.jpg)
កងទ័ពរដ្ឋាភិបាលធ្វើដំណើរឆ្ពោះទៅតំបន់ឈរជើងរបស់ក្រុមជីហាដក្នុងសង្កាត់ Hajar alAswad។ AFP
ក្រុងបេរូត: ក្រុមអ្នកឃ្លាំមើល បានឲ្យដឹងថា កងទ័ពគាំទ្ររដ្ឋាភិបាលនិងក្រុមរដ្ឋអ៊ិស្លាម (IS) បានចុះកិច្ចព្រមព្រៀងបទឈប់បាញ់ក្នុងរយៈពេលដ៏ខ្លីមួយនៅក្នុងក្រុងដាម៉ាសភាគខាងត្បូងកាលពីថ្ងៃសៅរ៍ បន្ទាប់ពីមានការប្រយុទ្ធគ្នាដ៏សាហាវអស់រយៈពេលជាច្រើនសប្តាហ៍នៅក្នុងតំបន់ឈរជើងដ៏រឹងមាំ ចុងក្រោយរបស់ក្រុមជីហាដនៅក្នុងរដ្ឋធានីនៅស៊ីរី។
កាលពីខែមុន របបរបស់ប្រធានាធិបតី បាសារ អាល់អាសាដ បានបើកការវាយប្រហារទ្រង់ទ្រាយធំមួយប្រឆាំងក្រុម IS នៅក្នុងសង្កាត់ Hajar al-Aswad នៅក្នុងក្រុងដាម៉ាស និងជំរំជនភៀសខ្លួនប៉ាឡេស្ទីន Yarmuk។ ការប៉ះទង្គិចគ្នា បានបង្កការបាត់បង់យ៉ាងធ្ងន់ធ្ងរសម្រាប់ភាគីទាំងសងខាង។
ក្រុមឃ្លាំមើលសិទ្ធិមនុស្សស៊ីរី (SOHR) មានមូលដ្ឋាននៅអង់គ្លេសបានឲ្យដឹងថា៖ «កិច្ចព្រមព្រៀងឈប់បាញ់នោះ បានចូលជាធរមានពាក់កណ្តាលនៅថ្ងៃនេះ និងមានរយៈពេល ៥ ម៉ោងហើយ»។
ប្រមុខក្រុមឃ្លាំមើលលោក Rami Abdel Rahman បានថ្លែងប្រាប់ AFP កាលពីល្ងាចថ្ងៃសៅរ៍ថា កិច្ចព្រមព្រៀងឈប់បាញ់ ដែលទំនងជាសេចក្តីផ្តើម មុនពេលឈានដល់ការជម្លៀសរបស់ក្រុមយុទ្ធជនក្រុម IS ចេញពីតំបន់ខាងលើ កំពុងនៅជា ធរមាន នៅឡើយនោះ។
លោកបានថ្លែងថា បទឈប់បាញ់ត្រូវបានធ្វើការចរចា ដោយសម្ព័ន្ធមិត្តរបស់របបស៊ីរី គឺរុស្ស៊ី និងក្រុមខាងប៉ាឡេស្ទីនគាំទ្ររដ្ឋាភិបាល។
ប៉ុន្តែ ទីភ្នាក់ងារសារព័ត៌មានសាណាគ្រប់គ្រងដោយរដ្ឋនៅស៊ីរី បានស្រង់សម្តីពីប្រភពយោធាមួយ ខណៈធ្វើការបដិសេធកិច្ចព្រមព្រៀងនោះ។
កងកម្លាំងដែលមានភក្តីភាពចំពោះរដ្ឋាភិបាល បានបើកការវាយប្រហារដ៏សាហាវមួយនៅក្នុងក្រុងដាម៉ាសភាគខាងត្បូង បន្ទាប់ពីបានច្បាំងដណ្តើមតំបន់ឈរជើងដ៏រឹងមាំរបស់ក្រុមឧទ្ទាមក្នុងតំបន់ Ghouta ភាគខាងជើងក្នុងខែមេសា៕
