The Phnom Penh Post Search

Search form




Logo of Phnom Penh Post newspaper Phnom Penh Post - ហេតុអ្វី​បាន​ជា​ជប៉ុន ​នៅ​មិន​ព្រម​លុប​ចោល​​ការ​ប្រកួត​កីឡា​អូឡាំពិក​នៅ​តូក្យូ បើ​ទោះ​ជា​មាន​ការ​ជំទាស់​យ៉ាង​ណា​ក្តី?

ហេតុអ្វី​បាន​ជា​ជប៉ុន ​នៅ​មិន​ព្រម​លុប​ចោល​​ការ​ប្រកួត​កីឡា​អូឡាំពិក​នៅ​តូក្យូ បើ​ទោះ​ជា​មាន​ការ​ជំទាស់​យ៉ាង​ណា​ក្តី?

Content image - Phnom Penh Post
លោក Yoshihide Suga ចូលរួម​សន្និ​សីទកាសែត​នៅ​ទីក្រុង​តូក្យូកាលពីថ្ងៃទី ១៤ ឧសភា។ AFP

ហេតុអ្វី​បាន​ជា​ជប៉ុន ​នៅ​មិន​ព្រម​លុប​ចោល​​ការ​ប្រកួត​កីឡា​អូឡាំពិក​នៅ​តូក្យូ បើ​ទោះ​ជា​មាន​ការ​ជំទាស់​យ៉ាង​ណា​ក្តី?

នៅ​មិន​យូរ​ទៀត​ទេ ព្រឹត្តិការណ៍​ប្រកួត​កីឡា​អូឡាំពិក ទីក្រុង​តូក្យូ​ នឹង​ត្រូវ​ចាប់​ផ្ដើម​ក្នុង​រយៈពេល​ ២ ខែ​ខាង​មុខ​ ​បើទោះ​ជា​ស្ថានភាព​ជំងឺ​កូវីដ ១៩ នៅ​ប្រទេស​ជប៉ុន ​ហាក់​ស្ថិត​នៅ​ក្នុង​ស្ថានភាព​ប្រថុយប្រថាន​នៅ​ឡើយ​ ក្នុង​ការ​ប្រារព្ធ​ព្រឹត្តិការណ៍​ខ្នាត​ធំ​បែប​នេះ។

បើ​យោង​តាម​ការ​ស្ទង់មតិ ប្រជាជន​ជប៉ុន​កាល​ពី​ពេល​ថ្មីៗ​នេះ លទ្ធផល​ជាង ​៧០% ​បាន​សម្ដែង​ភាព​មិន​ពេញ​ចិត្ត​​ចំពោះ​ការ​សម្រេច​ឱ្យ​មាន​ព្រឹត្តិការណ៍​ប្រកួត​កីឡា​អូឡាំពិក​នេះ​ទេ ប៉ុន្តែ​គណៈកម្មាធិការ​អូឡាំពិក​អន្តរជាតិ (IOC) ​នៅ​តែ​ប្រកាន់​ជំហរ​ថា ​ព្រឹត្តិការណ៍​នេះ ​នឹង​ត្រូវ​តែ​កើត​ឡើង​ឱ្យ​ខាង​តែ​បាន។

នាយក​រដ្ឋមន្រ្តី​ជប៉ុន​លោក ​Yoshihide Suga ក៏​ដូចជា​អ្នក​រៀបចំ​ព្រឹត្តិការណ៍​ក្នុង​ស្រុក​ និង​គណៈកម្មាធិការ​​អូឡាំពិក​អន្តរជាតិ (IOC) តែងតែ​ប្រកាស​ជា​​ផ្លូវការ​ម្ដង​ហើយ​ម្ដង​ទៀត​ថា ព្រឹត្តិការណ៍​នេះ​នឹង​នៅ​​តែ​ប្រព្រឹត្ត​ឡើង​តាម​កាល​បរិច្ឆេទ​ ពោល​គឺ​​នៅ​ថ្ងៃទី ២៣​ ខែ​កក្កដា​ នៅ​ទីក្រុង​តូក្យូ។

