ក្រុងបាងកកៈ យោងតាមលទ្ធផលនៃការស្ទង់មតិទស្សនៈមួយ ដែលបានធ្វើឡើងដោយសាកលវិទ្យាល័យ សួនឌូស៊ីត រ៉ាចាផាត់ បានឲ្យដឹងថា មានមនុស្សភាគច្រើនចង់ឲ្យគណៈរដ្ឋមន្ត្រីថ្មីស្ថិតនៅក្រោមការគ្រប់គ្រងរបស់នាយករដ្ឋមន្ត្រីលោក ប្រាយុធ ចាន-អូចា ដើម្បីធ្វើការលុបបំបាត់អំពើពុករលួយនៅក្នុងការចំណាយថវិកា ដើម្បីគម្រោងផ្សេងៗរបស់រដ្ឋាភិបាល។
ការស្ទង់មតិត្រូវបានគេធ្វើឡើងកាលពីថ្ងៃទី ១០-១៣ ខែ កក្កដា ទៅលើមនុស្សចំនួន ១ ១៨៨ នាក់ នៅទូទាំងប្រទេស ដើម្បីចងក្រងទស្សនៈរបស់ពួកគេទៅលើគណៈរដ្ឋមន្ត្រីថ្មី ដែលគ្រប់ក្រសួងត្រូវតម្រូវឲ្យអនុវត្តទៅតាមគោលការណ៍ប្រតិបត្តិការ ដែលបានផ្តល់ឲ្យនៅក្នុងយុទ្ធសាស្ត្រជាតិ និងសេចក្តីថ្លែងការណ៍គោលនយោបាយរបស់រដ្ឋាភិបាលត្រូវបានប្រគល់ជូនសភានោះ។
ត្រូវបានសួរថាតើបញ្ហានយោបាយអ្វីខ្លះដែលពួកគេចង់ឲ្យគណៈរដ្ឋមន្ត្រីថ្មីដោះស្រាយនោះ? ចំនួន ៥៦,៣២ ភាគរយ បាននិយាយលើកឡើងអំពីអំពើពុករលួយនៅក្នុងការចំណាយថវិកាសម្រាប់គម្រោងផ្សេងៗ ចំនួន ៣៣,៩១ ភាគរយ ចង់ឲ្យបញ្ចៀសការធ្វើទុក្ខបុកម្នេញ និងការលាបពណ៌ដាក់គ្នា ចំនួន ២៥,៨៦ ភាគរយ ចង់ឲ្យគណៈរដ្ឋមន្ត្រីធ្វើកំណែទម្រង់នយោបាយឲ្យបានឆាប់ ដើម្បីធ្វើឲ្យត្រឹមត្រូវតាមបែបប្រជាធិបតេយ្យ ចំនួន ១៧,១៤ ភាគរយ ចង់ឲ្យគ្រប់ក្រសួងធ្វើការទទួលបានលទ្ធផលល្អប្រសើរដោយច្បាស់លាស់ និង ១៤,៣៧ ភាគរយ បាននិយាយថា គណៈរដ្ឋមន្ត្រីមិនត្រូវប្រើអំណាចផ្តាច់ការនោះទេ។
ទាក់ទងនឹងបញ្ហាសេដ្ឋកិច្ច ៦៣,៩៩ ភាគរយ បាននិយាយថា ពួកគេចង់ឲ្យគណៈរដ្ឋមន្ត្រីថ្មីនេះគ្រប់គ្រងតម្លៃទំនិញទាំងអស់ និងជំរុញឲ្យបង្កើនប្រាក់ខែបុគ្គលិក៕ BKP/SK