.jpg)
លោក Boris Johnson នាយករដ្ឋមន្រ្តីចក្រភពអង់គ្លេស។ រូបថត AFP
អង់គ្លេសត្រូវតែបញ្ចប់រាល់ការបូមយកប្រេង និងឧស្ម័ននៅសមុទ្រខាងជើងជាបន្ទាន់ ដែលនោះគឺជាការព្រមានពីសំណាក់ក្រុមអ្នកធ្វើយុទ្ធនាការបៃតងកាលពីថ្ងៃទី ០៥ ខែធ្នូ។ ការព្រមាននេះ ធ្វើឡើងបន្ទាប់ពីការសម្រេចចិត្តកាលពីសប្តាហ៍មុនរបស់ប្រទេសដាណឺម៉ាក ដើម្បីបញ្ឈប់ការរុករកប្រេង និងឧស្ម័នធម្មជាតិ ដែលជាផ្នែកមួយនៃការប្តេជ្ញាចិត្តរបស់ដាណឺម៉ាកក្នុងការកាត់បន្ថយការបំភាយឧស្ម័នកាបូនិច និងដោះស្រាយការប្រែប្រួលអាកាសធាតុ។
ចក្រភពអង់គ្លេសមិនបានប្រកាសផែនការបញ្ចប់ការរុករកឧស្ម័ន និងប្រេង ឬបញ្ឈប់ការទាញយករ៉ែនៅសមុទ្រខាងជើងទេ មិនថាមានការឡើងកម្ដៅផែនដី និងមានការទាញយក និងដុតឥន្ធនៈហ្វូស៊ីលក៏ដោយ។ យ៉ាងណាមិញ ទោះបីមិនមានផែនការច្បាស់លាស់ទាក់ទងនឹងការបញ្ចប់ការរុករកឧស្ម័ន និងប្រេង នាយករដ្ឋមន្រ្តីចក្រភពអង់គ្លេសលោក Boris Johnson បានប្រកាសកាលពីថ្ងៃសុក្រ ទី ៤ ធ្នូ ថា អង់គ្លេសមានគោលបំណងកាត់បន្ថយការបញ្ចេញឧស្ម័នកាបូនិចយ៉ាងហោចណាស់ ៦៨% ក្នុងចន្លោះ ឆ្នាំ ១៩៩០ ដល់ចុងឆ្នាំ ២០៣០។
លោក Ken Penton អ្នកធ្វើយុទ្ធនាការអាកាសធាតុចក្រភពអង់គ្លេសរបស់អង្គការអន្តរជាតិ Global Witness បាននិយាយថា៖ «ប្រសិនបើចក្រភពអង់គ្លេសក្លាយជាអ្នកដឹកនាំទាក់ទងនឹងបម្រែបម្រួលអាកាសធាតុពិភពលោកចក្រភពអង់គ្លេសត្រូវតែអនុវត្តតាមការដឹកនាំរបស់ដាណឺម៉ាក ដោយបញ្ឈប់ការចេញអាជ្ញាប័ណ្ណរុករកប្រេង និងឧស្ម័នថ្មី»។
តែផ្ទុយពីការសម្រេចចិត្តរបស់ដាណឺម៉ាក លោក Johnson កាលពីសប្តាហ៍មុនបានផ្តោតការយកចិត្តទុកដាក់របស់លោកទៅលើការចេញគោលដៅថ្មី។ គោលដៅថ្មីនោះទាក់ទងនឹងកាត់បន្ថយការបំភាយឧស្ម័នចេញដោយគណៈកម្មាធិការបម្រែបម្រួលអាកាសធាតុចក្រភពអង់គ្លេស។ គោលដៅថ្មីនឹងងាយស្រួលដល់គោលបំណងរបស់ចក្រភពអង់គ្លេស ក្នុងការកាត់បន្ថយការបំភាយឧស្ម័នជាង ៦៨% នៅឆ្នាំ ២០៣០។
