រដ្ឋ Texas បានរងគ្រោះដោយព្យុះរដូវរងាធ្ងន់ធ្ងរ ដែលបានធ្វើឱ្យមនុស្សរាប់លាននាក់គ្មានថាមពលអគ្គិសនីប្រើប្រាស់ ខណៈសីតុណ្ហភាពកាន់តែត្រជាក់ខ្លាំង។
រដ្ឋបាលលោក Biden បានប្រកាសភាពអាសន្នរួចហើយក្នុងរដ្ឋ Texas រួមជាមួយរដ្ឋ Oklahoma និង Louisiana។
នៅក្នុងសេចក្តីថ្លែងការណ៍មួយចេញផ្សាយដោយសេតវិមានលោក Biden បាននិយាយថា លោកបានបញ្ជាឱ្យផ្តល់ជំនួយទៅប្រជាជនដែលកំពុងរងគ្រោះដោយគ្រោះធម្មជាតិនេះ។
សេចក្តីថ្លែងការណ៍បានសរសេរថា ជំនួយទាំងនោះមានដូចជាជម្រកបណ្តោះអាសន្នការជួសជុលផ្ទះ ប្រាក់កម្ចីមួយចំនួនចំពោះការខូចខាតទ្រព្យសម្បត្តិដែលមិនមានធានារ៉ាប់រងនិងកម្មវិធីផ្សេងទៀត ដើម្បីជួយបុគ្គល និងម្ចាស់អាជីវកម្មដែលប៉ះពាល់ដោយសារគ្រោះធម្មជាតិនេះ៕