The Phnom Penh Post Search

Search form




Logo of Phnom Penh Post newspaper Phnom Penh Post - អង្គការ WHO បាន​ចំណាត់​ថ្នាក់​​វ៉ារ៉្យង់​មក​ពី​​ឥណ្ឌា​ជា​ប្រភេទ «គួរឱ្យ​បារម្ភ»​

អង្គការ WHO បាន​ចំណាត់​ថ្នាក់​​វ៉ារ៉្យង់​មក​ពី​​ឥណ្ឌា​ជា​ប្រភេទ «គួរឱ្យ​បារម្ភ»​

Content image - Phnom Penh Post
លោកស្រី Maria Van Kerkhove ប្រធានផ្នែកបច្ចេកទេសអង្គការ WHO ធ្វើកាយវិការនៅក្នុងអំឡុងបទសម្ភាស ១ ជាមួយសារព័ត៌មាន AFP នាពេលកន្លងទៅ។

អង្គការ WHO បាន​ចំណាត់​ថ្នាក់​​វ៉ារ៉្យង់​មក​ពី​​ឥណ្ឌា​ជា​ប្រភេទ «គួរឱ្យ​បារម្ភ»​

កាល​ពី​ថ្ងៃ​ចន្ទ​កន្លង​ទៅ​ អង្គការ​សុខភាព​ពិភព​លោក WHO បាន​ធ្វើ​​ចំណាត់​ថ្នាក់​វ៉ារ៉្យង់​ ដែល​ត្រូវ​បាន​គេ​ប្រទះ​ឃើញ​ដំបូង​បង្អស់​នៅក្នុង​ប្រទេស​ឥណ្ឌា​ថា​ ជា​ប្រភេទ​គួរ​​ឱ្យ​​បារម្ភ​ ហើយ​បើ​យោង​តាម​ការ​សិក្សា​ជា​​បឋម​ វ៉ារ៉្យង់​នេះ​ មាន​សមត្ថភាព​​​ចម្លង​ខ្លាំង​ជាង​វ៉ារ្យង់ដទៃ​ទៀត។

ទោះ​យ៉ាង​ណា​ក្ដី អង្គការ WHO នៅ​មិន​ទាន់​បាន​រាយការណ៍​អំពី​ភ័ស្តុតាង​ណា​មួយ​ ដែល​បង្ហាញ​ថា​ វ៉ាក់សាំង​​ដែល​បាន​អនុញ្ញាតបច្ចុប្បន្ន​នឹង​មាន​ប្រសិទ្ធភាព​ប្រឆាំង​នឹង​វ៉ារ៉្យង់​នេះ​ ឬ​យ៉ាង​ណា​នៅ​ឡើយ។

កាល​ពី​សប្តាហ៍​មុន​អង្គការ​ WHO បាន​ចាត់​​ថ្នាក់​វ៉ារ៉្យង់​ថ្មី​នេះ​ថា «មាន​លក្ខណៈ​ខុស​ប្លែក​ និង​គួរ​ឱ្យ​ចាប់​អារម្មណ៍» ហើយ​ត្រូវ​​ការសិក្សា​បន្ថែម​ទៀត ​ដើម្បី​យល់​ច្បាស់​ពី​តួនាទី​របស់​វា។ ប៉ុន្តែ ការ​ដាក់​ចំណាត់​ថ្នាក់​វ៉ារ៉្យង់​នេះ​ថា​ «គួរ​ឱ្យ​​ព្រួយបារម្ភ​» នេះ​ មាន​ន័យ​ថា វ៉ារ៉្យង់​នេះ​មាន​លក្ខណៈ​ធ្ងន់ធ្ងរ​ ឬ​មាន​ភាព​ធន់​នឹង​វ៉ាក់សាំង​ និង​ការ​ព្យាបាល​ ដែល​អនុវត្ត​នា​ពេល​បច្ចុប្បន្ន។ នេះ​បើ​យោង​តាម​អង្គការ WHO។

