.jpg)
លោក Luiz Inacio Lula da ធ្វើសន្និសីទសារព័ត៌មាននៅអគារសហជីពកម្មករដែកកាលពីថ្ងៃ ១០ មីនា។ AFP
កាលពីថ្ងៃពុធ ទី ១០ មីនា អតីតប្រធានាធិបតីប្រេស៊ីល លោក Luiz Inacio Lula da Silva បានបើកការវាយប្រហារលើលោក Jair Bolsonaro ជុំវិញការគ្រប់គ្រងរបស់មេដឹកនាំបច្ចុប្បន្នរូបនេះលើការរាតត្បាតជំងឺកូវីដ ១៩ និងវិបត្តិសេដ្ឋកិច្ចប៉ុន្មានថ្ងៃបន្ទាប់ពីចៅក្រមតុលាការកំពូលបានលុបចោលការផ្ដន្ទាទោសពីបទពុករលួយមួយ ដែលការសម្រេចនេះ បើកផ្លូវសម្រាប់លោក Lula da Silva វិលត្រឡប់ទៅប្រឡូកក្នុងនយោបាយឡើងវិញ។
ក្នុងការសម្រេចកាលពីថ្ងៃចន្ទ ទី ៨ មីនា ចៅក្រមតុលាការកំពូល Edson Fachin បានរកឃើញថា នីតិវិធីក្នុងសំណុំរឿងលោក Lula da Silva គឺខុសតាំងពីដំបូងដោយតុលាការសហព័ន្ធនៅក្រុង Curitiba មិនមានយុត្តាធិការក្នុងការផ្ដន្ទាទោសលោកទេ ដូច្នេះការសម្រេចរបស់តុលាការនេះក្នុងសំណុំរឿងលោក Lula da Silva គឺត្រូវបានចាត់ទុកជាមោឃៈ។
ក្នុងការថ្លែងសុន្ទរកថាជាលើកដំបូងបន្ទាប់ពីការសម្រេចរបស់តុលាការលោក Lula da Silva បានវាយប្រហារលោក Bolsonaro ដោយផ្ទាល់ពីកំណត់ត្រារបស់លោកក្នុងការដោះស្រាយវិបត្តិកូវីដ ១៩ ជាពិសេសការពន្យារពេលក្នុងការទិញយកវ៉ាក់សាំង និងការវាយប្រហារប្រសិទ្ធភាពនៃវ៉ាក់សាំងទាំងនោះ ជាសាធារណៈ។ ប្រទេសប្រេស៊ីល បានបាត់បង់មនុស្សជិត ២៧០ ០០០ នាក់ ដោយសារកូវីដ ១៩ ដែលជាតួលេខខ្ពស់ជាងគេ បន្ទាប់ពីអាមេរិក។
លោក Lula da Silva បានថ្លែងចំពោះមុខសមាជិកសហជីពកម្មករដែកនៅទីក្រុង Sao Bernardo do Campo ថា៖ «ប្រទេសនេះមានភាពរញ៉េរញ៉ៃ និងកំពុងបែកបាក់ ដោយសារគ្មានរដ្ឋាភិបាល»។ លោកបានបន្តថា៖ «ភាគច្រើននៃការស្លាប់ទាំងនេះ គឺអាចចៀសវាងបាន»។
លោកបានបន្ថែមទៀតថា៖ «កុំធ្វើតាមការសម្រេចចិត្តដ៏ឆោតល្ងង់របស់ប្រធានាធិបតី ឬរដ្ឋមន្ត្រីសុខាភិបាល។ ទៅចាក់វ៉ាក់សាំងទៅ»។
ការថ្លែងរបស់លោក Lula da Silva បានធ្វើឱ្យមានប្រតិកម្មភ្លាមៗពីប្រធានាធិបតី Bolsonaro។
លោក Bolsonaro បាននិយាយនៅលើទូរទស្សន៍ CNN Brasil ថា៖ «ការរិះគន់របស់ Lula គឺមិនសមហេតុផល។ ឥឡូវនេះលោកកំពុងចាប់ផ្តើមយុទ្ធនាការបោះឆ្នោតរបស់លោក ប៉ុន្តែគ្មានអ្វីដែលល្អសម្រាប់បង្ហាញទេ។ យុទ្ធនាការរបស់ពួកគេ គឺគ្រាន់តែដើម្បីរិះគន់ កុហក និងបន្តការផ្សព្វផ្សាយព័ត៌មានក្លែងក្លាយ»។
លោក Bolsonaro បាននិយាយថា លោកនឹងស្នើច្បាប់ដើម្បីស្ដារការប្រើប្រាស់សន្លឹកឆ្នោតជាក្រដាសឡើងវិញសម្រាប់ការបោះឆ្នោតប្រធានាធិបតីឆ្នាំ ២០២២ ដោយសារលោកគិតថា ក្រដាសសន្លឹកឆ្នោតអាចធ្វើសវនកម្មបាន ហើយលោកមិនទុកចិត្តការបោះឆ្នោតតាមរយៈប្រព័ន្ធអេឡិចត្រូនិកនោះទេ។
