កាលពីថ្ងៃសៅរ៍ ទី ២៧ មីនា អង្គការយូនីសេហ្វ (UNICEF) បាននិយាយថា កម្មវិធីផ្គត់ផ្គង់វ៉ាក់សាំងកូវីដ ១៩ COVAX រំពឹងថា វិទ្យាស្ថានសេរ៉ូមឥណ្ឌា (SII) នឹងបន្តការផ្គត់ផ្គង់វ៉ាក់សាំង AstraZeneca ពេញលេញវិញនៅខែឧសភា បន្ទាប់ពីក្រុមហ៊ុននេះផ្អាកការនាំចេញ ដើម្បីផ្ដល់អាទិភាពការចាក់ក្នុងស្រុក។
អគ្គនាយកអង្គការសុខភាពពិភពលោកលោក TedrosAdhanom Ghebreyesus បាននិយាយកាលពីថ្ងៃសុក្រថា ការសម្រេចចិត្តផ្អាករបស់ឥណ្ឌាគឺ «អាចយល់បាន» ប៉ុន្តែថាអង្គការសុខភាពពិភពលោកកំពុងពិភាក្សា ដើម្បីបន្តផ្ដល់វ៉ាក់សាំងដល់ប្រទេសដទៃទៀត។
ដើមឡើយ COVAX រំពឹងថា នឹងទទួលបានវ៉ាក់សាំងចំនួនសរុប ៩០ លានដូសពី SII រវាងខែមីនា និងមេសា ដែលក្នុងនោះពួកគេទើបតែទទួលបានប្រហែល ២៨ លានដូសប៉ុណ្ណោះ។ មកដល់ពេលនេះ COVAX បានចែកចាយវ៉ាក់សាំងចំនួន ៣២ លានដូស ទៅកាន់ ៦១ ប្រទេស ប៉ុន្តែប្រទេសចំនួន ៣៦ នៅតែរង់ចាំការដឹកជញ្ជូនវ៉ាក់សាំងដំបូង ដើម្បីចាប់ផ្ដើមការចាក់៕