កាលពីថ្ងៃសៅរ៍ទី ៨ ឧសភាអតីតប្រធានាធិបតីកោះម៉ាល់ឌីវលោក Mohamed Nasheed រងរបួសធ្ងន់ធ្ងរ បន្ទាប់ពីមានការវាយប្រហារដោយគ្រាប់បែក។ ប្រធានាធិបតីលោក Ibrahim Solih បានពិពណ៌នាការផ្ទុះនៅខាងក្រៅគេហដ្ឋានរបស់លោក Nasheed ថាជាការវាយប្រហារទៅលើលទ្ធិប្រជាធិបតេយ្យ និងសេដ្ឋកិច្ចរបស់ប្រទេសម៉ាល់ឌីវ។
ប្រព័ន្ធផ្សព្វផ្សាយក្នុងស្រុកបានរាយការណ៍ថា នៅជិតរថយន្តរបស់លោក Nasheed មានម៉ូតូមួយដែលចតចោលហើយមានផ្ទុកនូវគ្រាប់បែកច្នៃមួយប្រភេទ។ ប៉ូលិសបាននិយាយថាភ័ស្តុតាងទាំងអស់ដែលបានបង្ហាញរកឃើញថាករណីនេះជាអំពើភេរវកម្មដោយចេតនា។
លោក Ahmed Shaheed រដ្ឋមន្ត្រីក្រសួងការបរទេសនៅក្នុងគណៈរដ្ឋមន្ត្រីរបស់អតីតប្រធានាធិបតីបាននិយាយថា៖ «ករណីនេះជាការប៉ុនប៉ងគ្រោងទុកដើម្បីធ្វើឃាតលោក Nasheed»។ នេះបើយោងតាមការស្រង់សម្តីរបស់សារព័ត៌មាន Aljazeera ។
លោក Shaheed បាននិយាយថាការវាយប្រហារគឺមិនមានអ្វីគួរឱ្យភ្ញាក់ផ្អើលនោះទេ ដោយសារតែចំនួននៃការញុះញង់ទោរទន់ទៅនឹងអំពើហិង្សា និងភាពអមនុស្សធម៌ប្រឆាំងនឹងលោក Nasheed។
កាលពីថ្ងៃទី ៨ ឧសភាកន្លងទៅ ប៉ូលិសបានប្រកាសចាប់ខ្លួនជនសង្ស័យ ២ នាក់ ប៉ុន្តែមិនមានព័ត៌មានអំពីជនសង្ស័យច្បាស់លាស់នៅឡើយទេ។
ប៉ុន្តែការប៉ាន់ស្មានបានផ្តោតទៅលើក្រុមជ្រុលនិយមសាសនា និងអ្នកនយោបាយប្រឆាំងដែលត្រូវបានគេចោទប្រកាន់ក្នុងរឿងអាស្រូវកេងបន្លំប្រាក់។
យោងតាមការដកស្រង់សម្តីរបស់ Reuters អគ្គរដ្ឋអាជ្ញាលោក Hussain Shameem បានប្រាប់អ្នកយកព័ត៌មានថា៖ «អ្នកដែលត្រូវបានចាប់ខ្លួនទាំងនោះគឺទាក់ទងនឹងភាពជ្រុលនិយម»។ លោកបាននិយាយបន្ថែមថា ប៉ូលិសជឿជាក់ថាមានមនុស្សជាច្រើនបានចូលរួមនៅក្នុងការធ្វើផែនការ និងអនុវត្តការបំផ្ទុះគ្រាប់បែកនេះ។
កាលពីថ្ងៃទី ៩ ឧសភាគណនី Twitter ផ្លូវការរបស់ប៉ូលិសម៉ាល់ឌីវបានប្រកាសចាប់ខ្លួនបុរសម្នាក់ដែលត្រូវបានគេជឿថាជាជនសង្ស័យសំខាន់បំផុតក្នុងការវាយប្រហារនេះ។
ជនសង្ស័យដែលបានចាប់ខ្លួនរួមមាន លោក Adhuham Ahmed Rasheed អាយុ ២៥ ឆ្នាំ, Mujaz Ahmed អាយុ ២១ ឆ្នាំ និង Thahmeen Ahmed អាយុ ៣២ ឆ្នាំ។
ប៉ូលិសបានចោទប្រកាន់ថា លោក Adhuham Ahmed Rasheed គឺជាបុរសដែលបានឃើញនៅក្នុងកាមេរ៉ាសុវត្ថិភាពកំពុងរង់ចាំតាមបណ្តោយផ្លូវដែលម៉ូតូបំពាក់គ្រាប់បែកនោះចតក្បែររថយន្តរបស់លោក Nasheed។
មន្ទីរពេទ្យដែលអតីតប្រធានាធិបតីរូបនេះកំពុងសម្រាកព្យាបាលបាននិយាយថា លោក Nasheed ស្ថិតក្នុងស្ថានភាពធ្ងន់ធ្ងរ បន្ទាប់ពីវះកាត់ក្បាលទ្រូងពោះ និងអវយវៈរបស់លោក។ ក្រៅពីរូបលោកមានមនុស្ស ៤ នាក់ផ្សេងទៀតរងរបួសរួមមានអង្គរក្សរបស់លោក Nasheed ចំនួន ២ នាក់អ្នកនៅក្បែរនោះ ២ នាក់។
ប្រធានាធិបតីម៉ាល់ឌីវលោក Ibrahim Mohamed Solih បានថ្លែងនៅក្នុងទូរទស្សន៍ជាតិថា ក្រុមប៉ូលិសសហព័ន្ធអូស្ត្រាលី (Australian Federal Police) នឹងជួយស៊ើបអង្កេតលើករណីនេះ។ ប៉ូលិសបាននិយាយថាមន្ត្រីមកពីការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្មក៏ត្រូវបានស្នើសុំឱ្យជួយក្នុងការស៊ើបអង្កេតនេះដែរ។
យោងតាមសារព័ត៌មាន Arab News ប៉ូលិសម៉ាល់ឌីវជំរុញឱ្យសាធារណជនផ្តល់ព័ត៌មានណាមួយដែលអាចកំណត់អត្តសញ្ញាណជនល្មើសដោយហេតុការណ៍នេះជាអំពើភេរវកម្មដោយចេតនា។
គួរបញ្ជាក់ផងដែរថា លោក Nasheed បានដឹងខ្លួនហើយកំពុងសម្រាកនៅមន្ទីរពេទ្យ ADK នៅ Malé ប្រទេសម៉ាល់ឌីវ។ លោក Nasheed មានវ័យ ៥៣ ឆ្នាំ គឺជាអ្នកនយោបាយដែលមានប្រជាប្រិយភាព ហើយលោកបានបង្កើតគណបក្សប្រជាធិបតេយ្យម៉ាល់ឌីវដែលបានឈ្នះឆ្នោតប្រហែលជា ២៥ ភាគរយនៅឆ្នាំ ២០១៨៕