ក្នុង​កិច្ចសន្យា​រវាង​គណៈកម្មាធិការ​ ​IOC និង​​ទីក្រុង​តូក្យូ​ ដែល​ជា​ម្ចាស់​ផ្ទះ មាន​ចែង​ពី​​មាត្រា ​១ ទាក់ទង​នឹង​ការ​លុប​ព្រឹត្តិការណ៍​នេះ​​ ពោល​គឺ​មាន​តែ​ខាង​គណៈកម្មាធិការ​ IOC ប៉ុណ្ណោះ ​ដែល​​មាន​សិទ្ធិ​ក្នុង​ការ​លុប​ចោល​មិនមែន​ខាង​ទីក្រុង​ ដែល​ជា​ម្ចាស់​​​ផ្ទះ​នោះ​ទេ។ នេះ​ក៏​ដោយសារ​តែ​ព្រឹត្តិការណ៍​កីឡា​អូឡាំពិក​ គឺ​ជា​កម្មសិទ្ធិ​ផ្តាច់​មុខ​របស់​គណៈកម្មាធិការ​ IOC។ នេះ​បើ​យោង​តាម​មេធាវី​កីឡា​អន្តរជាតិ​គឺ​ លោក Alexandre Miguel Mestre បាន​ប្រាប់​សារព័ត៌មាន​ ​BBC។

ហេតុផល ១ ​ទៀត​ ដែល​អាច​ត្រូវ​លុប​ព្រឹត្តិការណ៍​បាន ​គឺ​ក្នុង​ករណី​ដូចជា សង្គ្រាម​ ឬ​ភាព​វឹកវរ​ស៊ីវិល​ គឺ​ជា​ករណី​ដែល​ត្រូវ​គណៈកម្មាធិការ​ ​IOC ពិចារណា​ថា​ ត្រូវ​លុប​ចោល​ ឬ​យ៉ាងណា​ ក្នុង​ករណី​រក្សា​សុវត្ថិភាព​​ដល់​អ្នក​ចូលរួម​ទាំង​អស់​។​ ក្នុង​ករណី​នេះ​​ ជំងឺ​រាតត្បាត​កូវីដ ១៩ ក៏​ជា​ការ​គំរាម​កំហែង​ដែរ ទើប​បាន​ជា​មាន​ការ​ជំទាស់​ពី​សំណាក់​សាធារណជន​នានា​។

ប្រសិន​បើ​លុប​ចោល​ព្រឹត្តិការណ៍​នេះ​​មែន ការ​ខាត​បង់​ផ្នែក​ហិរញ្ញវត្ថុ ​និង​​នយោបាយ ​ស្ថិត​ក្នុង​កម្រិត​ខ្ពស់​ខ្លាំង​ដែរ​​ សូម្បី​តែ​ស្ថានភាព​ប្រទេស​ជប៉ុន​ ដែល​កំពុង​បន្ថែម​ពេល​ដាក់​ទីក្រុង​តូក្យូ​ និង​អូសាកា​​ក្នុង​ភាព​អាសន្ន គួប​ផ្សំ​នឹង​​ការ​សម្ដែង​ភាព​មិន​ពេញ​​ចិត្ត​ពី​​សំណាក់​សាធារណ​ជន​ក៏​នៅ​​តែ​មិន​អាច​បញ្ឈប់​ការ​សម្រេច​​របស់​​រដ្ឋាភិបាល​បាន​ដែរ​។

