កាលពីថ្ងៃពុធ ទី ២៤ មីនា អាជ្ញាធរហុងកុងបានបញ្ឈប់ការប្រើប្រាស់វ៉ាក់សាំងកូវីដ ១៩ ដែលផលិតដោយក្រុមហ៊ុន Pfizer/ BioNTech។ ការបញ្ឈប់ការប្រើប្រាស់ គឺដោយសារមានបញ្ហាវេចខ្ចប់ដែលទំនងបង្កឡើងដោយការពន្លឿនតម្រូវការវ៉ាក់សាំង។
នៅក្នុងសេចក្តីថ្លែងការណ៍ដែលចេញផ្សាយរបស់ទីក្រុងហុងកុង កាលពីថ្ងៃទី ២៣ មីនាថា ទីក្រុងហុងកុងបានទទួលដំណឹងពីក្រុមហ៊ុន Fosun Industrial (ហុងកុង) ទាក់ទងនឹងបញ្ហាវេចខ្ចប់។ ក្រុមហ៊ុន Fosun Industrial (ហុងកុង) ដែលជាអ្នកចែកចាយវ៉ាក់សាំង Pfizer/ BioNTech នៅហុងកុង និងម៉ាកាវ បាននិយាយថា ក្រុមហ៊ុនបានរកឃើញកង្វះវេចខ្ចប់នៅបណ្តុំវ៉ាក់សាំងដែលបានដឹកជញ្ជូនមកលើកនេះ។
រដ្ឋាភិបាលហុងកុងបាននិយាយថា៖ «ក្រុមហ៊ុន BioNTech និង Fosun Pharma មិនបានរកឃើញហេតុផលណាមួយដែលថា វ៉ាក់សាំងនោះមិនមានសុវត្ថិភាពឡើយ។ ទោះយ៉ាងណា ការចែកចាយបណ្តុំវ៉ាក់សាំង Pfizer/BioNTech ចំនួន ២ ត្រូវបានផ្អាករហូតដល់មានការជូនដំណឹងបន្ថែម»៕