ក្រុងឡុងដ៍ៈ រដ្ឋមន្ត្រីការបរទេសអង់គ្លេស លោក Jeremy Hunt បានព្រមានកាលពីថ្ងៃអាទិត្យថា នឹងមាន «គ្រោះថ្នាក់ធំ» កើតឡើងនៅឈូងសមុទ្រប្រទេស អារ៉ាប់ ដោយបានបន្ថែមថា ក្រុងវ៉ាស៊ីនតោនមានបំណងចង់ឲ្យស្ថានការណ៍បញ្ចប់ដោយការចរចា។
នាវាដឹកប្រេងរបស់ជប៉ុន ១ គ្រឿង ឈ្មោះ Kokuka Courageous និងនាវារបស់ប្រទេស ន័រវែស ១ គ្រឿងទៀត ឈ្មោះ Front Altair បានរងការវាយប្រហារកាលពីថ្ងៃព្រហស្បតិ៍ ហើយបានបណ្តាលឲ្យឆេះយ៉ាងសន្ធោសន្ធៅ ខណៈនាវាទាំងនោះ កំពុងឆ្លងកាត់តំបន់ឈូងសមុទ្រអូម៉ង់។
ប្រទេស អង់គ្លេស បានសន្និដ្ឋានថា ភាពទទួលខុសត្រូវ «ពិតណាស់ស្ទើរតែជាប់ពាក់ព័ន្ធទាំងស្រុង» ជាមួយប្រទេស អ៊ីរ៉ង់ នោះ។
លោក Jeremy Hunt ត្រូវបានគេចោទសួរនៅក្នុងកម្មវិធីទូរទស្សន៍ BBC អំពីលទ្ធភាពនៃភាពតានតឹងកាន់តែខ្លាំងឡើងដោយលោកបានថ្លែងថា៖ «នេះ គឺជាគ្រោះថ្នាក់យ៉ាងខ្លាំងនៃស្ថានការណ៍ដែលយើងស្ថិតនៅក្នុងនេះ»។
«ភាគីទាំង ២ នៅក្នុងជម្លោះបានគិតថា ពួកគេនឹងមិនចង់ឲ្យមានសង្គ្រាមនោះទេ។ យើងកំពុងជំរុញឲ្យភាគីទាំងអស់កាត់បន្ថយភាពតានតឹងទាំងនោះ» ។
«ដោយថ្លែងទៅកាន់ប្រធានាធិបតី ដូណាល់ ត្រាំ ខ្ញុំបានបញ្ជាក់យ៉ាងច្បាស់ក្រឡែតថា ចំពោះអាមេរិកវិញ ពួកគេចង់ឲ្យបញ្ហានេះ ត្រូវបញ្ចប់តាមរយៈការចរចា។
«យើងត្រូវជំរុញឲ្យប្រទេស អ៊ីរ៉ង់ បញ្ឈប់រាល់សកម្មភាពបង្កអស្ថិរភាពរបស់ខ្លួននៅប្រទេស លីបង់ តាមរយៈក្រុមឧទ្ទាមហេបូឡាហ៍ នៅក្នុងប្រទេស យេម៉ែន ជាទីដែលពួកគេទាំងនោះ កំពុងវាយប្រហារមីស៊ីលជាច្រើនលើកទៅលើប្រទេស អារ៉ាប៊ី សាអ៊ូឌីត នៅឈូងសមុទ្រ ដូចដែលយើងបានឃើញនោះ។ នោះ គឺជាដំណោះស្រាយមួយដែលមានរយៈពេលវែង»។
នាវា Kokuka Courageous ផ្ទុកប្រេងរបស់ជប៉ុនដែលរងការខូចខាត បានមកដល់កំពង់ផែប្រទេស អារ៉ាប់រួម (UAE) ខណៈពេលដែលប្រទេស អារ៉ាប៊ី សាអ៊ូឌីត បានចោទប្រកាន់គូសត្រូវអ៊ីរ៉ង់របស់ខ្លួនពីបទនៅពីក្រោយការវាយប្រហារនោះ។
ប្រធានាធិបតីអាមេរិកលោក ដូណាល់ ត្រាំ បានថ្លែងថា ការវាយប្រហារលើនាវាផ្ទុកប្រេង ទាំង ២ លើកនោះ បានបង្ហាញឲ្យឃើញថា៖ «ប្រទេស អ៊ីរ៉ង់ ពិតជានៅពីក្រោយការវាយប្រហារនាវាទាំងនោះយ៉ាងច្បាស់ក្រឡែត» ក៏ប៉ុន្តែ ក្រុងតេអេរ៉ង់បានទាត់ចោលរាល់ការចោទប្រកាន់របស់ US៕ AFP/SK