កាលពីថ្ងៃ ២៨ វិច្ឆិកា អង់គ្លេស និងបារាំងបានចុះហត្ថលេខាលើកិច្ចព្រមព្រៀងថ្មីមួយ ស្ដីអំពីការបញ្ឈប់អន្តោប្រវេសន៍ខុសច្បាប់តាមផ្លូវទឹកដោយបានបន្ថែមចំនួនប៉ូលិសល្បាតតាមព្រំដែនទឹក និងជំនួយបច្ចេកវិទ្យា ដើម្បីបិទច្រកកុំឱ្យជនអន្តោប្រវេសន៍ខុសច្បាប់ប្រើប្រាស់ទូកតូចៗ ឆ្លងដែនទៅកាន់អង់គ្លេស។
រដ្ឋមន្ត្រីក្រសួងមហាផ្ទៃអង់គ្លេសលោកស្រី Priti Patel បាននិយាយថា តាមរយៈកិច្ចព្រមព្រៀងនេះ ចំនួនមន្ត្រីល្បាតឆ្នេរសមុទ្រនៅបារាំងនឹងត្រូវបង្កើនការប្រុងប្រយ័ត្នទ្វេដង ហើយនឹងបំពាក់ឧបករណ៍បច្ចេកវិទ្យាថ្មី រួមមានដ្រូន (Drone) និងរ៉ាដា (Radar) សម្រាប់ចាប់រូបភាព និងឱ្យសញ្ញាផងដែរ។
គួររំឭកផងដែរថា មនុស្សរាប់រយនាក់រួមទាំងកុមារជាច្រើននាក់ បានឆ្លងដែនទៅកាន់ភាគខាងត្បូងនៃប្រទេសអង់-គ្លេស ចេញពីជំរំបណ្តោះអាសន្ននៅភាគខាងជើងប្រទេសបារាំង ដោយជិះទូកតូចៗតាមផ្លូវដឹកជញ្ជូនទំនិញផ្លូវទឹកមួយ ដែលមមាញឹកជាងគេបំផុត ហើយក្នុងចំណោមនោះជនអន្តោប្រវេសន៍មួយចំនួនក៏ត្រូវបានលង់ទឹកស្លាប់ផងដែរ។
លោកស្រី Patel និងភាគីបារាំងលោក Gerald Darmanin មានបំណងបិទផ្លូវទឹក ដែលបានប្រើប្រាស់ដោយជនអន្តោប្រវេសន៍ប្រមាណជាង ៨ ០០០ នាក់នៅឆ្នាំនេះឱ្យប្រើប្រាស់លែងបាន។ ភាគីទាំង ២ បានយល់ព្រមបង្កើនចំនួនប៉ូលិសល្បាតទ្វេដងតាមបណ្តោយឆ្នេរប្រវែង ១៥០ គីឡូម៉ែត្រ ដោយបានកំណត់គោលដៅចំពោះបណ្តាញពួករត់ពន្ធមនុស្សឆ្លងដែន។ យ៉ាងណាមិញមិនមានទិន្នន័យណាមួយបញ្ជាក់ថាប្រទេសទាំង ២ នេះនឹងបន្ថែមចំនួនប៉ូលិសប៉ុន្មាននាក់ទៀតទេ។
បន្ថែមពីនេះភាគីទាំង ២ ក៏បានឯកភាពលើការពង្រឹងបច្ចេកវិទ្យាឃ្លាំមើលឱ្យប្រសើរជាងមុន រួមមានការប្រើប្រាស់ដ្រូនឧបករណ៍រ៉ាដា កាមេរ៉ា និងកែវយឹតអុបទិកផងដែរ។
លោកស្រី Clare Moseley ស្ថាបនិកអង្គការ Care4Calais បាននិយាយថា គោលការណ៍ដែលរដ្ឋាភិបាលដាក់ចេញមកធ្វើដូចកំពុងត្រៀមយោធាប្រយុទ្ធជាមួយសត្រូវអ៊ីចឹង។ អ្នកទាំងនេះគ្រាន់តែ ជាមនុស្សសាមញ្ញប្រកបរបរធម្មតា មិនមែនជាឧក្រិដ្ឋជនទេ ហើយពួកគេក៏មិនមែនចង់ឆ្លងដែនឱ្យគ្រោះថ្នាក់ និងភ័យខ្លាចដូចនេះដែរ។
លោកស្រី Patel បានឱ្យដឹងក្នុងសេចក្តីថ្លែងការណ៍មួយថា កិច្ចព្រមព្រៀងនេះជាការបោះជំហានទៅមុខមួយជំហានទៀតនៃបេសកកម្មរបស់ប្រទេសទាំង ២ ក្នុងការធ្វើយ៉ាងណាកុំឱ្យការឆ្លងដែនតាមផ្លូវទឹកជោគជ័យបាន។ លោកស្រីបានថ្លែងថា៖ «សូមអរគុណដល់ចំនួនប៉ូលិសល្បាតដែលទើបតែបានបន្ថែមនៅលើឆ្នេរនៅបារាំង និងការបង្កើនការចែករំលែកព័ត៌មានសម្ងាត់រវាងភ្នាក់ងារសន្តិសុខ និងភ្នាក់ងារអនុវត្តច្បាប់ទាំងអស់។