បើ​យោង​ទៅ​តាម​ការ​សិក្សា​របស់​សាកល​វិទ្យាល័យ Oxford ព្រឹត្តិការណ៍​នេះ​ ចំណាយ​ថវិកា​ច្រើន​ជាង​គេ​ក្នុង​​ប្រវត្តិសាស្ត្រ​។ តួលេខ​ផ្លូវ​ការ​បាន​ឱ្យ​ដឹង​ថា ព្រឹត្តិការណ៍​នេះ​នឹង​ចំណាយ​អស់ ១៥ ពាន់​លាន​ដុល្លារ ​កាល​ពី​ខែ​ធ្នូ ឆ្នាំ​មុន ប៉ុន្តែ​សវនកម្មជាតិ​របស់​ជប៉ុន​បាន​បន្ថែម​តួលេខ​ឱ្យ​ទៅ​ជា​ ២៦ ពាន់​លានដុល្លារ​ ដោយសារ​ត្រូវ​ចំណាយ​លើ​​វិធានការ​សុវត្ថិភាព​ការពារ​ជំងឺ​កូវីដ​ ១៩។

ក្រៅ​ពី​ការ​ខាត​បង់​ថវិកា​នៅ​មាន​ហេតុ​ផល​នយោបាយ​មួយ​ចំនួន​ទៀត​ ដែល​​ប្រទេស​ជប៉ុន​ត្រូវ​ពិចារណា​​។ ជាក់​ស្ដែងការ​ប្រកួត​បន្ទាប់​ជា​លក្ខណៈ​​​សកល ​ឆ្នាំ​ក្រោយ គឺ​ជា​ព្រឹត្តិការណ៍​រដូវ​រងា​នៅ​ខែ​កុម្ភៈ ឆ្នាំ ២០២២ ដែល​រៀបចំ​ឡើង​ដោយ​គូ​ប្រជែង​របស់​ខ្លួន​ គឺ​ទីក្រុង​ប៉េកាំង​នៃ​ប្រទេស​ចិន​។ ដូច្នេះ ទើប​ប្រទេស​ជប៉ុន​ហាក់​ខិតខំ​ប្រឹងប្រែង​ ដើម្បី​រៀបចំ​ព្រឹត្តិការណ៍​អូឡាំពិក​ឱ្យ​ទាល់​តែ​បាន។

ប្រទេស​ជប៉ុន​ ធ្លាប់​ធ្វើ​ជាម្ចាស់​ផ្ទះ​អូឡាំពិក​ចុង​ក្រោយ​បង្អស់​គឺ​ កាល​ពី​រដូវក្តៅ​ឆ្នាំ ១៩៦៤។​ ហើយ​នៅ​ពេល​នោះ​ហើយ​ គឺ​ជា​ពេល​មួយ​ដែល​ជប៉ុន​អាច​ស្តារ​មុខ​មាត់​ប្រទេស​ឡើង​វិញ ក្រោយ​​ពី​សង្គ្រាម​លោក​លើក​ទី២។

យ៉ាងណា​មិញ​អ្នក​នាំពាក្យ​របស់​គណៈកម្មាធិការ ​IOC គឺ​លោក Mark Adams បាន​ឱ្យ​ដឹង​កាល​ពី​ថ្ងៃ​ពុធ សប្ដាហ៍​មុន​ថា មតិ​សាធារណៈ​នឹង​មិន​​មាន​ឥទ្ធិពល​ដល់​ការ​សម្រេច​ចិត្ត​អ្នក​រៀបចំ​ ឬ​ក៏​ដៃគូ​របស់​ពួកគេ​ឡើយ​ ព្រោះ​ការ​សម្រេច​រៀប​ចំ​ព្រឹត្តិការណ៍​ទៅ​បាន​ គឺ​ស្ថិត​នៅ​ក្នុង​កណ្ដាប់​ដៃ​​អត្តពលិក និង​ប្រទេស​ដែល​ពួក​គេ​តំណាង​នោះ​ទេ។

កាល​ពី​​ដើម​ឆ្នាំ ២០២០ កន្លង​ទៅ​ ខណៈ​ពេល​ដែល​ជំងឺ​រាតត្បាត​បាន​រីក​រាលដាល​ស្ទើរ​គ្រប់​ប្រទេស​ មិន​មែន​ខាង​គណៈ​កម្មាធិការ ​IOC ឬ អ្នក​រៀបចំ​កម្មវិធី​ជា​អ្នក​សម្រេច​ឱ្យ​ពន្យារ​ព្រឹត្តិការណ៍​នេះ​ឡើយ​ ពោល​គឺ​អូស្រ្តាលី​ និង​កាណាដា​ទេ ​ដែល​សុំ​មិន​បញ្ជូន​​អត្តពលិក ​និង​ពន្យារ​ព្រឹត្តិការណ៍​នេះ។

