ចក្រភពអង់គ្លេសកាលពីថ្ងៃព្រហស្បតិ៍ ទី ៤ កុម្ភៈ បានចាប់ផ្ដើមសាកល្បងប្រតិកម្មនៃប្រព័ន្ធស៊ាំ បន្ទាប់ពីការចាក់វ៉ាក់សាំងកូវីដ ១៩ ផលិតដោយក្រុមហ៊ុន Pfizer/BioNTech និងផលិតដោយក្រុមហ៊ុន AstraZeneca/Oxford បញ្ចូលគ្នាក្នុងការចាក់ចំនួន ២ ដង។
ការសាកល្បងនឹងពិនិត្យការឆ្លើយតបពីភាពស៊ាំនៃមនុស្ស ដែលទទួលវ៉ាក់សាំង Pfizer សម្រាប់ដូសដំបូងរបស់ពួកគេ និងទទួលវ៉ាក់សាំង AstraZeneca ក្នុងដូសបន្ទាប់ ដោយមានរយៈពេលគម្លាតគ្នាពី ៤ ទៅ ១២ សប្ដាហ៍។
អ្នកស្រាវជ្រាវពីក្រោយការសាកល្បងនេះ បាននិយាយថា ទិន្នន័យបានពីការចាក់វ៉ាក់សាំង ២ ប្រភេទផ្សេងគ្នានេះអាចជួយឱ្យមានការយល់ដឹងថា តើការចាក់វ៉ាក់សាំងអាចធ្វើបានដោយមានភាពបត់បែនកាន់តែច្រើនជាងមុននៅជុំវិញពិភពលោកដែរឬទេ? គេរំពឹងថា នឹងទទួលទិន្នន័យបឋមនៅអំឡុងខែមិថុនា៕