យើងសង្កេតឃើញមានជនចំណាកស្រុកតិចជាងមុន ដែលឆ្លងដែនពីឆ្នេរនៅបារាំងមកកាន់អង់គ្លេស»។
លោកស្រីបន្ថែមថា ចក្រភពអង់គ្លេស និងបារាំង គ្រោងនឹងបន្តកិច្ចពិភាក្សាគ្នាយ៉ាងជិតស្និទ្ធបន្ថែមទៀត ដើម្បីកាត់បន្ថយចំនួនអ្នកចំណាកស្រុកនៅព្រំដែននៅឆ្នាំក្រោយ។
សេចក្តីថ្លែងការណ៍របស់លោកស្រី អង្គការសប្បុរសធម៌រិះគន់ថា ជា «ការបរាជ័យចំតួ» ព្រោះការធ្វើដូចនេះប្រៀបបាននឹង «រើកៅអីឡើងវិញលើកប៉ាល់ទីតានិក» អីចឹង ព្រោះវាមិនមានបានប្រយោជន៍អ្វីឡើយ។ លោកស្រី Bella Sankey ប្រធានអង្គការឃ្លាំមើលសកម្មភាពមនុស្សធម៌បាននិយាយថា ការធ្វើនេះ ដូចបោះលុយប្រជាជន ដែលបានបង់ពន្ធទៅលើវិធានការដដែល ដែលមិនមានជាលទ្ធផលដុំកំ-ភួនទៅលើសភាពការណ៍ឆ្លងដែនដ៏គ្រោះថ្នាក់នេះឡើយ។
ទន្ទឹមនឹងនេះដែរ អង្គការលើកលែងទោសអន្តរជាតិចក្រភពអង់គ្លេស បាននិយាយថា គោលការណ៍នេះជា «ជាការខកចិត្តពេញទី»។ លោក Steve Valdez-Symonds នាយកកម្មវិធីជនភៀសខ្លួន និងជនអន្តោប្រវេសន៍បានមានប្រសាសន៍ថា៖ «វាជាការខកចិត្តយ៉ាងខ្លាំងដែលរដ្ឋាភិបាលប្រទេសទាំង ២ នេះ បានព្រងើយកន្តើយ នឹងតម្រូវការ និងសិទ្ធិរបស់ប្រជាជនដ៏ចាំបាច់ ដែលជាការឆ្លើយតបមួយគួរតែធ្វើដាច់ខាត»។
យ៉ាងណាមិញ កិច្ចព្រមព្រៀងដែលបានចុះហត្ថលេខានេះក៏បានរួមបញ្ចូលទាំងវិធីសាស្ត្រជាជំហានៗក្នុងការទប់ស្កាត់ជនអន្តោប្រវេសន៍ស្នាក់នៅប្រទេសបារាំង និងវិធានការបង្កើនសន្តិសុខតាមព្រំដែននៅកំពង់ផែភាគខាងជើង និងខាងលិចនៃប្រទេសផងដែរ។ តាមរយៈវិធានការដែលទើបនឹងបានដាក់ចេញពេលថ្មីៗនេះ ឃើញថា ភាគរយនៃការឃាត់ជនអន្តោប្រវេសន៍បានកើនឡើងពី ៤១ ភាគរយទៅ ៦០ ភាគរយ បើធៀបនឹងឆ្នាំទៅ។
លោកស្រីបានប្រាប់សារព័ត៌មានអង់គ្លេសថា រហូតមកដល់ពេលនេះ អាជ្ញាធរបារាំងបានឃាត់ជនអន្តោប្រវេសន៍ប្រ-មាណ ៥ ០០០ នាក់ ដែលបានឆ្លងដែនមកកាន់ប្រទេសអង់គ្លេស ហើយក្នុងរយៈពេល ១០ ឆ្នាំចុងក្រោយនេះ អង់គ្លេសបានផ្តល់ទឹកប្រាក់ចំនួន ១៥០ លានផោន ដល់ប្រទេសបារាំង ដើម្បីដោះស្រាយបញ្ហារឿងអន្តោប្រវេសន៍នេះ។
របាយការណ៍នាពេលថ្មីៗនេះបានឱ្យដឹងថា មានមនុស្សជិត ៣០០ នាក់ បានស្លាប់ដោយសារឆ្លងដែនទៅកាន់អង់គ្លេសតាមផ្លូវទឹកចាប់តាំងពីឆ្នាំ ១៩៩៩ មក។
លោក Mael Galisson ធ្វើការនៅអង្គការ Gisti ដែលជាអង្គការសេវាកម្មផ្នែកច្បាប់សម្រាប់អ្នកស្វែងរកសិទ្ធិជ្រកកោននៅប្រទេសបារាំង បានពិពណ៌នាអំពីការវិវឌ្ឍនៃសន្តិសុខតាមព្រំដែននៅក្នុង និងនៅជុំវិញច្រកសមុទ្រ Dover-Strait នេះថា ជា «ការស្លាប់ជាប្រវត្តិសាស្ត្រ»៕