លោក Bolsonaro បានបន្ថែមទៀតថា ការផ្ដន្ទាទោសពីបទពុករលួយរបស់លោក Lula da Silva គឺមិនទាន់បានលុបចោលទាំងស្រុងទេ ខណៈរង់ចាំការសម្រេចរបស់ចៅក្រមទាំងអស់នៃតុលាការកំពូលមានន័យថា សិទ្ធិឈរឈ្មោះក្នុងការបោះឆ្នោតប្រធានាធិបតីឆ្នាំ ២០២២ របស់លោក Lula da Silva គឺមិនទាន់បានធានានៅឡើយ។
លោក Lula da Silva ដែលបានដឹកនាំប្រទេសប្រេស៊ីល ពីឆ្នាំ ២០០៣ ដល់ឆ្នាំ ២០១០ បានក្លាយជាអ្នកឈានមុខគេក្នុងការប្រឈមមុខនឹងអ្នកនយោបាយស្ដាំនិយម Bolsonaro ក្នុងការបោះឆ្នោតប្រធានាធិបតីឆ្នាំ ២០២២។ ក្នុងការថ្លែងសុន្ទរកថាដដែល លោក Lula da Silva បាននិយាយថា លោកនឹងចូលប្រឡូកនយោបាយវិញ តែមិនបានបញ្ជាក់ និងមិនបានបដិសេធថា លោកនឹងឈរឈ្មោះបោះឆ្នោតប្រធានាធិបតីដែរឬទេ។
ការស្ទង់មតិចុះផ្សាយកាលពីថ្ងៃចន្ទបង្ហាញថា ប្រមាណ ៥០% នៃប្រជាជនប្រេស៊ីលនិយាយថា ពួកគេអាច ឬប្រាកដនឹងបោះឆ្នោតឱ្យ Lula da Silva ប្រៀបធៀបជាមួយនឹង Bolsonaro ដែលទទួលបានចម្លើយបែបនេះពីប្រជាជនតែ ៣៨% ប៉ុណ្ណោះ។
បើទោះជាយ៉ាងនេះក៏ដោយលោក Lula da Silva នៅតែជាបុគ្គលដ៏ចម្រូងចម្រាស ១ រូបបន្ទាប់ពីត្រូវបានផ្ដន្ទាទោសឱ្យជាប់ពន្ធនាគារសរុប ២៦ ឆ្នាំពីបទពុករលួយ និងលាងលុយកខ្វក់កាលពីឆ្នាំ ២០១៧ ដែលផ្ដើមចេញពីការស៊ើបអង្កេតទៅលើអ្នកនយោបាយជាន់ខ្ពស់បានលួចប្រមូលប្រាក់រាប់ពាន់លានដុល្លារពីក្រុមហ៊ុនប្រេង Petrobras របស់រដ្ឋ។
លោកបានចំណាយពេលជាង ១៨ ខែនៅក្នុងពន្ធនាគារមុនពេលត្រូវបានដោះលែងនៅឆ្នាំ ២០១៩ ដោយរង់ចាំការប្ដឹងឧទ្ធរណ៍។
អ្នកអភិរក្សនិយមជាច្រើនចាត់ទុកលោក Lula da Silva ថាជាតំណាងនៃអំពើពុករលួយ និងអសមត្ថភាពសេដ្ឋកិច្ច ដោយសារអំពើពុករលួយ និងការធ្លាក់ចុះសេដ្ឋកិច្ចក្នុងប្រទេសប្រេស៊ីល ក្រោមការគ្រប់គ្រងរបស់អ្នកស្នងតំណែងដែលជ្រើសរើសដោយផ្ទាល់ គឺលោកស្រី DilmaRousseff។
លោក Lula da Silva បាននិយាយថា ខ្លួនលោកជាជនរងគ្រោះនៃ «ការកុហករបស់តុលាការដ៏ធំបំផុតក្នុងរយៈពេល ៥០០ ឆ្នាំ» ដោយនិយាយម្តងទៀតនូវការអះអាងថា ការចោទប្រកាន់លោកពីបទពុករលួយ គឺត្រូវបានប្រឌិតឡើង ដើម្បីដកលោកចេញពីការប្រកួតប្រជែងការបោះឆ្នោតប្រធានាធិបតីឆ្នាំ ២០១៨ ដែលនៅទីបំផុត Bolsonaro បានឈ្នះ។
តែទោះជាយ៉ាងណាលោក Lula da Silva ត្រូវបានក្រុមឆ្វេងនិយមចាត់ទុករូបលោកថា ជាវីរបុរសរបស់ពួកគេ។ ពួកគេនៅមានជំនឿថា ចៅក្រមប្រធានអង្គជំនុំជម្រះសំណុំរឿងលោក Lula da Silva គឺលោក Sergio Moro បានឃុបឃិតជាមួយរដ្ឋអាជ្ញា ដើម្បីដកសិទ្ធិលោក Lula ក្នុងការឈរឈ្មោះបោះឆ្នោត។ ការអះអាងរបស់ពួកគេ គឺផ្អែកទៅលើសារទូរស័ព្ទដែលត្រូវបែកធ្លាយ និងតែងតាំងលោកចៅក្រម Moro ជារដ្ឋមន្ត្រីក្រសួងយុត្តិធម៌ដោយលោក Bolsonaro។
យ៉ាងណាមិញ លោកLula da Silva នៅតែប្រឈមមុខនឹងការចោទប្រកាន់ពីបទពុករលួយមួយចំនួនដោយរាប់បញ្ចូលទាំងបទចោទប្រកាន់ខាងលើ ដែលពេលនេះនឹងត្រូវផ្ទេរទៅតុលាការសហព័ន្ធនៅទីក្រុង Brasilia៕
