បុរីញូវយ៉ក៖ អង្គការសហប្រជាជាតិកាលពីថ្ងៃអង្គារ បានបញ្ជាក់អំពីទឹកជំនន់យ៉ាងអាក្រក់បំផុត នៅក្នុងបណ្តាប្រទេសនៅអាស៊ី ដូចជាប្រទេសបង់ក្លាដែស សាធារណរដ្ឋប្រជាធិបតេយ្យប្រជាមានិតកូរ៉េ (DPRK) និងឥណ្ឌា ហើយពួកគេបានបង្ហាញអំពីសុច្ឆន្ទៈរបស់ខ្លួន ដើម្បីជួយដល់ប្រទេសទាំងអស់នេះ។
នៅក្នុងប្រទេសបង់ក្លាដែស ប្រជាជនកំពុងជួបប្រទះទឹកជំនន់រដូវវស្សាយ៉ាងយូរ និងអាក្រក់បំផុត នៅក្នុងរយៈពេលប៉ុន្មានឆ្នាំមកនេះ។ ការិយាល័យរបស់អង្គការសហប្រជាជាតិទទួលបន្ទុកការសម្របសម្រួលកិច្ចការមនុស្សធម៌ (OCHA) បានថ្លែងថា តំបន់នៅក្នុងប្រទេស ១ ភាគ ៤ ត្រូវបានទឹកជន់លិចគ្មានសល់។
ការិយាល័យរបស់អង្គការសហប្រជាជាតិ (OCHA) បានថ្លែងថា មនុស្សយ៉ាងតិច ៥,៤ លាននាក់ បានរងផលប៉ះពាល់ដោយមានមនុស្ស ១១ ០០០ គ្រួសារ បានរត់ភៀសខ្លួន និងមនុស្ស ១៣៥ នាក់ផ្សេងទៀតបានស្លាប់បាត់បង់ជីវិត ដោយសារទឹកជំនន់នោះ។
ក្រុមដៃគូមនុស្សធម៌ កំពុងធ្វើការងារជាមួយអាជ្ញាធរបង់ក្លាដែស ដើម្បីជួយមនុស្សដែលភាគច្រើនបំផុត ត្រូវការស្បៀងជាចាំបាច់ដូចជាទីជម្រក ទឹកស្អាត សម្ភារអនាម័យ និងសម្ភារផ្សេងៗទៀត។
ការិយាល័យរបស់អង្គការសហប្រជាជាតិ OCHA បានថ្លែងថា ផែនការឆ្លើយតបមួយ គិតជាទឹកប្រាក់ចំនួន ៤០ លានដុល្លារ ត្រូវបានបញ្ចេញដើម្បីជួយដល់មនុស្សជាង ១ លាននាក់ ដែលត្រូវការជាចាំបាច់បំផុត។ ទឹកប្រាក់ទាំងនេះ រួមមានជំនួយសម្រាប់ក្មេងៗ និងស្ត្រី ដែលងាយរងគ្រោះថ្នាក់បំផុតនៅក្នុងមហន្តរាយធម្មជាតិផ្សេងៗ ដែលបានរាប់បញ្ចូលទៅជាង ៧០ ភាគរយ ដែលត្រូវជួយដល់ជនរងគ្រោះដោយទឹកជំនន់។
OCHA បានថ្លែងថា នៅក្នុងប្រទេសឥណ្ឌា ទឹកជំនន់បន្តធ្វើឲ្យប៉ះពាល់រដ្ឋជាច្រើន ដោយមនុស្ស ៧៧០ នាក់បានស្លាប់នៅទូទាំងប្រទេស៕ Xinhua/SK