ចក្រភពអង់គ្លេសកាលពីថ្ងៃ ពុធ ទី ២ ខែធ្នូ បានប្រកាសអនុញ្ញាតឱ្យប្រើប្រាស់ជាទូទៅនៃវ៉ាក់សាំង COVID-19 ដែលផលិតរួមគ្នាដោយក្រុមហ៊ុនឱសថអាមេរិក Pfizer និងក្រុមហ៊ុនអាល្លឺម៉ង់ BioNTech ដោយមានផែនការចាប់ផ្ដើមការចែកចាយនៅសប្ដាហ៍ក្រោយ។
«NHS (សេវាសុខាភិបាលជាតិ) ត្រៀមខ្លួនរួចរាល់ ដើម្បីចាប់ផ្ដើមចាក់វ៉ាក់សាំងនៅដើមសប្ដាហ៍ក្រោយ» នេះជាសម្តីរបស់រដ្ឋមន្ត្រីក្រសួងសុខាភិបាលចក្រភពអង់គ្លេសលោក Matt Hancock ដែលនិយាយក្រោយពីភ្នាក់ងារនិយតកម្មឱសថ និងផលិតផល ថែទាំសុខភាព (MHRA) ចេញការអនុញ្ញាតឱ្យប្រើប្រាស់នេះ។
លោក Hancock ក៏បានប្រកាសថា គេនឹងចាប់ផ្ដើមដឹកជញ្ជូនស្តុកដំបូងនៃវ៉ាក់សាំងចំនួន ៨ សែនដូសពីរោងចក្រ BioNTech នៅឯប្រទេសបែលហ្ស៊ិក ក្នុងរយៈពេលប៉ុន្មានថ្ងៃខាងមុខនេះ ហើយរំពឹងថា នឹងមានវ៉ាក់សាំងរាប់លានដូសនៅដំណាច់ឆ្នាំ។
ប្រទេសអង់គ្លេស បានបញ្ជាទិញវ៉ាក់សាំង Pfizer/BioNtech ចំនួន ៤០ លានដូស ដែលគ្រប់គ្រាន់សម្រាប់មនុស្ស ២០ លាននាក់ ដោយបុគ្គលនីមួយៗ ត្រូវទទួលដូសចំនួន ២។
រដ្ឋាភិបាលអង់គ្លេសបានកំណត់ថា បុគ្គលចាស់ជរា ឬពិការដែលរស់នៅក្នុងមន្ទីរថែទាំ គឺមានអាទិភាពទទួលវ៉ាក់សាំង COVID-19 មុនគេ។ តែដោយសារស្ថាប័នទាំងនេះមិនមានវិធីសាស្ត្រស្តុកទុកវ៉ាក់សាំងនៅសីតុណ្ហភាពត្រឹមត្រូវដូចនៅមន្ទីរពេទ្យធ្វើឱ្យអ្នកវិភាគមួយចំនួនគិតថា វេជ្ជបណ្ឌិត និងបុគ្គលិកសុខាភិបាលផ្សេងទៀត នឹងទទួលវ៉ាក់សាំងនេះមុនវិញ។
ចក្រភពអង់គ្លេសបានធ្វើការអនុញ្ញាតនេះមុនប្រទេសផ្សេងដែលកំពុងវាយតម្លៃវ៉ាក់សាំង Pfizer/BioNtech និងផ្អែកទៅលើការវិភាគទិន្នន័យដោយក្រុមហ៊ុនទាំងស្រុង។
សហរដ្ឋអាមេរិកកំពុងតែធ្វើការវិភាគទិន្នន័យសារឡើងវិញ មុននឹងធ្វើការអនុញ្ញាតឱ្យប្រើប្រាស់ជាទូទៅ និងចំណាយពេលយូរទៀត ខណៈពេលដែលប្រជាជនប្រមាណ ១ ៥០០ នាក់ស្លាប់ក្នុងមួយថ្ងៃ ដោយសារជំងឺកូវីដ ១៩ នេះ។ រដ្ឋបាលចំណីអាហារ និងឱសថអាមេរិក (FDA) នឹងធ្វើការជួបប្រជុំអ្នកជំនាញនៅថ្ងៃទី ១០ ធ្នូ ដើម្បីធ្វើការវាយតម្លៃវ៉ាក់សាំងនេះ។