ជាមួយ​គ្នា​នេះ​ដែរ កាល​ពី​ថ្ងៃ​សុក្រ​សប្ដាហ៍​មុន​ អ្នក​វិទ្យាសាស្ត្រ​អង់គ្លេស​ក៏​បាន​ប្រកាស​ថា វ៉ារ៉្យង់​នេះ​ជា​ប្រភេទ «គួរ​ឱ្យ​ព្រួយ​បារម្ភ​» ដូចគ្នា​ ដែល​មិន​ត្រឹម​តែ​អាច​បង្ក​អន្តរាយ​ដល់​ប្រទេស​ឥណ្ឌា​ និង​បណ្ដា​ប្រទេស​ ដែល​ធ្លាប់​មាន​ករណី​នេះ​នោះ​ទេ តែ​ក៏​អាច​ធ្វើ​ឱ្យ​អន្តរាយ​ដល់​ពិភព​លោក​ទាំង​មូល​ថែម​ទៀត​ផង។

បច្ចុប្បន្ន​ អ្នក​វិទ្យាសាស្ត្រ​នៅ​ទូទាំង​ពិភព​លោក​កំពុង​សិក្សា​អំពី​វ៉ារ្យ៉ង់ B.1.617 ដើម្បី​ព្យាយាម​ស្វែងរក​ចំណុច​ខ្លាំង​របស់​វ៉ារ៉្យង់​ ដែល​​​បាន​រីក​រាលដាល​យ៉ាង​ខ្លាំង​នៅ​ប្រទេស​ឥណ្ឌា​។ វ៉ារ្យ៉ង់​នេះ​ផង​ដែរ ក៏​បាន​រីក​រាលដាល​ដល់​ប្រទេស​ជាង ៣០ រួច​ទៅ​ហើយ​ ដែល​ក្នុង​នោះ​រួម​មាន​ សហរដ្ឋ​អាមេរិក ចក្រភព​អង់គ្លេស​ បារាំង និង​ជប៉ុន​ជាដើម​។

វ៉ារ្យ៉ង់​នេះ​ គឺ​ជា​ប្រភេទ​ទី៤ ហើយ​ដែល​អង្គការ WHO ចាត់​ទុក​ជា​វ៉ារ៉្យង់ ដែល​មាន​ហានិភ័យ​ខ្ពស់ ក្រៅ​ពី​វ៉ារ្យ៉ង់​ B.1.1.7 ដែល​ត្រូវ​បាន​គេ​រក​ឃើញ​ដំបូង​នៅ​ភាគ​និរតី​អង់គ្លេស​វ៉ារ៉្យង់​ B.1.35 ត្រូវ​បាន​រក​ឃើញ​នៅ​អាហ្វ្រិក​ខាង​ត្បូង និង​វ៉ារ្យ៉ង់ P.1 ត្រូវ​បាន​រក​ឃើញដោយ​អ្នក​ស្រាវជ្រាវ​នៅ​ប្រេស៊ីល។​

យ៉ាងណា​មិញ អង្គការ WHO មិន​បាន​ណែនាំ​ចាំបាច់​ឱ្យ​មាន​ការ​បិទ​ព្រំដែន​ទេ​ ប៉ុន្តែ​ប្រទេស​នីមួយ​ត្រូវ​តែ​ធ្វើ​ការ​វាយ​តម្លៃ​ និង​សិក្សា​ឱ្យ​បាន​ល្អិត​ល្អន់​មុន​នឹង​សម្រេច​បិទ​ចៀស​វាង​ការ​រំខាន​ដល់​ការ​ធ្វើ​ដំណើរ​ជា​សកល​។​

ប៉ុន្តែ​ការ​ប្រកាស​មិន​ច្បាស់​ការណ៍​របស់​អង្គកា​រ​ WHO អាចនឹង​កាត់​ផ្ដាច់​ប្រទេស​​ឥណ្ឌា​​ ពី​ពិភព​លោក។ តួយ៉ាង​​មាន​ប្រទេស​ជាច្រើន​​បាន​ធ្វើ​ចំណាត់​ការ​ដោយ​ខ្លួន​ឯង​​ ​រួម​មាន​ទាំង​ការ​ដាក់​កម្រិត​ការ​ធ្វើ​ដំណើរ​ទៅ​ប្រទេស​ណា​ ដែល​មាន​វ៉ារ៉្យង់​ថ្មី​នេះ​នៅ​ទីនោះ​។

