.jpg)
កាលពីថ្ងៃចន្ទ ទី ១៥ មីនា អង្គការសុខភាពពិភពលោកបានអំពាវនាវទៅបណ្តាប្រទេសនានាឱ្យបន្តយុទ្ធនាការចែកចាយវ៉ាក់សាំង ក្រោយពីមានបណ្តាប្រទេសមួយចំនួនបានផ្អាកការប្រើប្រាស់វ៉ាក់សាំង AstraZeneca។
អ្នកនាំពាក្យរបស់អង្គការសុខភាពពិភពលោកលោក Christian Lindmeier បាននិយាយថា៖ «រហូតមកដល់ពេលនេះមិនមានភ័ស្តុតាងណាមួយដែលបញ្ជាក់ថា ករណីកកឈាម គឺបណ្តាលមកពីវ៉ាក់សាំងនោះទេ ហើយវាសំខាន់ណាស់ដែលយុទ្ធនាការចាក់វ៉ាក់សាំងនៅតែបន្ត ដូច្នេះយើងអាចជួយសង្គ្រោះអាយុជីវិត»។ នេះបើតាមការរាយការណ៍របស់សារព័ត៌មានសិង្ហបុរី Channel News Asia។
ទីភ្នាក់ងារឱសថអឺរ៉ុបបាននិយាយថា គិតត្រឹមថ្ងៃទី ១០ ខែមីនា មានករណីឈាមកកសរុបចំនួន ៣០ ករណី ក្នុងចំណោមប្រជាជនជិត ៥ លាននាក់ ដែលបានចាក់វ៉ាក់សាំង AstraZeneca នៅតំបន់សេដ្ឋកិច្ចអឺរ៉ុប៕