លោក Johnson បាននិយាយថា គោលដៅថ្មីគួរតែជំរុញឱកាសរបស់ចក្រភពអង់គ្លេសក្នុងការឈានដល់គោលដៅរបស់ខ្លួន គឺការមិនបំភាយឧស្ម័នផ្ទះកញ្ចក់នៅឆ្នាំ ២០៥០។ ទន្ទឹមនឹងនេះដែរ លោកបានគូសបញ្ជាក់ពីការប្តេជ្ញាចិត្តក្នុងការបញ្ឈប់មិនឱ្យប្រើរថយន្តម៉ាស៊ូត និងប្រេងឥន្ធនៈ ជំរុញឱ្យមានកសិដ្ឋានខ្យល់នៅឯនាយសមុទ្រវិនិយោគលើអ៊ីដ្រូហ្ស៊ែន និងបច្ចេកវិទ្យាឥន្ធនៈ។ តែសម្រាប់ក្រុមអ្នករិះគន់បាននិយាយថា ផែនការនេះខ្វះចំណុចលម្អិត ខណៈមេដឹកនាំអាជីវកម្មបានព្រមានថា ចាំបាច់ត្រូវមានការវិនិយោគជាច្រើន ដើម្បីសម្រេចគោលដៅថ្មីទាំងអម្បាលម៉ាន។
របាយការណ៍របស់វិទ្យាស្ថានស្រាវជ្រាវគោលនយោបាយសាធារណៈ (Institute for Public Policy Research) បានរកឃើញថា កិច្ចព្រមព្រៀងថ្មីមួយដែលរក្សាប្រេង និងឧស្ម័ននៅសមុទ្រខាងជើងក្នុងពេលដែលការធ្វើវិនិយោគទុនឆ្ពោះទៅរកឧស្សាហកម្មកាបូនទាបអាចធានាបាននូវវិស័យការងារ និងជួយចក្រភពអង់គ្លេសនាំមុខក្នុងកិច្ចពិភាក្សាវិបត្តិនៅ Glasgow នៅឆ្នាំក្រោយ។ សមុទ្រខាងជើងត្រូវបានរងគ្រោះយ៉ាងខ្លាំងដោយសារការដួលរលំទីផ្សារប្រេងនៅក្នុងឆ្នាំ ២០១៥ ហើយម្តងទៀតនៅឆ្នាំ ២០២០ នេះ នៅពេលដែលតម្លៃប្រេងបានធ្លាក់ចុះដោយសារមិនសូវមានតម្រូវការប្រេងឥន្ធនៈ សម្រាប់ការដឹកជញ្ជូនអំឡុងពេលមានរោគរាតត្បាតកូវីដ ១៩។
រដ្ឋាភិបាលដាណឺម៉ាក បានបោះឆ្នោតកាលពីថ្ងៃទី៤ ខែធ្នូ ដើម្បីលុបចោលការផ្តល់អាជ្ញាប័ណ្ណប្រេង និងឧស្ម័ននៅសមុទ្រខាងជើងរបស់ប្រទេសនេះក្នុងរយៈពេល ៨០ ឆ្នាំ បន្ទាប់ពីប្រទេសនេះបានចាប់ផ្តើមធ្វើអាជីវកម្មអ៊ីដ្រូកាបូន។ លោកស្រី Helene Hagel មកពី Greenpeace ប្រទេសដាណឺម៉ាក បាននិយាយថា ការបោះឆ្នោតសភានឹងអនុញ្ញាតឱ្យប្រទេសនេះមានសំអាងថា ខ្លួនជាអ្នកនាំមុខក្នុងពិភពលោក និងជំរុញប្រទេសដទៃទៀត ឱ្យបញ្ចប់ការពឹងផ្អែកលើហ្វូស៊ីលឥន្ធនៈដែលកំពុងបង្កគ្រោះថ្នាក់ដល់បរិយាកាស។
ប្រទេសដាណឺម៉ាក នឹងបញ្ចប់រាល់ការរុករកប្រេង និងឧស្ម័នថ្មីនៅសមុទ្រខាងជើង ដែលជាផ្នែក ១ នៃផែនការ ដើម្បីបញ្ឈប់ការទាញយកហ្វូស៊ីលឥន្ធនៈនៅឆ្នាំ ២០៥០។