បើ​យោង​តាម​សម្តី​របស់​អតីត​កីឡាករ​អូឡាំពិក​លោក ​Sebastian Coe បាន​​មាន​ប្រសាសន៍​ថា៖ «​អត្តពលិក​ភាគ​ច្រើន​ ដែល​ខ្ញុំ​ធ្លាប់​និយាយ​ជាមួយ គឺ​ចង់​ឱ្យ​ព្រឹត្តិការណ៍​នេះ​កើត​ឡើង​ បើ​ទោះ​ជា​គេ​ដឹង​ហើយ​ថា​ ការ​ប្រកួត​ក្នុង​ស្ថានភាព​នេះ ​មិន​មែន​ជា​ការ​ងាយ​ស្រួល​ក៏​ដោយ​»។

សូម្បី​ជយលាភី​កីទ្បា​វាយ​កូន​បាល់​ល្បី​ឈ្មោះ បំផុត​គឺ​កញ្ញា​ ​Naomi Osaka ក៏​គាំទ្រ​ចង់​ឱ្យ​ព្រឹត្តិការណ៍​នេះ​កើត​ឡើង​ដែរ​។ កញ្ញា​បាន​ឱ្យ​ដឹង​ថា៖ «ពិត​ហើយ ​ខ្ញុំ​ពិត​ជា​ចង់​ឱ្យ​ព្រឹត្តិការណ៍​នេះ​កើត​ឡើង ​ព្រោះ​ខ្ញុំ​ជា​អត្តពលិក​ ហើយ​ក្នុង​នាម​ជា​អត្តពលិក​នេះ​ ​គឺ​ជា​អ្វី​ដែល​យើង​រង់​ចាំស្ទើរ ១ ​ជីវិត​ហើយ»​។

ទោះ​យ៉ាង​ណា​ក្ដី​អគ្គលេខាធិការ​នៃ​គណបក្ស LDP ​ដែល​កំពុង​កាន់​អំណាច​របស់​ប្រទេស​ជប៉ុន ​លោក Toshihiro Nikai បាន​និយាយ​កាល​ពី​ខែ​មេសា​ថា៖ «​កីឡា​អូឡាំពិក​នឹង​ប្រព្រឹត្ត​ទៅ​ដោយ​គ្មាន​ន័យ​អ្វី​ឡើយ ប្រសិន​បើ​វា​បង្ក​ឱ្យ​មាន​ជំងឺ​កើន​ឡើង​កាន់​តែ​ច្រើន»។

ទោះ​ជា​យ៉ាងណាក្ដី​ កាល​ពី​ខែ​មេសា​​​កន្លង​ទៅ​ អ្នក​រៀបចំ​កម្មវិធី​បាន​ចេញ​ផ្សាយ​សៀវភៅ​ណែ​នាំ​ទី​២ បង្ហាញ​ពី​ពិធីសារ​សម្រាប់​ការពារ​ជំងឺ​កូវីដ ១៩ ​​រួម​បញ្ចូល​នូវ​វិធានការ​មួយ​ចំនួន​រួម​មាន​ក្រៅ​ពី​វិធានការ​ទូទៅ​ក្នុង​ការ​ការពារ​ជំងឺ​កូវីដ ១៩ ខាង​អ្នក​រៀបចំ​កម្មវិធី​នឹង​ធ្វើ​ការ​ផ្តល់​ការ​ធ្វើ​តេស្ត​កូវីដ ១៩​ ចំនួន ២ ​លើក​ដល់​អត្តពលិក និង​អ្នក​ដែល​ត្រូវ​ធ្វើ​ដំណើរ​មក​ប្រទេស​ជប៉ុន​ ហើយ​ក៏​នឹង​ត្រូវ​ធ្វើ​តេស្ត​ជា​ញឹកញាប់​រៀង​រាល់​ថ្ងៃ​ ដើម្បី​ធានា​សុវត្ថិភាព​។

