The Phnom Penh Post Search

Search form




Logo of Phnom Penh Post newspaper Phnom Penh Post - ស្វ៊ីសបដិសេធ​មិន​​ស៊ើប​អង្កេត​​រឿងពុករលួយ​លោកហ្សាដារី​

ស្វ៊ីសបដិសេធ​មិន​​ស៊ើប​អង្កេត​​រឿងពុករលួយ​លោកហ្សាដារី​

ស្វ៊ីសបដិសេធ​មិន​​ស៊ើប​អង្កេត​​រឿងពុករលួយ​លោកហ្សាដារី​

130211_17b
ប្រធានាធិបតី ប៉ាគីស្ថាន លោកអាស៊ីហ្វ អាលី ហ្សារដារី AFP

ក្រុង​អ៊ីស្លាម៉ាបាដៈ ក្រសួង​យុត្តិធម៌​របស់​ប៉ាគីស្ថាន បាន​និយាយ​កាលពី​ថ្ងៃ​អាទិត្យ​ថា​ ប្រទេសស្វ៊ីស បាន​បដិសេធ​​មិន​បើក​ឡើង​វិញ​នូវ​រឿង​ក្តី​ពុក​រលួយ​ជា​យូរ​មក​ហើយ​​ប្រឆាំង​​នឹង​​លោក​ប្រធានា​ធិបតី អាស៊ីហ្វ អាលី ហ្សាដារី ខណៈ​​លោកទទួល​បាន​​អភ័យ​ឯក​សិទ្ធិ​​ក្នុង​នាម​ជា​ប្រមុខ​រដ្ឋ​។

ការ​វិវត្តថ្មីនេះ អាច​​នឹង​បញ្ចប់​ជម្លោះ​រយៈពេលបី​ឆ្នាំ​ដែល​បាន​ដាក់​ឲ្យ​តុលាការ​កំពូល​ប៉ាគីស្ថាន ​ប្រឆាំង​នឹង​គណ​បក្ស​ប្រជា​ជន​ប៉ាគីស្ថាន​​​(PPP)​ ដែលកំពុង​កាន់​អំណាច​សព្វថ្ងៃដោយ​ធ្វើ​ឲ្យ​នាយក​រដ្ឋ​មន្រ្តី​ម្នាក់​បាត់​បង់​ការងារ​របស់​លោក និង​បាន​គំរាមកំហែង​​ផ្តួល​រំលំ​រដ្ឋា​ភិបាល​មុន​​​ការ​បញ្ចប់​អាណត្តិ​។

ប៉ាគីស្ថាន បាន​​សរសេរ​លិខិត​​ទៅ​​អាជ្ញា​ធរ​ស្វ៊ីស​កាល​ពី​ខែ​តុលា ជុំ​វិញ​ការ​ចោទ​ប្រកាន់​ ដែល​មាន​ទឹក​ប្រាក់​រាប់​លាន​ដុល្លារ​ប្រឆាំង​​នឹង​លោក ហ្សាដារី ដែលកើត​មាន​តាំង​ពី​ទសវត្សរ៍​ឆ្នាំ​១៩៩០ តាម ការ​ទទូច​សុំ​របស់​តុលាការ​​កំពូល​របស់​ប្រទេស​នេះ​។

លោក ហ្សាដារី និង​ភរិយា​​របស់​លោក​ដែល​បាន​ស្លាប់​ទៅ​ហើយ​និង​ ជាអតីត​នាយក​រដ្ឋ​មន្រ្តី​លោក​ស្រី បេណា​ហ្សៀរ​ ប៊ូតូ​ ត្រូវ​បាន​គេ​ចោទ​ប្រកាន់​ពីបទ​ប្រើ​ប្រាស់​ធនាគារ​ស្វ៊ីស​ដើម្បី​លាង​លុយ​១២​​លាន ​ដុល្លារ​ក្នុង​រឿង​ស៊ីសំណូក​​ដែល​គេ​បាន​ចោទ​ប្រកាន់​។

មន្រ្តី​កំពូល​ក្នុង​ក្រសួង​​យុត្តិ​ធម៌ លោកស្រី​ យ៉ាស្មីន អាប់​បាស៊ីបាន​ប្រាប់​ AFP កាល​ពី​ថ្ងៃ​អាទិត្យ​ថា ស្វ៊ីស បាន​ឆ្លើយ​តប​ថា ពួក​គេ នឹង​មិន​បើក​ឡើង​វិញ​នូវ​​រឿង​ក្តី​ដែល​​ត្រូវ​បាន​គេ​ផ្អឹប​ទុក​នៅ​ពេល​ដែល​លោកហ្សាដារី បាន​ក្លាយ​​ជា​​ប្រមុខ​រដ្ឋ​កាល​ពី​ឆ្នាំ​២០០៨​។

លោក​ស្រី បាន​បញ្ជាក់​ថា​៖«​ពួក​គេបាន​ឆ្លើយ​តប​នឹង​លិខិត​នេះ និង​បាន​និ​យាយថាលោក​ប្រធានា​ធិបតី មាន​​អភ័យ​ឯក​សិទ្ធិ​​។ នេះ​គឺជា​បញ្ហា​ដ៏សំខាន់ ហើយ​ពួក​គេ បាន​បញ្ជាក់​យ៉ាងច្បាស់ថា លោក​ប្រធានា​ធិបតីរូបនេះ មាន​អភ័យឯក​សិទ្ធិ​»​។

តុលាការ​កំពូល​ប៉ាគីស្ថាន បាន​ចំណាយ​ពេល​ជិត​បី​ឆ្នាំ​ទាម​ទារ​ឲ្យ​រដ្ឋា​ភិបាល​ចម្រុះ​ដែល​ដឹកនាំ​ដោយ PPP ស្នើ​ឲ្យ​ស្វ៊ីស​បើក​ឡើង​វិញ​នូវ​រឿង​ក្តី​​ទាំង​នេះ៕ AFP​​/​​NR

អត្ថបទគួរចាប់អារម្មណ៍