.jpg)
លោកអគ្គលេខាធិការអង្គការសហប្រជាជាតិ អង់តូនីញ៉ូ ហ្គុយតឺរេស ថ្លែងក្នុងអំឡុងសន្និសីទសារព័ត៌មាន។ AFP
បុរីញូវយ៉ក៖ លោកអគ្គលេខាធិការអង្គការសហប្រជាជាតិ អង់តូនីញ៉ូ ហ្គុយតឺរេស កាលពីថ្ងៃសៅរ៍ បានអំពាវនាវឲ្យមានកិច្ចខិតខំប្រឹងប្រែង ដើម្បីការពារសុខភាព និងសិទ្ធិរបស់ស្ត្រី និងក្មេងស្រីៗ។
លោក ហ្គុយតឺរេស បានថ្លែងក្នុងសារសម្រាប់ទិវាប្រជាជនពិភពលោក ដែលត្រូវបានប្រារព្ធធ្វើនៅថ្ងៃទី ១១ ខែកក្កដា ជារៀងរាល់ឆ្នាំថា៖ «ចូរយើងធ្វើសកម្មភាព ដើម្បីការពារសុខភាពផ្លូវភេទ និងការបន្តពូជ ការពារសិទ្ធិរបស់ស្ត្រី និងក្មេងស្រី និងបញ្ចប់អំពើហិង្សាដែលពាក់ព័ន្ធនឹងភេទ»។
ជំងឺរាតត្បាតកូវីដ ១៩ បានធ្វើឲ្យការងាររបស់យើងកាន់តែលំបាក ប៉ុន្តែយើងត្រូវតែទទួលបានជ័យជម្នះ។
លោកបានថ្លែងថា ជំងឺរាតត្បាតនេះ កំពុងធ្វើឲ្យវិសមភាពដែលមានស្រាប់ និងភាពងាយរងប៉ះពាល់ ជាពិសេសសម្រាប់ស្ត្រី និងក្មេងស្រីៗ កាន់តែជ្រៅទៅៗ។
លោក ហ្គុយតឺរេស បានព្រមានថា៖ «ដោយប្រទេសជាច្រើនដែលកំពុងត្រូវបានបិទ និងប្រព័ន្ធសុខភាព ដែលកំពុងប្រឹងប្រែងដោះស្រាយនេះ សេវាសុខភាពផ្លូវភេទ និងការបន្តពូជ កំពុងត្រូវបានគេចាត់ទុកថាមិនសូវសំខាន់ហើយអំពើហិង្សាពាក់ព័ន្ធនឹងភេទកំពុងកើនឡើង»។
យោងតាមប្រមុខអង្គការសហប្រជាជាតិបានឲ្យដឹងថាមូលនិធិប្រជាជនអង្គការសហប្រជាជាតិ (UNFPA) បានប៉ាន់ប្រមាណថា ប្រសិនបើការបិទប្រទេសបន្តរយៈពេល ៦ ខែទៀត ដោយមានការរំខានដល់សេវាសុខភាពស្ត្រី ៤៧ លាននាក់ នៅក្នុងប្រទេសដែលមានប្រាក់ចំណូលទាប និងមធ្យមប្រហែលជាមិនអាចទទួលបានសេវាសុខភាពបន្តពូជទំនើបនោះទេ។
លោកបានថ្លែងថា៖ «បញ្ហានេះ បានបណ្តាលឲ្យស្ត្រី ៧ លាននាក់ មានផ្ទៃពោះដោយឥតគ្រោងទុក»។
លោកអគ្គលេខាធិការបានថ្លែងទៀតថា លើសពីនេះទៅទៀតករណីហិង្សាទាក់ទងនឹងភេទប្រហែល ៣១ លានករណីបន្ថែមទៀត ក៏អាចរំពឹងទុកថានឹងកើតឡើងដែរ។
លោក ហ្គុយតឺរេស បានកត់សម្គាល់ឃើញថា៖ «ជារៀងរាល់ឆ្នាំ ក្មេងស្រីរាប់លាននាក់ ត្រូវអនុវត្តការងារដែលធ្វើឲ្យពួកគេប៉ះពាល់ទាំងរាងកាយ និងស្មារតី ដោយបានដកសិទ្ធិពីពួកគេមិនឲ្យឈានដល់សក្តានុពលរបស់ពួកគេយ៉ាងពេញលេញនោះទេ»។
លោក ហ្គុយតឺរេស បានថ្លែងដោយលើកឡើងពីស្ថានភាពប្រជាជនឆ្នាំ ២០២០ ថា ក្មេងស្រីជាង ៤ លាននាក់ នឹងត្រូវរងប៉ះពាល់ដល់សុខភាពបន្តពូជនិង ១២ លាននាក់ ត្រូវបង្ខំឲ្យរៀបការក្នុងឆ្នាំនេះ។
លោកអគ្គលេខាធិការអង្គការសហប្រជាជាតិបានថ្លែងថា៖ «ការបិទប្រទេសដែលបានកើតចេញពីជំងឺរាតត្បាតកូវីដ ១៩ នេះ ត្រូវបានរំពឹងទុកថា នឹងធ្វើបញ្ហាជាច្រើនកាន់តែអាក្រក់ថែមទៀត»។
មន្ត្រីកំពូលអង្គការសហប្រជាជាតិរូបនេះ បានថ្លែងថាបទពិសោធ និងការស្រាវជ្រាវជាច្រើនទសវត្សរ៍បានបង្ហាញថា វិធីសាស្ត្រសំខាន់ៗអាចផ្លាស់ប្តូរគោលការណ៍ និងឥរិយាបថដែលពាក់ព័ន្ធនឹងភេទបាន៕ Xinhua/PSA
