ក្រុងស៊ុយ៉ាហ្គីយ៉ាៈ អ្នកឆ្លើយឆ្លងសារព័ត៌មាន AFP ម្នាក់ និងប្រព័ន្ធផ្សព្វផ្សាយរដ្ឋ បានឲ្យដឹងថា ការរៀបចំជម្លៀសប្រជាពលរដ្ឋរាប់ពាន់នាក់ចេញពីទីប្រជុំជនពីរ ដែលគាំទ្ររបបស៊ីរី បន្ទាប់ពីត្រូវឡោមព័ទ្ធដោយក្រុមឧទ្ទាមរយៈពេល ៣ឆ្នាំមក។
នៅមិនទាន់មានការកំណត់កាលបរិច្ឆេទសម្រាប់ការចាប់ផ្តើមជម្លៀសប្រជាជនចេញពីក្រុង Fuaa និង Kafraya នៅក្នុងខេត្ត Idlib ភាគពាយព្យនៃប្រទេសនេះ នៅឡើយទេ ប៉ុន្តែពួកគេអាចនឹងចាប់ផ្តើមនៅក្នុងរយៈពេលប៉ុន្មានថ្ងៃខាងមុខនេះ។
ក្រុងដែលមានក្រុមអ្នកកាន់និកាយស៊ីអ៊ីតភាគច្រើនរស់នៅ គឺជាតំបន់ដែលនៅសេសសល់ចុងក្រោយគេ ដែលស្ថិតនៅក្រោមការហ៊ុមព័ទ្ធនៅក្នុងប្រទេសស៊ីរី ជាកន្លែងដែលកងកម្លាំងរបស់រដ្ឋាភិបាល បានខិតខំប្រឹងប្រែងការពារយ៉ាងខ្លាំងក្លាក្នុងសង្គ្រាមរយៈពេល៧ឆ្នាំនៅក្នុងប្រទេសនេះ។
អ្នកឆ្លើយឆ្លងព័ត៌មាន AFP ម្នាក់បាននិយាយថា កាលពីថ្ងៃពុធ រនាំងបាំងផ្លូវជាច្រើនត្រូវបានគេដកចេញដើម្បីធ្វើដំណើរឆ្ពោះទៅកាន់ទីប្រជុំជនFuaa និង Kafraya ដែលអនុញ្ញាតឱ្យរថយន្តក្រុងចំនួន៨៤គ្រឿង ចូលទៅបាន។
ភ្នាក់ងារព័ត៌មាន SANA បានបញ្ជាក់ផងដែរថា រថយន្តក្រុងទាំងនោះ បានទៅដល់ហើយ ដើម្បីជម្លៀសប្រជាជនចេញពីទីប្រជុំជនទាំងនោះ៕ NS