វ៉ារ្យ៉ង់​ B.1.617 មាន​ការ​ផ្លាស់ប្តូរ ១៣ លើក​មក​ហើយ​ ដោយ​ការ​វិវត្ត​ ២ ដង​មក​នោះ​មាន​លក្ខណៈ​ស្រដៀង​​ទៅ​នឹង​​វ៉ារ្យ៉ង់​ផ្សេង​ទៀតផង​ដែរ​។ លោកស្រី Maria Van Kerkhove ប្រធាន​ផ្នែក​បច្ចេកទេស​អង្គការ​ WHO បានថ្លែង​នៅ​ក្នុង​សន្និសីទ​សារព័ត៌​មាន​កាល​ពីថ្ងៃ​ចន្ទ​ថា៖ «ប្រសិន​បើ​យើង​និយាយ​អំពី​ប្រសិទ្ធភាព​​នៃ​វ៉ាក់សាំង​ប្រឆាំង​នឹង​វ៉ារ៉្យង់​ B.1.617 នេះ​ យើង​នៅ​កំពុង​រង់ចាំ​ការ​សិក្សា​មួយ​ ដែល​ថា​វ៉ារ៉្យង់​នេះ​អាច​កាត់​បន្ថយ​ប្រសិទ្ធភាព​របស់​វ៉ាក់សាំង​មួយ​កម្រិត​»។

យ៉ាង​ណា​មិញ លោកស្រី​មិន​បាន​រាយការណ៍​ពី​ការ​រក​ឃើញ​ណា​មួយ​ ដែល​អាច​បញ្ជាក់​ថា​ វ៉ាក់សាំង​​ដែល​ត្រូវ​បាន​អនុញ្ញាត​ឱ្យ​ប្រើ​បច្ចុប្បន្ន ​មាន​ប្រសិទ្ធភាព​ប្រឆាំង​នឹង​វ៉ារ្យង់​បាន​ប៉ុនណា​នោះ​ទេ។

លោក​វេជ្ជបណ្ឌិត Swaminathan បាន​និយាយ​នៅ​ក្នុង​សន្និសីទ​សារព័ត៌មាន​ថា៖ «អ្វី​ដែល​យើង​ដឹង​ឥឡូវ​នេះ​​ គឺ​ថា​ថ្នាំ​វ៉ាក់សាំង​មាន​ប្រសិទ្ធភាព​ក្នុង​ការ​ប្រឆាំង​នឹង​វ៉ារ៉្យង់​ផ្សេងៗ។ ដូច្នេះ​ហើយ មិន​ចាំបាច់​ត្រូវ​ផ្លាស់​ប្តូរ​​វ៉ាក់សាំង​អ្វី​នោះទេ​​»។

លោក Ravindra Gupta អ្នក​ឯកទេស​ខាង​អតិសុខុម​ជីវសាស្ត្រ និង​ជា​សាស្ត្រាចារ្យ​​នៅ​សាកលវិទ្យាល័យ​ University of Cambridge បាន​និយាយ​ថា​៖ «វ៉ារ៉្យង់​ថ្មី​នេះ​អាច​រីក​រាលដាល​ដល់​មនុស្ស​មួយ​ចំនួន​ ដែល​ធ្លាប់​មាន​កូវីដ​ពី​មុន​មក​ ឬ​ធ្លាប់​បាន​ចាក់​​​វ៉ាក់សាំង​ហើយ​។ ប្រសិនបើ​ វា​ក្លាយ​ជា​ករណី​បែបនេះ​ វ៉ាក់សាំងក៏​នៅ​តែ​អាច​ការពារ​មនុស្ស​ពី​ករណី​ធ្ងន់ធ្ងរ​នៃ​ជំងឺ​នេះ​បាន​ដែរ​។ ប៉ុន្តែ​ បុគ្គល​ដែល​​ចាក់​វ៉ាក់សាំង​រួច​នៅ​តែ​មាន​ប្រព័ន្ធ​ភាព​ស៊ាំ​​ខ្លាំង​ប្រឆាំង​នឹង​វ៉ារ៉្យង់​នេះ​ជាង​បុគ្គល​ធម្មតា​»៕

អត្ថបទគួរចាប់អារម្មណ៍