.jpg)
ក្រុមបាតុករចេញតាមដងផ្លូវក្នុងការតវ៉ាទាមទារឲ្យប្រធានាធិបតីចុះចេញពីតំណែង។ AFP
ក្រុងសាន់ត្យាហ្គោ៖ មនុស្ស ៥ នាក់បានស្លាប់ កាលពីថ្ងៃអាទិត្យ នៅពេលរោងចក្រមួយកន្លែងត្រូវបានក្រុមចោរដុតនៅជិតរដ្ឋធានីសាន់ត្យាហ្គោរបស់ប្រទេស ស៊ីលី ដោយបានបង្កឲ្យមានចំនួនអ្នកស្លាប់នៅក្នុងរលកចលាចលកើនឡើងដល់ ៧ នាក់ ខណៈអាជ្ញាធរបានបន្តប្រកាសអាសន្ននៅក្នុងប្រទេស។
ប៉ូលិស និងយោធា បានបាញ់ឧស្ម័នបង្ហូរទឹកភ្នែក និងប្រើប្រាស់កាណុងបាញ់ទឹកប្រឆាំងក្រុមអ្នកតវ៉ានៅក្នុងទីក្រុង ខណៈការប៉ះទង្គិចជុំវិញការដំឡើងថ្លៃប្រេងខ្ពស់ និងការខ្វែងគំនិតគ្នាក្នុងសង្គមបានធ្វើឲ្យផ្ទុះហិង្សាឈានដល់ថ្ងៃទី ៣។
សេវាដឹកជញ្ជូនសាធារណៈស្ទើរតែទាំងអស់ត្រូវបានផ្អាកដំណើរការទាំងស្រុងនៅក្នុងទីក្រុងសាន់ត្យាហ្គោ ដោយហាងលក់ទំនិញមួយចំនួន បានបិទទ្វារ និងជើងហោះហើរខ្លះ ត្រូវបានលុបចោលនៅព្រលានយន្តហោះអន្តរជាតិ ដោយបានបណ្តាលឲ្យមនុស្សរាប់ពាន់នាក់ជាប់គាំង និងមិនអាចចាកចេញទៅបានដោយសារបម្រាមគោចរណ៍។
ក្រោយពីកិច្ចប្រជុំបន្ទាន់មួយកាលពីរសៀលថ្ងៃអាទិត្យ ប្រធានាធិបតីលោក ស៊ីបាស្ទៀន ភីណឺរ៉ា បានការពារការសម្រេចចិត្តរបស់លោកក្នុងការប្រកាសអាសន្ននៅក្នុង ប្រទេស និងបានធ្វើការដាក់ពង្រាយកងទ័ពយ៉ាងច្រើននៅតាមដងផ្លូវនានាសម្រាប់លើកដំបូង ចាប់តាំងពីមានរបបផ្តាច់ការយោធារបស់លោក អូហ្គាស្តូ ភីណូឈិត ដែលបានគ្រប់គ្រងអំណាចនៅចន្លោះឆ្នាំ ១៩៧៤ ដល់ ១៩៩០។
លោក ភីណឺរ៉ា បានថ្លែងថា៖ «ប្រជាធិបតេយ្យមិនមែនគ្រាន់តែមានសិទ្ធិប៉ុណ្ណោះទេ វាមានកាតព្វកិច្ចដើម្បីស្វ័យការពារក្នុងការប្រើប្រាស់គ្រប់មធ្យោបាយទាំងអស់ ដែលប្រជាធិបតេយ្យបានផ្តល់ឲ្យដោយខ្លួនឯង ហើយគោលការណ៍ច្បាប់ គឺត្រូវប្រយុទ្ធប្រឆាំងក្រុមអ្នកដែលចង់បំផ្លាញវាតែប៉ុណ្ណោះ»។
ការប្រកាសអាសន្ននៅក្នុងប្រទេស ស៊ីលី នេះ ត្រូវបានបន្តធ្វើឡើងកាលពីថ្ងៃអាទិត្យ ដោយរដ្ឋមន្ត្រីមហាផ្ទៃ និងរដ្ឋមន្ត្រីសន្តិសុខ គឺលោក អេនដ្រេស ឆាដវិក បានថ្លែងថា ក្រឹត្យថ្មីៗជាច្រើនទៀតត្រូវបានព្រាងឡើងសម្រាប់ទីក្រុងអាន់តូហ្វាហ្គាស្តាភាគខាងជើង ក្រុងវ៉ាល់ឌីវៀរនៅភាគខាងត្បូង និងក្រុងផ្សេងទៀតដូចជា ទីក្រុងវ៉ាល់ប៉ារ៉ៃសូ ទីក្រុងទីមូកូ និងក្រុងប៉ុនតូ អារីណាស់៕ AFP/SK