រដ្ឋាភិបាលរបស់ដាណឺម៉ាកក៏បានយល់ព្រមលុបចោលអាជ្ញាប័ណ្ណចុងក្រោយបំផុតរបស់ខ្លួនកាលពីថ្ងៃទី ៤ ធ្នូ។ បច្ចុប្បន្នប្រទេសដាណឺម៉ាក គឺជាអ្នកផលិតប្រេងធំជាងគេនៅសហភាពអឺរ៉ុប ទោះបីជាប្រទេសនេះផលិតតិចជាងសមាជិកមិនមែនសហភាពអឺរ៉ុបដូចជាប្រទេសន័រវែស ឬអង់គ្លេសក៏ដោយ។ ប្រទេសនេះបានបូមប្រេងចំនួន ១០៣ ០០០ បារ៉ែល ក្នុងមួយថ្ងៃនៅក្នុងឆ្នាំ ២០១៩ នេះបើយោងតាមការវិភាគរបស់ក្រុមហ៊ុនប្រេងដ៏ធំរបស់ចក្រភពអង់គ្លេស។ ដាណឺម៉ាកមានការដ្ឋានខួងប្រេងចំនួន ៥៥ នៅលើទឹកដីរបស់ខ្លួននៅទូទាំងតំបន់ប្រេង និងឧស្ម័នចំនួន ២០។
ការសម្រេចចិត្តបញ្ចប់ការរុករកប្រេង និងឧស្ម័ននេះ នឹងធ្វើឱ្យដាណឺម៉ាកចំណាយប្រហែល ១,១ ពាន់លានផោន នេះបើយោងតាមការប៉ាន់ស្មានរបស់ក្រសួងថាមពលដាណឺម៉ាក។ ដាណឺម៉ាកនៅតែប្រកាន់គោលជំហរសម្រេចចិត្ដធ្វើដូច្នេះ មិនថាមានភាពមិនប្រាកដប្រជាយ៉ាងច្រើនក៏ដោយ។ ប្រទេសនេះបានកំណត់ទីតាំងរបស់ខ្លួនថា ត្រូវជាអ្នកឈានមុខគេក្នុងការប្រយុទ្ធប្រឆាំងនឹងបម្រែបម្រួលអាកាសធាតុ ប៉ុន្តែផលិតកម្មប្រេងរបស់ខ្លួនវិញហាក់បានបង្ហាញនូវភាពលំបាក។
ចាប់តាំងពីទសវត្សរ៍ឆ្នាំ ១៩៧០ ដាណឺម៉ាករកចំណូលបានរាប់ពាន់លានដុល្លារពីប្រេងនៅសមុទ្រខាងជើងរបស់ខ្លួន។ តែតម្លៃប្រេងមានការធ្លាក់ចុះ និងថ្លៃដើមមានតម្លៃខ្ពស់មិនសូវមានការដេញថ្លៃនៅប្លុកប្រេងទេក្នុងពេលចុងក្រោយនេះ។ ទោះយ៉ាងណាការងារប្រហែល ៤ ពាន់កន្លែងពឹងផ្អែកលើវិស័យនេះ ដែលភាគច្រើននៅឆ្នេរសមុទ្រភាគខាងលិចរបស់ដាណឺម៉ាក។ ដាណឺម៉ាកមានគោលបំណងកាត់បន្ថយការបំភាយឧស្ម័នផ្ទះកញ្ចក់ដល់ ៧០% គិតពីកម្រិតក្នុងឆ្នាំ ១៩៩០ ដល់ឆ្នាំ ២០៣០ និងឈានដល់មិនមានការបំភាយឧស្ម័នផ្ទះកញ្ចក់នៅឆ្នាំ ២០៥០ ដែលគោលដៅទាំង ២ ត្រូវបានអនុម័តជាច្បាប់សម្រាប់អនុវត្ដតែម្ដង។
រដ្ឋាភិបាលនៅជុំវិញពិភពលោកក៏បានប្តេជ្ញាធ្វើសកម្មភាពបន្ថែមទៀតលើការប្រែប្រួលអាកាសធាតុ ដែលជាផ្នែកមួយនៃផែនការកាន់តែទូលំទូលាយ ដើម្បីឆ្លើយតបទៅនឹងគោលដៅនៃកិច្ចព្រមព្រៀងទីក្រុងប៉ារីស។ ទោះយ៉ាងណាក៏ដោយអ្នកវិទ្យាសាស្ត្របាននិយាយថា ទោះបីជាចក្រភពអង់គ្លេស និងប្រទេសដទៃទៀតរក្សាការសន្យារបស់ពួកគេលើការកាត់បន្ថយការសាយភាយក៏ដោយ ក៏គ្មានការធានាថាពិភពលោកនឹងចៀសវាងការឡើងកម្តៅផែនដីធ្ងន់ធ្ងរបាននោះដែរ៕