ប្រសិន​បើ​អត្តពលិក​តេស្ត​វិជ្ជមាន​​នោះ ​ខាង​អ្នក​រៀបចំ​កម្មវិធី​នឹង​ត្រូវ​ដាក់​ពួក​គេ​ឱ្យ​នៅ​ដាច់​ដោយ​ឡែក ហើយ​នឹង​​មិន​ត្រូវ​បាន​អនុញ្ញាត​ឱ្យ​ចូលរួម​ប្រកួត​ប្រជែង​នោះ​ទេ​ ហើយ​អ្នក​ចូលរួម​ទាំង​អស់​នឹង​ត្រូវ​ដោនឡូត​កម្មវិធី​ចំនួន ២ ​សម្រាប់​រាយការណ៍​អំពី​សុខភាព​ និង​តាម​ដាន​ទីតាំង ដែល​ពួក​គេ​ធ្លាប់​បាន​ទៅ​នៅ​ក្នុង​ប្រទេស​ជប៉ុន​។ ​អត្តពលិក​នីមួយៗ ​នឹង​ទទួល​បាន​ស្មាតហ្វូន​ Samsung ម្នាក់ ​១ ​គ្រឿង​ នៅ​ពេល​មក​ដល់​ភូមិ​កីឡា​អូឡាំពិក និង​ភូមិ​ប៉ារ៉ាឡាំពិក​ដើម្បី​តាមដាន​ព័ត៌មាន​សុខភាព​។

ដោយ​ឡែក​ សម្រាប់​អ្នកគាំទ្រ​នៅ​ក្រៅ​ប្រទេស​ក៏​ត្រូវ​បាន​ហាម​ឃាត់​មិន​ឱ្យ​ចូល​រួម​ព្រឹត្តិការណ៍​អូឡាំពិក​ និង​ប៉ារ៉ាឡាំពិក​ដែរ​ ប៉ុន្តែ​ការ​សម្រេច ចិត្ត​នេះ​នឹង​ត្រូវ​ផ្លាស់​ប្ដូរ ឬ​យ៉ាង​ណា​នឹង​ត្រូវ​សម្រេច​បន្ថែម​នៅ​ខែ​មិថុនា​ខាង​មុខ​។

អត្តពលិក​​ក៏​ត្រូវ​ប្រើប្រាស់​មធ្យោបាយ​ធ្វើ​ដំណើរ​ដោយ​ខ្លួន​ឯង ចៀសវាង​​ការ​ប្រើប្រាស់​មធ្យោបាយ​សាធារណៈ​ និង​ហាម​មិន​ឱ្យ​ធ្វើ​ដំណើរ​ទៅ​កន្លែង​ទេសចរណ៍​ ផ្សារ​ទំនើប ​ភោជនីយដ្ឋាន ​បារ៍​ ឬ​កន្លែង​ហាត់​ប្រាណ​សាធារណៈ​ទេ។ អត្តពលិក​ក៏​តម្រូវ​​ឱ្យ​ចាក​ចេញ​ពី​ប្រទេស​ជប៉ុន ​ភ្លាម​ក្នុង​រយៈពេល​ ៤៨ ​ម៉ោង ក្រោយ​បញ្ចប់​ការ​​ប្រកួត​ផង​ដែរ។

ដោយ​ឡែក​អង្គការ​សុខភាព​ពិភព​លោក (WHO) ក៏​ព្រម​ទទួល​ស្គាល់​ការ​​សម្រេច​នេះ​ផង​ដែរ ដោយ​ទទូច​ឱ្យ​ជប៉ុន ធ្វើ​យ៉ាង​ណា​ធានា​ឱ្យ​បាន​សុវត្ថិភាព​បំផុត​ដល់​អ្នក​ចូលរួម​ក្នុង​ព្រឹត្តិការណ៍​នេះ៕

អត្ថបទគួរចាប់អារម្មណ៍