បើទោះបីវ៉ាក់សាំងនេះ មិនទាន់បានទទួលការអនុញ្ញាតក៏ដោយ ក៏ក្រុមហ៊ុន Pfizer បានចាប់ផ្ដើមដឹកជញ្ជូនវ៉ាក់សាំងមកស្តុកទុកនៅក្នុងដែនដីសហរដ្ឋអាមេរិក ដើម្បីត្រៀមចែកចាយភ្លាមៗនៅពេលដែលទទួលការអនុញ្ញាតឱ្យប្រើប្រាស់។ គណៈកម្មាធិការប្រឹក្សាយោបល់នៃមជ្ឈមណ្ឌលត្រួតពិនិត្យ និងបង្ការជំងឺឆ្លងអាមេរិក (CDC) បានធ្វើការណែនាំឱ្យផ្ដល់វ៉ាក់សាំងទៅក្រុមអាទិភាពដូចជាវេជ្ជបណ្ឌិត និងបុគ្គលិកសុខាភិបាល។
ស្រដៀងនឹងសហរដ្ឋអាមេរិក សហភាពអឺរ៉ុប នឹងរៀបចំការប្រជុំអ្នកជំនាញនៅចុងខែធ្នូ ដើម្បីធ្វើការពិភាក្សាអំពីវ៉ាក់សាំងនេះ។ ការវាយតម្លៃ គឺអាចចំណាយពេលយូរ ព្រោះសហភាពអឺរ៉ុបត្រូវការមតិពីប្រទេសជាសមាជិកទាំង ២៦។
ប៉ុន្មានម៉ោងក្រោយពីចក្រភពអង់គ្លេស បានធ្វើការប្រកាសនេះ នៅក្នុងកិច្ចប្រជុំតាមវីដេអូមួយប្រធានាធិបតីរុស្ស៊ីលោក Vladimir Putin បានបញ្ជាឱ្យចាប់ផ្ដើមចាក់វ៉ាក់សាំងផលិតក្នុងស្រុក Sputnik V ជាទូទៅ ដោយមានការអះអាងពីរដ្ឋមន្ត្រីសុខាភិបាលរុស្ស៊ីថា ប្រជាជនរុស្ស៊ីប្រមាណ ១ សែននាក់ បានទទួលវ៉ាក់សាំងនេះរួចទៅហើយ។ ប្រទេសរុស្សី តែងតែធ្វើការប្រកាសទាក់ទងនឹងលទ្ធផលវ៉ាក់សាំងរបស់ខ្លួន ប៉ុន្មានម៉ោងក្រោយពីប្រទេសលោកខាងលិចធ្វើការប្រកាសលទ្ធផលវ៉ាក់សាំងរបស់ពួកគេ។
វ៉ាក់សាំងលោកខាងលិចផ្សេងៗទៀតដែលគេរំពឹងថានឹងមានប្រើក្នុងពេលឆាប់ៗនេះរួមមានវ៉ាក់សាំង Moderna និងវ៉ាក់សាំង AstraZeneca/សាកលវិទ្យាល័យ Oxford។
រហូតមកដល់ពេលនេះ មានករណីឆ្លង COVID-19 សរុបជិតដល់ ៦៥ លាននាក់ និងករណីស្លាប់ជិត ១,៥ លាននាក់ហើយ។ ខណៈពេលដែលមានការរឹតបន្តឹងជុំវិញពិភពលោក ដើម្បីបង្ការការឆ្លងមានការរាយការណ៍ថា សហរដ្ឋអាមេរិកនឹងកាត់បន្ថយរយៈពេលចត្តាឡីស័កពី ១៤ ថ្ងៃ មកត្រឹម ១០ ថ្ងៃវិញ ហើយអាចកាត់បន្ថយរហូតដល់ ៧ ថ្ងៃ បើសិនធ្វើតេស្តលើកដំបូងឃើញអវិជ្ជមាន៕