ក្រុងវ៉ាស៊ីនតោន៖ ខណៈប្រធានាធិបតីអាមេរិកលោក ដូណាល់ ត្រាំ បានចេញបញ្ជាឲ្យដកកងកម្លាំងអាមេរិកចេញពីប្រទេសអាល្លឺម៉ង់ និងការប្រឈមមុខនៅក្នុងសមរភូមិបោះឆ្នោតឡើងវិញ កាន់តែខ្លាំងឡើង អ្នកការទូតកំពូលរបស់លោក គឺលោក ម៉ៃក៍ ប៉ុមប៉េអូ កំពុងធ្វើដំណើរទស្សនកិច្ចទៅកាន់ក្រុមប្រទេសជាមិតុ្ត នៅអឺរ៉ុបភាគកណ្តាល និងអឺរ៉ុបភាគខាងកើត។
លោក ម៉ៃក៍ ប៉ុមប៉េអូ កាលពីថ្ងៃអង្គារ បានធ្វើដំណើរទស្សនកិច្ចរយៈពេល ៥ ថ្ងៃ ដែលនឹងបិទបញ្ចប់នៅក្នុងប្រទេសសម្ព័ន្ធមិត្តប៉ូឡូញ ដែលបានត្រៀមខ្លួនស្វាគមន៍ចំពោះវត្តមានកងកម្លាំងអាមេរិកមួយចំនួនក្នុងចំណោមកងកម្លាំង ដែលបានដកចេញពីប្រទេសអាល្លឺម៉ង់ ដើម្បីការពារប្រឆាំងរុស្ស៊ីជាសត្រូវប្រវត្តិសាស្ត្ររបស់ខ្លួននោះ។
លោក ប៉ុមប៉េអូ ក៏នឹងធ្វើដំណើរផងដែរ ទៅកាន់សាធារណរដ្ឋឆែក ប្រទេសស្លូវេនី និងអូទ្រីស ជាទីដែលលោក ប៉ុមប៉េអូ ត្រូវបានគេរំពឹងថា នឹងបង្ហាញយុទ្ធនាការរបស់លោក ដើម្បីឲ្យប្រទេសមួយចំនួនឈប់ប្រើទូរស័ព្ទ Huawei ដែលជាទូរគមនាគមន៍ខ្នាតយក្សរបស់ចិន ត្រូវបានគេចាត់ទុកថា ជាការគំរាមកំហែង ១ របស់ក្រុងវ៉ាស៊ីនតោន ខណៈវាបាននាំមុខនៅក្នុងការប្រើប្រាស់អ៊ីនធឺណិតជំនាន់ទី៥។
មន្ត្រីបានថ្លែងដោយមិនបានប្រាប់ព័ត៌មានលម្អិតជាមុនថា នៅក្នុងប្រទេសស្លូវេនី ជាទីដែលលោក ប៉ុមប៉េអូ នឹងក្លាយជារដ្ឋមន្ត្រីការបរទេសអាមេរិកដំបូងគេ បានធ្វើដំណើរទស្សនកិច្ចចាប់តាំងពីឆ្នាំ ២០០១ លោក ប៉ុមប៉េអូ នៅថ្ងៃព្រហស្បតិ៍ នឹងចុះហត្ថលេខាទៅលើកិច្ចព្រមព្រៀងមួយ ស្តីពីកម្មវិធី 5G នៅទីនោះ៕ AFP/SK